त‍इरकर 15

येरुसलॆम ता सभा

1जोक्‍क आलर यूदेया राजी ती सीरिया राजी ता अन्‍तियोख़ेया बरचर ती नन-यहूदी पत्त'उरिन एन्ने सिखाब'आ लगियर, “मूसासी सिखाबाचका नॆग ही लेक्‍खा निम्‍है खतना मल मनो होले नीम नाड़र'आ पोल्‍लोर।”#लौव्य 12:3 2इदही पत्त नू पौलुस दरा बरनबास अरा अबड़ा आलर गने कोड़हे आनानख्रना मंजा। औंगे कलीसिया पौलुस अरा बरनबास अरा अन्‍तियोख़ेया ता जोक्‍क पत्त'उरिन येरुसलॆम त‍इय्या गे तिगचर का असन आर ई पत्त नू त‍इरकर अरा सेयान आलर गने कछनख्र'ओर। 3अन्‍तियोख़ेया कलीसिया आरिन त‍इय्या। आर फोइनिकॆ दरा समारिया मन्नुम केरर ती असता उर्मी पत्त'उर गने तिंगियर का एकासे नन-यहूदीर धर्मेसिन इंझ्रर। अरा ई कत्‍था ओर्मा पत्त'उरिन नगदे रिझ्रताचा।

4आर येरुसलॆम अंड़सियर ख़ने, कलीसिया अरा त‍इरकर अरा सेयान आलर आरिन परघाचर। अरा आर धर्मेस आर ही ती एन्‍देर एन्‍देर नलख नंजस अबड़ा उर्मिन तिंगियर। 5लिकिन फरिसीर ही खोंड़हा ता जोक्‍क पत्त'ऊ आलर इज्‍जर ती बाचर, “नन-यहूदी पत्त'ऊ आलर खतना नन्ना दिम र'ई अरा मूसासी पॆसकन पॆस्रना र'ई।”

6औंगे त‍इरकर अरा सेयान आलर ई पत्त नू कछनख्र'आ गे ख़ॊंड़रर। 7इदही पत्त नू बग्‍गे आनानख्रना मंजका ख़ॊख़ा पतरस इज्‍जस ती बाचस, “अना भ‍ईरो, नीम अख़दर का धर्मेस पहिल खेप निम्‍है मझी ती एंगन नन-यहूदीर नू दौ कत्‍था तेंगा गे चज्‍जियस, आर एंग्‍है ती दौ कत्‍था मेंजर अरा पत्ताचर।#त‍इ 10:1-43 8धर्मेस ओर्मर ही सोच आबोन अख़दस, आस आरिन इंझरस। अरा आस नमा गे एकासे नंजस अन्नेम आर गे नेम्‍हा बॊलतासिन चिच्‍चस ती तंग्‍है इंझ्रनन ऎदस।#त‍इ 10:44; 2:4 9अरा आस आर ही जियन पत्त'अना ती नेम्‍हा नंजस अरा नम्‍है नू अरा आर नू एन्‍देर हूँ फरक म‍ल नंजस। 10औंगे अक्‍कु नीम एन्‍देरगे नन-यहूदी पत्त'ऊ आलर ही ख़ेसेर नू ओत्‍था पगसीन लद'अरकी धर्मेसिन बिढ़दर? एकदन नाम महले नम्‍है पूरखर चेड़'आ पोल्‍लर। 11लिकिन नाम पत्त'अदत का नाम अरा आर हूँ उर्बा येसुसी सोग्‍गे ती नाड़र'ओत।”

12तहाँ ओर्मा खोंड़हा कलेकसे मंजा अरा पौलुसी अरा बरनबासी कत्‍थन मेंजा का धर्मेस आर ही ती एन्‍देर एन्‍देर चिन्‍हा दरा अजगुत नलख गुट्ठी नन-यहूदीर मझी नू नंजस। 13आर ही बाचका मुंजका ख़ॊख़ा याकॊबस बाचस, “अना भ‍ईरो, एंग्‍हैन मेना। 14सिमॊनस नमन तिंगियस का धर्मेस नन-यहूदीर ती जोक्क आलारिन तंगा गे चज्जियस ती पहिल खेप एकासे सोग्‍गे ईरियस। 15धर्मेसी कत्‍था तिंगुर ही कत्‍था हूँ इदही गने ओन्‍टम उक्‍की। एन्ने लिख्रकी र'ई का,

16‘इबड़ा ही ख़ॊख़ा ऎन किर्रोन ती

दाऊदसी धंस्रका एड़पन फेन कम'ओन।

अरा ऎन अदही घराड़िन फेन कम'ओन

अरा अदिन फेन इजत'ओन।

17औंगे बछ्रका आलर अरा ऎन एंगा गे चजकादन

अबड़ा ओर्मा नन-यहूदीर उर्बासिन बेद्दोर।

उर्बस ब'अदस,

18इबड़न नॆ हुल्‍लो ती अख़ताचस।’#आमो 9:11,12

19औंगे ऎन सोचदन का धर्मेस तरा बरचका नन-यहूदीरिन नाम सस्ती अम्‍बोत चि'आ। 20लिकिन नाम आर गे लिख'ओत का आर मूर्ती गुट्ठी गे अरगका ओन्ना-मॊख़ना अरा उर्मी रकम ही पेहरन ही सोतरा नलख ती अरा घोंघन पॆदख़का मेक्‍खो गुट्ठी ही अहड़ा अरा ख़ॆंस ती तरकूटी र'ओर।#निर्ग 34:15-17; लौव्य 18:6-23; 17:10-16 21एन्‍देरगेका चिरान तिम नगरे नगरे नू मूसासी पॆसकन तिंगुर र'अनर अरा आद उर्मी ख़न्न ऎख़्रना उल्‍ला नू गोड़हा एड़पा गुट्ठी नू पढ़तार'ई।”

नन-यहूदी पत्त'ऊ आलर गे चिठी लिखना

22तहाँ त‍इरकर अरा सेयान आलर कलीसिया ता उर्मिर गने तिगचर का नम्‍है ती जोक्‍क आलारिन चाजोत ती पौलुस अरा बरनबास गने अन्‍तियोख़ेया त‍इय्योत। आर इबड़र हिकनर का बरसब्‍बास बारना यूदस अरा सीलास, ईर पत्त'ऊ आलर नू मुध रहचर। 23अरा आर ही ख़ेक्खा नू ई चिठिन त‍इय्यर: “अन्‍तियोख़ेया अरा सीरिया अरा किलिकिया ता नन-यहूदी पत्त'ऊ भइय्योर गे ऎम त‍इरकर अरा सेयान आलर अरा येरुसलॆम ता पत्त'ऊ भइय्योर ही मोंजरा।

24ऎम मेंजकादम का एम्‍है ती जोक्‍क भ‍इ‍य्योर निम्‍है हेद्दे बरचर ती तम्‍है कत्था ती निमन अकबकाम बाचर अरा निमन हदियाचर। लिकिन आर गे ऎम एन्ने एन्‍देर पॆसका हूँ मल चिच्का रहचकम। 25औंगे ऎम ओर्मर ही मने ती तिगचकम का जोक्‍क आलारिन चाजोत ती आरिन पौलुस अरा बरनबास गने त‍इय्योत। 26ईर इरबारिम एन्ने आलर हिकनर का तम्‍है उज्‍जनन हूँ मल ऎररकी उर्बस येसु मसीस गे सुसर ननू आलर हिकनर। 27ऎम यूदस अरा सीलासिन हूँ निम्‍है गुसन त‍इय्दम। आर इबड़ा कत्‍थन निमन तम्‍है ब‍ई ती तेंगोर। 28नेम्‍हा बॊलतस अरा एमा गे ईद बॆस लग्‍गिया का इबड़ा मुध कत्‍थन अम्‍बरकी अउर कोड़हे कत्‍था गुट्ठिन निम्‍है म‍इय्याँ मल लद'ओम। 29नीम मूर्ती गुट्ठी गे अरगका ओन्ना-मॊख़ना अरा ख़ॆंस अरा घोंघन पॆदख़का मेक्‍खो गुट्ठी ही अहड़ा अरा उर्मी रकम ही पेहरन ही सोतरा नलख ती तरकूटी र'अके। इबड़ा ती नीम तरकूटी र'ओर होले निमा गे दौ मनो। निम्‍है दौ मनन नेक‍अन।”

30आर बिदा मंजर ती अन्‍तियोख़ेया केरर अरा असन अंड़सियर ती कलीसिया आबोन जुमाबाचर ती चिठिन चिच्‍चर। 31चिठी नू लिख्रका जिया सालना कत्‍थन मेंजर ती आलर कोड़हे रिझ्रर। 32यूदस अरा सीलास हूँ गा धर्मेसी कत्‍था तिंगुर रहचर। आर भइय्योरिन कोड़हे कत्‍था बाचर ती जिया सालना चिच्‍चर अरा आरिन बड़ियर नंजर। 33जोक्‍क उल्‍ला आर असन रहचर ती भइय्योर आरिन कोड़े गने येरुसलॆम कलीसिया किर्रा गे त‍इय्यर। 34[सीलास गा असन र'आ गे तिगचस।] 35लिकिन पौलुस दरा बरनबास अन्‍तियोख़ेया नुम रहचर अरा नगदे बग्‍गे आलर गने उर्बासी कत्‍थन सिखाब'आ अरा तेंगा कुद्दा लगियर।

पौलुस अरा बरनबासी छिन्‍डरना

36जोक्‍क उल्‍ला ख़ॊख़ा पौलुस बरनबासिन बाचस, “बरा, नाम एका एका नगरे नू उर्बासी कत्‍था तिंका रहचकत असन फेन क'ओत ती भइय्योर गने भेंट मनोत अरा आर एकासे र'अनर अदिन ऎरोत।” 37बरनबास गा मरकुस बारना यॊहनसिन संगे हो'आ गे तिगचस। 38लिकिन पौलुसी सोच एन्ने रहचा का एकास पम्‍फुलिया नू आरिन अम्‍बियस चिच्‍चस अरा आर ही नलख नू संगे मल चिच्‍चस, आसिन हो'अना दौ मलकी। 39ई पत्त नू इरबर नू कोड़हे नग्‍गानख्रना मंजा का आर इरिबर छिन्‍डरर केरर। बरनबास मरकुसिन संगे होच्‍चस ती डोंगा ती कुप्रोस केरस। 40लिकिन पौलुस सीलासिन चज्‍जियस, अरा भइय्योर ती उर्बासी सोग्‍गे नू सोंपरस ती असलेक किर्रिम बिच्‍चियस। 41अरा आस सीरिया दरा किलिकिया मन्नुम कलीसिया गुट्ठिन बड़ियर नंजस ती केरस।

Currently Selected:

त‍इरकर 15: KURUXBSI

Highlight

Copy