MARKOS 6

Ïa U Jisu la kyntait ha Nasareth

(Mat. 13:53-58; Luk. 4:16-30)

1U Jisu u la mihnoh na kata ka jaka bad u la leit phai pat sha la shnong; ki synran ki bud ïa u. 2Ha ka sngi Sabbaton u la sdang ban hikai ha ka synagog. Bun ki briew ki la don hangta; bad haba ki la ïohsngew ïa u, baroh ki la sngewlyngngoh. “Nangno u la ïoh ïa kane baroh?” ki la kylli. “Ka jingstad aïu kane ba la ai ha u? Kumno u leh ïa ki kambah? 3Hato um dei uto u misteri, u khun jong ka Mari, bad u hynmen jong u Jakob, u Josis, u Judas bad u Simon? Hato ki para kynthei jong u kim shong kim sah hangne?” Bad kumta ki la kyntait noh ïa u.

4 # Ïoan. 4:44 U Jisu u la ong ïa ki, “Ïa u Nongïathuhlypa la burom ha kylleng lait noh tang ha la ka shnong bad da ki ba-ha-ïing bad ka longïing jong u.”

5Um shym la lah ban leh kino kino ki kambah hangta, lait noh tang kaba buh ïa ki kti jong u ha ki khyndiat ngut ki briew kiba pang bad u la pynkhiah ïa ki. 6U la sngewlyngngoh shikatdei, namar ki briew kim shym don jingngeit.

U Jisu u phah ïa ki khat-ar ngut ki synran

(Mat. 10:5-15; Luk. 9:1-6)

Nangta U Jisu u la leit sha ki nongrit kiba don sawdong ha kata ka thain, u da hikai ïa ki briew. 7U la khot lang ïa ki khat-ar ngut ki synran bad u la phah ïa ki ar ngut ar ngut. U la ai ïa ki ka bor halor ki mynsiem bymkhuid 8bad u la hukum ïa ki, “Wat rah ei ei bad phi ha ka jingleit jong phi lait noh tang ïa u diengduh — ym ïa u kpu, ym ïa ka pla khrong, ym ïa ka pisa ha ki pla sopti jong phi. 9Phong ïa ki juti, hynrei wat rah sopti nalor kaba phi la phong.” 10U la ong ruh, “Hangno hangno ba la khot sngewbha ïa phi, sah ha kajuh ka ïing haduh ba phin da mih na kata ka jaka. 11#Ki Kam. 13:51#Luk. 10:4-11Lada phi wan poi ha ka shnong kaba ki briew kim khot sngewbha ïa phi lane kim sngap ïa phi, mihnoh na ka bad kynther noh ïa u pui pui na ki kjat jong phi. Kata kan long ka jingmaham ïa ki!”

12Kumta ki la leit bad ïalap ba ki briew kin phai noh na ki pop jong ki. 13#Jak. 5:14Ki la beh noh bun ki ksuid, bad ki la tah umphniang Olib ha kiba bun ki briew kiba pang bad ki la pynkhiah ïa ki.

Ka jingïap u Ïoannis u Nongpynbaptis

(Mat. 14:1-12; Luk. 9:7-9)

14 # Mat. 16:14; Mrk. 8:28; Luk. 9:19 Mynta u syiem Herod u la ïohsngew shaphang kane baroh, namar ka nam U Jisu ka la phriang kylleng. Katto katne ngut ki briew ki ïa-ong, “U Ïoannis u Nongpynbaptis u la im pat! Dei na kata ka daw balei u don ïa kane ka bor ban leh ki kambah.”

15Kiwei pat, ki la ong, “U dei u Elijah.” Kiwei ki ong, “U dei u Nong ïathuhlypa, kum uwei na ki Nongïathuhlypa jong ki por ba-mynshuwa.”

16Haba u Herod u la ïohsngew ïa kata, u la ong, “U dei u Ïoannis u Nongpynbaptis! Nga la phah khrai ïa ka khlieh jong u, hynrei u la im pat!” 17#Luk. 3:19,20U Herod da lade hi u hukum ïa ka jingkem ïa u Ïoannis, bad u la phah teh kynjri ïa u bad phah set ha ka byndi. U Herod u la leh ïa kane namar ka Herodias, ïa kaba u la lah shongkurim, wat la ka la long ka tnga u para jong u, u Philip. 18U Ïoannis u Nongpynbaptis u la ïai-ong ïa u Herod, “Kam long kaba dei ïa me ban shongkurim ïa ka tnga u para jong me!”

19Kumta ka Herodias ka buhnud pyrshah ïa u Ïoannis bad ka la kwah ban pynïap noh ïa u, hynrei kam shym la lah namar u Herod. 20U Herod u la sheptieng ïa u Ïoannis namar u la tip ba u Ïoannis u long u briew uba bha bad uba khuid, bad kumta u ju da ïa u. U ju sngewbha ban sngap ïa u, wat la u shitom jingmut shikatdei eh man ka por ba u ïohsngew ïa u.

21Ha kaba khatduh, ka Herodias ka la ïoh ïa ka kabu jong ka. Ka dei ha ka sngi kha jong u Herod, mynba la pynlong ka jingkhawai na ka bynta baroh ki rangbah synshar baheh kyrdan ha ka jingsynshar jong u, ki Rangbah shipai, bad ki nongshong shnong bapawkhmat jong ka Galilaïa. 22Ka khun jong ka Herodias ka la wan shapoh bad ka la shad, bad ka la pynsngewbha ïa u Herod bad ïa kiba u la khot sngewbha. Kumta u syiem u la ong ha kata ka khynnah, “Kaei kaba pha kwah ban ïoh? Ngan ai ïa pha ïa kano kano kaba pha kwah.” 23Da ki jingsmai ba bunsien u la ong ha ka, “Nga smai ba ngan ai ha pha kano kano kaba pha pan, wat haduh shiteng ka hima jong nga!”

24Kumta ka khynnah ka la leit noh bad ka la kylli ïa ka kmie jong ka, “Kaei ngan pan?”

“Ka khlieh jong u Ïoannis u Nongpynbaptis,” ka la jubab.

25Mar kumta hi ka khynnah ka la leit phai kloi kloi pat sha u syiem bad ka la dawa, “Nga kwah ïa phi ban ai mynta hangne ha ka pliang, ïa ka khlieh u Ïoannis u Nongpynbaptis!”

26Kane ka pynlong ïa u syiem ban sngewsih haduh katta katta, hynrei um lah ban kyrngah ïa ka namar ki jingsmai ba u la pynlong ha khmat jong baroh kiba u la khot sngewbha. 27Kumta shisyndon u la phah ïa u nongap phira ryngkat bad ki hukum ban wallam ïa ka khlieh jong u Ïoannis. U nongap phira u la mihnoh, u leit sha ka byndi, bad khrai ïa ka khlieh jong u Ïoannis; 28nangta u la wallam ïa ka ha ka pliang bad ai ha ka khynnah, kaba la ai ïa ka ha la ka kmie. 29Haba ki synran jong u Ïoannis ki la ïohsngew shaphang kane, ki la wan bad shim noh ïa ka met jong u bad tep noh ïa ka.

U Jisu u bsa ïa ki san hajar ngut

(Mat. 14:13-21; Luk. 9:10-17; Ïoan. 6:1-14)

30Ki apostol ki la wan phai bad ki la ïakynduh ïa U Jisu; bad ki la ïathuh ha u ïa baroh kaba ki la leh bad la hikai. 31La don bun ki briew kiba la wan bad leit, haduh ba U Jisu bad ki synran jong u kim don por shuh wat ban bam jingbam. Kumta u la ong ïa ki, “To ngin ïaleit noh tang ma ngi sha ka jaka ba ngin ïalong tang para ma ngi bad phi lah ban pynjahthait shipor.” 32Kumta ki la sdang ban leit da ka lieng tang ma ki hi sha ka jaka kynjah.

33Kumno re kumno, la don bun ki briew kiba la ïohi ïa ki ba ki leit bad ki la tip shisyndon ba ki long kiei; kumta ki la ïaleit na baroh ki shnong bad mareh na ryngkew bad ki la poi ha ka jaka shuwa ïa U Jisu bad ki synran. 34#Jkhñ. 27:17; 1 Syiem. 22:17; 2 Khrn. 18:16; Ese. 34:5; Mat. 9:36Haba U Jisu la hiar na ka lieng, u la ïohi ïa une u paidbah babun, bad ïa ka mynsiem jong u la pyndap da ka jingsngewsynei ïa ki, namar ki la long kum ki langbrot khlem u nongsharai. Kumta u la sdang ban hikai bun kiei kiei ïa ki. 35Haba ka sngi ka la sdang noh, ki synran ki la wan ha u bad ki la ong, “Ka por ka dier palat, bad kane ka dei ka jaka kynjah. 36To phah noh ïa ki briew, bad ai ba kin leit sha ki lyngkha kiba hajan bad ki nongrit khnang ba kin thied ei ei ïa lade ban bam.”

37“Phi dei ma phi hi ban ai ei ei ïa ki ba kin bam,” U Jisu u la jubab.

Ki la kylli, “Hato me kwah ïa ngi ban leit bad pynlut arspah tylli ki sbai rupa ha u kpu khnang ban bsa ïa ki?”

38Kumta U Jisu u la kylli ïa ki, “Katno phi don kpu? Khie leit bad khmih.” Haba ki la shem, ki la ïathuh ïa u, “San tylli ki kpu bad ar tylli ki dohkha ruh.”

39U Jisu te u la ong ïa ki synran jong u ba baroh ki briew kin phiah ha ki kynhun kynhun bad shong halor u phlang bajyrngam. 40Kumta ki briew ki la shong ha ki laiñ, ha ki kynhun bashispah ngut bad ki kynhun basanphew ngut. 41Nangta U Jisu u la shim ïa ki san tylli ki kpu bad ar tylli ki dohkha, u la khmied sha bneng, bad u la ainguh ïa U Blei. U la kdiah ïa ki kpu bad ai ïa ki ha ki synran jong u ban sam ha ki briew. U la ïasam ruh ïa ki ar tylli ki dohkha hapdeng jong ki baroh. 42Uwei pa uwei u la bam bad u la ïoh ha ban da biang. 43Nangta ki synran ki la ïalum khat-ar tukri kiba dap da kaei kaba la sah tam na u kpu bad ki dohkha. 44Ka jingdon ki rangbah ïa kiba la bsa ka la long san hajar ngut.

U Jisu u ïaid halor ka um

(Mat. 14:22-23; Ïoan. 6:15-21)

45Mar kumta hi U Jisu u la pynlong ïa ki synran ban kiew halor ka lieng bad ban leit ha shuwa jong u sha Bethsaida, sha shiliang jong ka duriaw, katba u dang phah noh ïa u paidbah. 46Hadien ba u la khublei ïakhlad ïa ki briew, u la leit noh sha u lum ban duwai. 47Haba la janmiet, ka lieng ka la don hapdeng ka duriaw, katba U Jisu u dang don marwei ha ryngkew. 48U la ïohi ba ki synran jong u ki dang ïaleh shitom ha ki boitha, namar ki dang king pyrshah ïa ka lyer, kumta katto katne por hapdeng lai bad hynriew baje mynstep u la wan sha ki, da kaba ïaid halor ka um. U la don jingmut ban ïaid najan jong ki, 49hynrei ki la ïohi ïa u ba u ïaid halor ka um. “Ka dei ka rngai!” ki la pyrkhat, bad ki la lynñiar. 50Ki la sheptieng haduh katta katta haba ki la ïohi ïa u.

Mar kumta hi U Jisu u la kren ïa ki, “Long shlur!” u la ong. “Dei ma nga. Wat sheptieng!” 51Nangta u la kiew halor ka lieng bad ki, bad ka lyer ka la long jai jai. Ki synran ki la sngewlyngngoh haduh katta katta, 52namar kim pat shym la sngewthuh ïa ka jingmut bashisha jong ka jingbsa ïa ki san hajar ngut; ki jingmut jong ki kim lah ban ïohkem ïa kata.

U Jisu u pynkhiah ïa uba pang ha Gennesaret

(Mat. 14:34-36)

53Ki la leit sha shiliang ka duriaw bad ki la wan poi ha Gennesaret, ha kaba ki la teh ïa ka lieng. 54Haba ki la hiar na ka lieng, mar kumta hi, ki briew ki la ithuh ïa U Jisu. 55Kumta ki la ïamareh ha baroh kata ka thain; bad shano shano ba ki la ïohsngew ba u don, ki la wallam ha u ïa ki briew kiba pang kiba thiah ha ki jingthiah jong ki. 56Bad shano shano ba U Jisu u leit, sha ki nongrit, ki shnong, ki lyngkha, ki paidbah ki rah ïa kito kiba pang sha ki jaka ïew bad kyrpad ïa u ban shah ïa ki la kumno kumno ban ktah ïa ka rmiang jaiñkup jong u; bad baroh kiba ktah ïa ka, ki ïohkhiah.

Currently Selected:

MARKOS 6: KHACLBSI

Highlight

Copy