MARKOS 2

U Jisu u pynkhiah ïa u briew uba pang ïapshiliang

(Mat. 9:1-8; Luk. 5:17-26)

1Hadien katto katne sngi U Jisu u la leit phai pat sha Kapernam, bad ka khubor ka la phriang ba u la don ha ïing. 2Kumta bun ki briew ki la ïawanlang shisien wan ba ym don jaka shuh kaba lait, ym don jaka shuh wat habar ha khmat ka jingkhang. U Jisu u dang ïalap ïa ka khubor ha ki, 3haba saw ngut ki rangbah ki la poi, ki da rah ïa u briew uba pang ïapshiliang sha U Jisu. 4Na ka daw jong u paidbah, kim shym la lah ban wallam ïa uta u briew sha u. Kumta ki la weng ïa ka jingsop na ka tnum ïing hamar ka jaka ba U Jisu u don. Haba ki la dep weng ïa ka jingsop ïing, ki la pynhiar ïa uta u briew shapoh, u da thiah ha ka jingthiah jong u. 5Haba U la ïohi haduh katno ba ki don ka jingngeit, U Jisu u ong ha uta uba pang ïapshiliang, “Ko khun jong nga, ïa ki pop jong me la map.”

6Katto katne ngut ki nonghikai ka Hukum kiba dang shong hangta ki la pyrkhat ha lade, 7“Kumno u nud ban kren kumne? Kane ka dei ka jingkrenbeiñ Blei! Dei tang U Blei hi marwei uba lah ban map ïa ki pop!”

8Mar kumta hi U Jisu u la tip ïa kaei kaba ki dang ïa-pyrkhat, kumta u la ong ha ki. “Balei ba phi ïa-pyrkhat kum ïa kita kiei kiei? 9Hato ka long kaba kham suk ban ong ha une u briew uba la ïapshiliang, ‘Ïa ki pop jong me la map’ ne ban ong, ‘To ïeng, to rah ïa la ka jingthiah, bad to ïaid’? 10Ngan pynshisha ha phi, te ba U Khun U Briew u don ka bor ha ka pyrthei ban map ïa ki pop.” Kumta u la ong ha uta u briew ba la ïapshiliang, 11“Nga ong ïa me, to ïeng, to rah ïa la ka jingthiah, bad to leit noh sha ïing!”

12Katba baroh ki dang ïa-peit, uta u briew u la ïeng joit, u la rah ïa la ka jingthiah, bad mar kumta hi u la leit noh. Baroh ki la ïa-sngewlyngngoh haduh katta katta bad ki la ïaroh ïa U Blei, ki da ong, “Ngim pat ju ïohi kum kane kaei kaei!”

U Jisu u khot ïa u Lebi

(Mat. 9:9-13; Luk. 5:27-32)

13U Jisu u la leit phai pat sharud ka duriaw Galilaïa. U paidbah u la wan sha u bad u la sdang ban hikai ïa ki. 14Katba u dang ïaid, u la ïohi ïa u nonglum khajna, u Lebi u khun jong u Alphaïos, ba u shong ha ka jaka treikam jong u. U Jisu u la ong ha u, “Bud ïa nga.” U Lebi u la ïeng joit bad u la bud ïa u.

15Hadien kata U Jisu u leit bam ha ka ïing u Lebi. Don bun ki nonglum khajna bad kiwei kiba la shah kyntait na ka imlang ka sahlang kiba ïabud ïa U Jisu, bad bun na ki, ki la ïadon bynta bad u lem bad ki synran jong u ha ka miej bam. 16Katto katne ngut na ki nonghikai ka Hukum, kiba long ki Pharisi, ki la ïohi ïa U Jisu ba u ïabam bad kine ki briew ba la shah kyntait lem bad ki nonglum khajna, kumta ki la kylli ïa ki synran jong u, “Balei ba u ïabam lang bad kum kine ki briew?”

17U Jisu u la ïohsngew ïa ki bad u la jubab, “Ki briew kiba khiah kim donkam ïa u nongpynkhiah, hynrei tang kito kiba pang. Ngam shym la wan ban khot ïa ki briew kiba donburom, hynrei ïa kiba la shah kyntait.”

Ka jingkylli shaphang ka jingshah jingit

(Mat. 9:14-17; Luk. 5:33-39)

18Ha kawei ka sien, ki nongbud jong u Ïoannis u Nongpynbaptis bad ki Pharisi ki dang ïashahjingit. Katto katne ngut ki briew ki la wan ha U Jisu bad kylli ïa u, “Balei ba ki synran jong u Ïoannis u Nongpynbaptis bad ki synran jong ki Pharisi ki shahjingit, katba ki jong me kim shahjingit?”

19U Jisu u la jubab, “Hato phi khmih lynti ba ki nongshahkhot sngewbha ha ka jingshongkurim ban leit khlem jingbam? Ym kumta! Katba u nongleitkurim u don ryngkat bad ki, kin ym shahthngan. 20Hynrei ka sngi kan poi haba ïa u nongleitkurim yn shim noh na ki, te kin sa shahjingit.

21“Ym don uno uno uba pyndonkam ïa ka lyngkhot jaiñ bathymmai ban syrdep ïa ka sopti barim, namar ka lyngkhot jaiñ bathymmai kan ran bad kan pynkad katto katne ïa ka jaiñ barim, kan pynlong wat ïa ka jingkad kaba kham heh. 22Lymne ym don uno uno uba theh ïa ka waiñ thymmai ha ki lwa snieh barim, namar ka waiñ kan pynpdang ïa ki snieh, bad baroh ar, ka waiñ bad ki snieh kin sniew noh. Hynrei, ïa ka waiñ thymmai dei ban theh ha ki lwa snieh bathymmai.”

Ka jingkylli shaphang ka Sabbaton

(Mat. 12:1-8; Luk. 6:1-5)

23 # Deut. 23:25 U Jisu u dang ïaid lyngba katto katne ki lyngkha kew ha ka sngi Sabbaton. Katba ki synran jong u ki dang ïa-ïaid ryngkat bad u, ki sdang ban khet ïa ki symboh kew. 24Kumta ki Pharisi ki la ong ha U Jisu, “Peit, ka long pyrshah ïa ka Hukum jong ngi ba ki synran jong me kin leh ïa kata ha ka sngi Sabbaton!”

25U Jisu u la jubab, “Hato phim ju pule ïa kaei kaba u Dabid u la leh ha kata ka por mynba u la donkam ei ei ban bam? Ma u bad ki rangbah kiba bad u ki la ïa-thngan, 26#Leb. 24:9#1 Sam. 21:1-6kumta u la rung shapoh ka Ïing U Blei bad bam ïa u kpu ba ainguh ha U Blei. Kane ka la long mynba u Abiathar u long u Rangbah Lyngdoh. Kat kum ka Hukum jong ngi tang ki lyngdoh ki lah ban bam ïa une u kpu — hynrei u Dabid u la bam ïa u bad u la ai ïa u wat ha ki rangbah kiba bad u.”

27Bad U Jisu u la pynkut, “Ïa ka Sabbaton la thaw na ka bynta ka jingbha u briew; ïa u briew ym shym la thaw na ka bynta ka Sabbaton. 28Kumta U Khun U Briew u long U Kynrad jong ka Sabbaton.”

Currently Selected:

MARKOS 2: KHACLBSI

Highlight

Copy