MARKOS 15

La wallam ïa U Jisu ha khmat u Pilat

(Mat. 27:1-2,11-14; Luk. 23:1-5; Ïoan. 18:28-38)

1Dang step eh ki rangbah lyngdoh ki la ïakynduh kyrkieh bad ki rangbah nongïalam, ki nonghikai jong ka Hukum, bad ïa ka Dorbar baroh kawei, bad ki la shna ïa ki jingthmu jong ki. Ki la teh kynjri ïa U Jisu, ki la ïalam noh ïa u, bad ki la aiti ïa u sha u Pilat. 2U Pilat u la kylli jingkylli ïa u, “Me long u syiem jong ki Jiw?”

U Jisu u la jubab, “Kumba me ong hi.”

3-4Ki rangbah lyngdoh ki la mudui ïa U Jisu shibun kiei kiei, kumta u Pilat u la kylli biang ïa u, “Hato men ym jubab? Sngap ïa ki jingmudui jong ki baroh!”

5U Jisu u la kyntait biang ban ong ei ei, bad u Pilat u la sngewlyngngoh.

La rai pynïap ïa U Jisu

(Mat. 27:15-26; Luk. 23:13-25; Ïoan. 18:39—19:16)

6Ha man ka Jingkhawai Niam Ka Jinglait, u Pilat kumba long ka rukom u ju pyllait ïa uno uno u koidi uba ki briew ki kwah. 7Ha kata ka por u briew uba kyrteng u Barabbas u don ha ka byndi bad ki nongïaleh pyrshah kiba la pynïap briew ha ki por jingïakhih paidbah. 8-9Haba u paidbah u la ïalum bad sdang ban kylli ïa u Pilat na ka bynta ka jingleh bakyrpang ba ju leh, u la kylli ïa ki, “Hato phi kwah ïa nga ban pyllait na ka bynta jong phi ïa u syiem jong ki Jiw?” 10U la tip bha ba ki rangbah lyngdoh ki la aiti ïa U Jisu ha u namar ki la sngewpihuiñ.

11Hynrei ki rangbah lyngdoh ki la pynkhih ïa u paidbah ban pan ba u Pilat un pyllait ïa u Barabbas na ka bynta jong ki. 12U Pilat u la kren biang ha u paidbah, “Kaei te, phi kwah ïa nga ban leh ïa uta uba phi khot u syiem jong ki Jiw?”

13Ki la pyrta kylla, “Sahnarphna ïa u!”

14“Hynrei kaei ka kam sniew kaba u la leh?” U Pilat u la kylli.

Ki la ïa-pyrta kham jam, “Sahnarphna ïa u!”

15U Pilat u la kwah ban pynsngewbha ïa u paidbah, kumta u la pyllait ïa u Barabbas na ka bynta jong ki. Nangta u la phah sympat ïa U Jisu bad aiti ïa u ban shah sahnarphna.

Ki shipai ki rkhiebeiñ ïa U Jisu

(Mat. 27:27-31; Ïoan. 19:2-3)

16Ki shipai ki la ïalam ïa U Jisu shapoh sha ka phyllaw jong ka ïingshong u lat bad ki la khot lang ïa baroh ki shipai ba dang sah jong ka kynhun. 17Ki la pynkup ïa ka jaiñkup basawbthuh ha U Jisu, ki la thaw ïa ka pansngiat na ki tnat ba don shiah, bad pynphong ïa ka ha ka khlieh jong u. 18Nangta ki la sdang ban khublei ïa u: “Im slem U Syiem ki Jiw!” 19Ki la shoh ïa u na ka khlieh da u dieng, ki la bynthiew ïa u, ki la dem khohsiew, bad ki la nguh ïa u. 20Haba ki la dep na kaba rkhiebeiñ ïa u, ki la law noh ïa ka jaiñkup basawbthuh bad ki la pynkup pat halor jong u da ki jaiñ jong u hi. Nangta ki ïalam noh ïa u ban sahnarphna.

La sahnarphna ïa U Jisu

(Mat. 27:32-44; Luk. 23:26-43; Ïoan. 19:17-27)

21 # Rom. 16:13 Ha lynti ki la ïakynduh ïa u briew uba kyrteng u Simon, uba dang wan sha ka nongbah na rudnong, bad ki shipai ki la pynbor ïa u ban bah ïa ka diengphna U Jisu. (U Simon u dei na Kyrini bad u la long u kpa jong u Aleksandar bad u Ruphos.) 22Ki la ïalam ïa U Jisu sha ka jaka ba la khot Golgotha, kaba mut “Ka jaka ka Maloi Khlieh.” 23Hangta ki la pyrshang ban ai ïa u ïa ka waiñ ba la khleh bad ka jingdih ba la khot ka mirr, hynrei U Jisu um dih ïa ka. 24#Salm. 22:18Nangta, ki la sahnarphna ïa u bad ki la ïabynta ïa ki jaiñ jong u hapdeng jong ki, da kaba ïakynting sbai ban khmih mano ban ïoh ïa kano ka bynta jong ka jaiñ. 25Ka la long khyndai baje mynstep mynba ki la sahnarphna ïa u. 26Ka jingthoh jong ka jingmudui pyrshah ïa u ka long: “U Syiem jong ki Jiw.” 27#Isa. 53:12Ki la sahnarphna ruh ïa ki ar ngut ki dakaid lem bad U Jisu, ïa uwei sha kamon bad ïa uwei pat sha kadiang jong u. 28Ha kane ka rukom la pynurlong ïa ka Jingthoh Bakhuid kaba ong, “U la don bynta ha ka kupar ki nongpalat.”

29 # Salm. 22:7; 109:25; Mrk. 14:58; Ïoan. 2:19 Ki briew kiba ïaid nangta ki la kyrngah ïa la ki khlieh bad krenbeiñ ïa U Jisu: “Ade! men pynjot ïa ka Templ bad tei pat ïa ka hapoh lai sngi! 30Mynta to hiar noh na ka diengphna bad to pynim ïa lade!”

31Ha kajuh ka rukom ki rangbah lyngdoh bad ki nonghikai ka Hukum ki la beiñ ïa U Jisu, da kaba ong para ma ki, “U la pynim ïa kiwei, hynrei um lah ban pynim ïa lade! 32To ngin ïakhmih ïa U Messaïah, u syiem ki Israel, un hiar na ka diengphna mynta, bad ngin ngeit ha u!”

Bad kita ki ar ngut kiba la shah sahnarphna bad U Jisu, ki la krenbeiñ ruh ïa u.

Ka jingïap U Jisu

(Mat. 27:45-56; Luk. 23:44-49; Ïoan. 19:28-30)

33Ha ka por shiteng sngi, ïa ka ri baroh kawei la tap da ka jingdum, kaba neh lai kynta. 34#Salm. 22:1Ha ka por lai baje U Jisu u la pyrta da ka sur kaba jam, “Eloi, Eloi, lema sabakhthani?” kaba mut, “A Blei jong nga, A Blei jong nga, balei ba me iehnoh ïa nga?”

35Katto katne ngut na ki briew hangta ki la ïohsngew ïa u bad ki la ong, “To sngap, u khot ïa u Elijah!” 36#Salm. 69:21Uwei na ki u la mareh bad u spoiñ ba la wieh ha ka waiñ bym bha, bad ba la teh ïa u ha tduh jong u dieng. Nangta u la rah shalor ha ki rmiang shyntur U Jisu bad u la ong, “To ap, ngin ïakhmih la u Elijah un wan ban pynhiar ïa u na ka diengphna!”

37Hadien ka jingpyrta kaba jam, U Jisu u la ïap.

38 # Eks. 26:31-33 Ka pyrda kaba wah ha ka Templ ka la kad arliang, naduh khlieh haduh tbian. 39U shipai rangbah uba ïeng hangta ha khmat ka diengphna u la ïohi kumno U Jisu u la ïap. “Une u briew u long shisha U Khun U Blei!” u la ong.

40 # Luk. 8:2,3 Katto katne ngut ki kynthei ki la don hangta, ki khmih na jngai. Napdeng jong ki, long ka Mari ka nong Magdala, ka Mari ka kmie jong u Jakob ba kham rit bad u Josis, bad ka Salome. 41Ki la lah bud ïa U Jisu mynba u don ha Galilaïa bad ïarap ïa u. Bun kiwei pat ki kynthei kiba la wan sha Jerusalem ryngkat bad u ki la ïadon ruh hangta.

Kaba tep ïa U Jisu

(Mat. 27:57-61; Luk. 23:50-56; Ïoan. 19:38-42)

42-43Ka la long janmiet haba u Joseph na Arimathaïa u la wan poi. U la long u riewdonburom jong ka Dorbar, uba ap ïa ka jingwan jong ka Hima U Blei. Ka la long ka sngi Pynkhreh (kata, ka sngi shuwa ka sngi Sabbaton), kumta u Joseph u la leit da ka jingshlur sha u Pilat bad pan na u ïa ka met U Jisu. 44U Pilat u la sngewlyngngoh ban ïohsngew ba U Jisu u la lah ïap. U la khot ïa u rangbah shipai bad u la kylli ïa u la U Jisu u la lah ïap la slem. 45Hadien ba u la ïohsngew ïa ka jingïathuh u rangbah shipai, u Pilat u la ong ïa u Joseph ba u lah ban shim ïa ka met. 46U Joseph u la thied ïa ka jaiñ linen, u la pynhiar ïa ka met shapoh, u la sop ïa ka da ka jaiñ, bad u la buh ïa ka ha ka jingtep ïa kaba la lah tih ha u mawsiang. Nangta u pyntyllun ïa u maw uba heh ha ka jaka rung jong ka jingtep. 47Ka Mari ka nong Magdala bad ka Mari ka kmie u Josis ki la khmih bad ïohi hangno ba la buh ïa ka met U Jisu.

Currently Selected:

MARKOS 15: KHACLBSI

Highlight

Copy