MARKOS 16

Ka jingmihpat

(Mat. 28:1-8; Luk. 24:1-12; Ïoan. 20:1-10)

1Hadien ba ka sngi Sabbaton ka la kut, ka Mari ka nong Magdala, ka Mari ka kmie u Jakob, bad ka Salome ki la thied ki musla ban leit pynsleh ïa ka met U Jisu. 2Dang step eh ha ka Sngi U Trai, hamar ba dang shu mih ka sngi, ki la leit sha ka jingtep. 3-4Ha lynti ki la ïa-ong para ma ki, “Uei u ban pyntyllun na ka bynta jong ngi ïa u maw na ka jingkhang ban rung sha ka jingtep?” (U la long u maw uba heh shibun.) Te ki la khmih bad ki la ïohi ba ïa u maw la lah pyntyllun noh. 5Kumta ki la rung shapoh ka jingtep, ha kaba ki la ïohi ïa u samla uba shong ha ka liang kamon uba phong da ka jaiñkup balieh — bad ki la sheptieng.

6“Wat sheptieng,” u la ong. “Nga tip ba phi ïawad ïa U Jisu uba na Nasareth, ïa uba la sahnarphna. Um don hangne — u la mihpat! Ha khmih, hangne ka jaka ha kaba ki la buh ïa u. 7#Mat. 26:32; Mrk. 14:28Mynta to leit bad ai ïa kane ka khubor sha ki synran jong u, kynthup ïa u Petros: ‘Un leit sha Galilaïa ha shuwa jong phi; hangta phin ïohi ïa u, kumba u la ong ha phi.’ ”

8Kumta ki la leit noh bad mareh na ka jingtep, ki da sngewkhuslai bad sngewshyrkhei. Kim shym la ïathuh ei ei hano hano ruh, namar ki la sheptieng.

U Jisu u mihpaw ha ka Mari ka nong Magdala

(Mat. 28:9-10; Ïoan. 20:11-18)

[9Hadien ba U Jisu u la mihpat na ka jingïap dang step phyrngab ha ka Sngi U Trai, u la mihpaw nyngkong ha ka Mari ka nong Magdala, na kaba u la pynmih noh ïa ki hynñiew tylli ki ksuid. 10-11Ka la leit bad ïathuh ïa ki nongbud jong u. Ki dang ïasngewsih bad ïam; bad haba ki la ïohsngew ïa ka, ba ka ong ba U Jisu u im bad ba ka la lah ïohi ïa u, kim shym la ngeit ïa ka.

U Jisu u la mihpaw ha ki ar ngut ki synran

(Luk. 24:13-35)

12Hadien kane, U Jisu u la mihpaw ha kawei pat ka rukom ha ki ar ngut na ki katba ki dang ïa-ïaid lynti sha la shnong. 13Ki la wan phai bad ki la ïathuh ha kiwei pat, hynrei kim shym la ngeit ïa kata.

U Jisu u mihpaw ha ki khatwei ngut

(Mat. 28:16-20; Luk. 24:36-49; Ïoan. 20:19-23; Ki Kam. 1:6-8)

14Khatduh eh, U Jisu u la mihpaw ha ki khatwei ngut ki synran katba ki dang ïabam. U la kren tyngeh ïa ki, namar kim shym la don jingngeit bad namar ka jingmutlop palat ïa ka ban ngeit ïa kito kiba la lah ïohi ïa u ba u im. 15#Ki Kam. 1:8U la ong ïa ki, “Leit sha ka pyrthei baroh kawei bad ïalap ïa ka Gospel sha ki jaitbynriew baroh. 16Ïa uno uno uba ngeit bad uba shah pynbaptis, yn pynim; ïa uno uno u bymngeit, yn pynrem. 17Ïa kiba ngeit yn ai ka bor ban leh ïa ki kambah: Kin beh noh ïa ki ksuid ha ka kyrteng jong nga; kin kren ha ki thylliej kiba pher; 18lada ki shim ïa ki bseiñ lane dih kano kano ka bih, kin ym mynsaw; kin buh ïa la ki kti ha kiba pang, ki ban ïoh ka jingkhiah.”

Ïa U Jisu la shim noh sha bneng

(Luk. 24:50-53; Ki Kam. 1:9-11)

19 # Ki Kam. 1:9-11 Hadien ba U Trai Jisu u la lah kren bad ki, ïa u la shim noh sha bneng bad u la shong ha ka liang kamon jong U Blei. 20Ki synran ki la leit bad ïalap kylleng, bad U Trai u la trei lem bad pynshisha ba ka jingïalap jong ki ka la long kaba shisha da ki kambah kiba ki la leh.]#16:20 Ki Dkhot 9 haduh 20 ha kane ka lynnong: Kane ka dei ka jingpynkut kaba jrong kaba don ha ki katto katne ki manuscript bad ki translation kiba kham rim. Don kiwei pat ki manuscript kiba don ka jingpynkut kaba lyngkot kaba ïapher. Ki kyntien kiba don ha kata ka jingpynkut kaba lyngkot ki long 9 Ki kynthei ki la leit sha u Petros bad ki paralok jong u bad ki la ïathuh lyngkot ïa baroh ba la ong ha ki. 10 Hadien kane, U Jisu hi da lade u la phah lyngba ki synran na mihngi sha sepngi ïa ka khubor jong ka jingpynim bymjukut kaba kyntang bad kaba ïai im.

Currently Selected:

MARKOS 16: KHACLBSI

Highlight

Copy