MATTHAÏOS 6

Ka jinghikai shaphang ka jinglehisynei

1 # Mat. 23:5 “Da pynthikna ba phin ym leh ïa ki kam niam jong phi ha kaba paw khnang ba ki briew kin ïohi ïa kaei kaba phi leh. Lada phi leh ïa kine kiei kiei ha kaba paw, phin ym ïoh kano kano ka nong na U Kpa jong phi uba ha bneng.

2“Kumta haba phi ai ei ei ha u briew uba kyrduh, wat pynsawa jam ïa ka, kumba ki riewarsap ki leh ha ki synagog bad ha ki lynti bah. Ki leh ïa ka khnang ba ki briew kin ïaroh ïa ki. Nga pynthikna ïa phi, ba ki la da ïoh ka jingsiew ba-pura. 3Hynrei haba phi ïarap ïa u briew uba kyrduh, leh ïa ka ha kata ka rukom ba wat u paralok bajan tam jong phi un ym tip shaphang kata. 4Te kan long ka kam kaba rieh. Bad U Kpa jong phi, uba ïohi ïa kaei kaba phi leh ha kaba rieh, un ainong ïa phi.

Ka jinghikai shaphang ka jingduwai

(Luk. 11:2-4)

5 # Luk. 18:10-14 “Haba phi duwai, wat long kum ki riewarsap! Ki ieit ban ïeng bad duwai ha ki synagog bad ha ki kyndong surok, khnang ba baroh kin ïohi ïa ki. Nga pynthikna ïa phi, ki la ïoh lypa ïa ka jingsiew kaba pura. 6Hynrei haba phi duwai, to leit sha ka kamra jong phi, khang ïa ka jingkhang, bad duwai sha U Kpa jong phi, ïa uba ym lah ban ïohi. Bad U Kpa jong phi, uba ïohi ïa kaei kaba phi leh ha kaba rieh, un ainong ïa phi.

7“Haba phi duwai, wat pyndonkam bun ki kyntien bym kit jingmut, kumba ki nongmane blei thala ki leh, kiba pyrkhat ba ki blei jong ki kin ïohsngew ïa ki namar ba ki jingduwai jong ki, ki long kiba jlan. 8Wat long kum ma ki. U Kpa jong phi u da tip lypa ïa kaei kaba phi donkam ha shuwa ba phin pan na u. 9Kane keiñ, ka long kumno phi dei ban duwai:

“ ‘Ko Kpa jong ngi uba ha bneng:

Ai ba ka kyrteng bakhuid jong me kan long kaba la pyndonburom;

10ai ba ka Hima jong me kan wan;

ai ba ka mon jong me yn leh ha ka khyndew kumba ka long ha bneng.

11To ai ha ngi mynta ka jingbam kaba ngi donkam.

12To map ïa ngi ïa ki jingpalat kiba ngi la leh,

kumba ngi map ïa ki jingpalat kiba kiwei ki la leh ïa ngi.

13Wat ïalam ïa ngi sha ka jingtynjuh kaba eh,

hynrei sumar ïada ïa ngi na Uba Sniew.

Naba ka jong me long ka hima, bad ka bor,

bad ka burom junom. Amen.’

14 # Mrk. 11:25,26 “Namar lada phi map ïa kiwei ïa ki jingpalat kiba ki la leh ïa phi, U Kpa jong phi uba ha bneng un map ruh ïa phi. 15Hynrei lada phim map ïa kiwei, te U Kpa jong phi un ym map ïa ki jingpalat kiba phi la leh.

Ka jinghikai shaphang ka jingshah jingit

16“Bad haba phi shahjingit, wat leh 'mat sngewsih kumba ki riewarsap ki leh. Kim kheiñ ïa kaba paw shabar jong ki khnang ba baroh kin ïohi ba ki shahjingit. Nga pynthikna ïa phi, ki la ïoh lypa ïa ka jingsiew kaba pura. 17Haba phi leit khlem bam ei ei, bta ïa ka khmat jong phi bad sad ïa u shñiuh jong phi, 18khnang ba kiwei kin ym tip ba phi shahjingit — tang U Kpa jong phi, ïa uba ym lah ban ïohi, un tip. Bad U Kpa jong phi, uba ïohi ïa kaei kaba phi leh ha kaba rieh, un ainong ïa phi.

Ka spah ha bneng

(Luk. 12:33-34)

19 # Jak. 5:2,3 “Wat kynshew spah na ka bynta ïa lade hangne ha ka pyrthei, ha kaba ki khñiang bad ka sarang ki pynjot, bad ki nongtuh ki prong bad ki tuh. 20Hynrei, to kynshew spah na ka bynta ïa lade ha bneng, ha kaba ki khñiang bad ka sarang kim lah ban pynjot, bad ki nongtuh kim lah ban prong bad tuh. 21Namar ba ka dohnud jong phi kan ïai don ha ka jaka kaba don ka spah jong phi.

Ka jingshai jong ka met

(Luk. 11:34-36)

22“Ki khmat ki long kum ka sharak ïa ka met. Lada ki khmat jong phi ki bha, ka met jong phi baroh kawei kan dap da ka jingshai; 23hynrei lada ki khmat jong phi kim long kiba bha, ka met jong phi kan don ha ka jingdum. Kumta lada ka jingshai hapoh jong phi ka long ka jingdum, katno kan long ka jingdum kaba shyrkhei eh!

U Blei bad ki jingdon jingem

(Luk. 16:13; 12:22-31)

24“Ym don uba lah ban long u mraw jong ar ngut ki kynrad; un isih ïa uwei bad ieit ïa uwei pat; un long uba kohnguh ïa uwei bad ñiewbeiñ ïa uwei pat. Phim lah ban shakri ïa baroh ar, ïa U Blei bad ïa ka pisa.

25“Dei kane keiñ balei nga ong ïa phi ban ym khuslai shaphang ka jingbam bad ka jingdih kaba phi donkam ban im, lane shaphang ki jaiñ na ka bynta ka met jong phi. Nalor baroh, hato ka jingim kam kham kor shibun ban ïa ki jingbam? Hato ka met kam kham kor ban ïa ki jaiñ? 26Khmih ïa ki sim: kim bet symbai, kim ïalum ïa ka jingot bad buh ïa ka ha ki thiar; pynban U Kpa jong phi uba ha bneng u sumar sukher ïa ki! Hato phim kam kor shibun ban ïa ki sim? 27Hato uno uno na phi u lah ban im kham slem da kaba u khuslai shaphang jong ka?

28“Bad balei phi khuslai shaphang ki jaiñ? Khmih kumno ki 'tiewkhlaw ki san: kim trei lane thain jaiñ na ka bynta ïa lade. 29#1 Syiem. 10:4-7; 2 Khrn. 9:3-6Hynrei nga ong ha phi ba wat u syiem Solomon lem bad ka spah jong u baroh um shym la don ki jaiñ kiba itynnat kum uwei na kine ki syntiew. 30U long U Blei uba pynkup ïa u phlang khlaw — u phlang uba don hangne mynta bad u bym don shuh lashai, uba la thang duh ha ka lawar ding. Hato un ym da la kham leh thikna ban pynkup jaiñ ïa phi? Katno kaba rit ka jingngeit phi don!

31“Kumta wat khuslai: ‘Nangno ka jingbam jong nga kan wan? lane ka jingdih jong nga? lane ki jaiñ jong nga?’ 32(Kine ki long kiei kiei kiba ki nongmane blei thala ki ju ïai pyrkhat borabor.) U Kpa jong phi uba ha bneng u tip ba phi donkam ïa kine kiei kiei baroh. 33Hynrei, to pyrkhat nalor kiei kiei baroh ïa ka Hima U Blei bad ïa kaei kaba u dawa na phi, bad un pyndap ïa phi da kine kiei kiei baroh. 34Kumta wat khuslai ïa kaba lashai; kan don bun ki jingkhuslai ki jong ka hi. Ym donkam ban kynton halor ki jingjynjar ba kawei pa kawei ka sngi ka wallam.

Currently Selected:

MATTHAÏOS 6: KHACLBSI

Highlight

Copy