MATTHAÏOS 25

Ka pharshi ki shiphew ngut ki theisotti

1 # Luk. 12:35 “Ha kata ka por ka Hima ki bneng kan long kumne. Shisien la don shiphew ngut ki theisotti kiba la rah ïa la ki sharak bad ki la mih ban ïashem ïa u nongleitkurim. 2San ngut na ki, ki la long kiba bieit, bad san ngut kiwei pat ki la long kiba stad. 3Kita kiba bieit ki la rah ïa la ki sharak hynrei kim shym la rah tam ïa ka umphniang bad ki, 4katba kita kiba stad ki la rah ïa la ki jingdiang ba la pyndap da ka umphniang na ka bynta ki sharak jong ki. 5U nongleitkurim u la slem ban wan, kumta ki theisotti ki la sdang ban kohnguh samthiah.

6“Ka la da shiteng synñia haba ka jingpyrta ka la sawa jam, ‘U nongleitkurim u la don hangne! To wan bad ïashem ïa u!’ 7Ki shiphew ngut ki theisotti ki la khie joit bad ki la pynkhreh ïa la ki sharak. 8Nangta kita kiba bieit ki la ong ha kiba stad, ‘Ai lem ha ngi ïa ka umphniang jong phi, namar ki sharak jong ngi ki la jan lip.’ 9‘Em,’ kiba stad ki la jubab, ‘kam don shibun ban dap ïa phi bad ïa ngi ruh. Khie leit sha dukan bad thied khyndiat na ka bynta ïa lade.’ 10Kumta ki theisotti kiba bieit ki la ïaleit ban thied khyndiat ka umphniang; bad katba ki dang leit, la wan poi u nongleitkurim. Ki san ngut kiba la pynkhreh ki la ïaleit shapoh lem bad u sha ka jingkhawai shongkurim, bad ïa ka jingkhang la khang.

11 # Luk. 13:25 “Hadien la wan poi kita kiwei pat ki theisotti. ‘Ko kynrad, ko Kynrad! to plie ïa ngi!’ ki la pyrta jam. 12‘Da lei lei ruh em! ngam ithuh ïa phi,’ u nongleitkurim u la jubab.”

13Bad U Jisu u la pynkut, “To sumar bha, te, namar ba phim tip ïa ka sngi lane ïa ka kynta.”

Ka pharshi ki lai ngut ki shakri

(Luk. 19:11-27)

14 # Luk. 19:11-27 “Ha kata ka por ka Hima ki bneng kan long kumne. Shisien la don u briew u ban sa leit jingleit; u la khot ïa ki shakri jong u bad u la buh ïa ki ban khmih ïa ka jingdon jingem jong u. 15U la ai ha uwei pa uwei kat kum ka jinglah jong u: Ha uwei u la ai san hajar tylli ki sbai ksiar, ha uwei pat u la ai ar hajar tylli, bad ha uwei pat u la ai shihajar tylli. Nangta u la mih ban leit jingleit. 16U shakri uba la ïohpdiang san hajar tylli ki sbai u la leit shisyndon bad u la khaïi ïa la ka pisa bad u la ïohnong sa san hajar. 17Ha kajuh ka rukom u shakri uba la ïohpdiang ar hajar tylli ki sbai u la ïohnong sa ar hajar. 18Hynrei u shakri uba la ïohpdiang shihajar tylli ki sbai u la leit noh, u la tih ka thliew ha ka khyndew, bad u la buhrieh ïa ka pisa jong u kynrad jong u.

19“Hadien ka por kaba jlan u kynrad jong kito ki shakri u la wan pat bad u la pan jingkheiñ na ki. 20U shakri uba la ïohpdiang san hajar tylli ki sbai u la wan rung bad u la ai ïa kiwei ki san hajar. ‘Ko kynrad, me la ai ha nga san hajar tylli ki sbai,’ u la ong. ‘Ha khmih! Kine hangne sa san hajar tylli kiba nga la ïohnong.’ 21‘Me la leh ïa kaba bha tam, me u shakri uba bha bad uba lah ban shaniah!’ la ong u kynrad jong u. ‘Me la long uba lah ban shaniah ha kaba pynïaid ïa kaba khyndiat, kumta ngan buh ïa me ban khmih ïa kaba kham bun. To wan rung shapoh bad ïoh bynta lem na ka jingkmen jong nga!’

22“Nangta u shakri uba la ïohpdiang ar hajar tylli ki sbai u la wan rung bad u la ong, ‘Ko kynrad, me la ai ha nga ar hajar tylli ki sbai. Ha khmih! Kine hangne sa ar hajar tylli kiba nga la ïohnong.’ 23‘Me la leh ïa kaba bha tam, me u shakri uba bha bad uba lah ban shaniah!’ la ong u kynrad jong u. ‘Me la long uba lah ban shaniah ha kaba pynïaid ïa kaba khyndiat, kumta ngan buh ïa me ban khmih ïa kaba kham bun. To wan rung shapoh bad ïoh bynta lem na ka jingkmen jong nga!’

24“Nangta u shakri uba la ïohpdiang shihajar tylli ki sbai u la wan rung bad u la ong, ‘Ko kynrad, nga tip ba me long u briew uba eh; me ot ïa ki jingot na kaba mem shym la bet, bad me lum ïa ki jingthung na kaba mem shym la bet symbai. 25Nga la sheptieng, kumta nga la leit bad buhrieh ïa ka pisa jong me ha ka khyndew. Ha khmih! Kane hangne ka long kaba dei ka jong me.’

26“ ‘Me u shakri uba sniew bad uba jaipdeh!’ u kynrad jong u, u la ong. ‘Me la tip, ym dei, ba nga ot ïa ki jingot na kaba ngam shym bet, bad lum ïa ki jingthung na kaba ngam shym bet symbai? 27Kumta, te, me la dei ban thep ïa ka pisa jong nga ha ka jaka kynshew pisa, bad ngan jin da la ïohpdiang ïa ka baroh lem bad ka sut haba nga la wan phai. 28Mynta, to shim noh ïa ka pisa na u bad ai ïa ka ha uta uba la don shiphew hajar tylli ki sbai. 29#Mat. 13:12; Mrk. 4:25; Luk. 8:18Naba ïa uwei pa uwei u briew uba don ei ei, yn sa ai kham bun, bad un don kyrhai; hynrei ha u briew u bym don ei ei, wat ïa kaba khyndiat kaba u don yn shim noh na u. 30#Mat. 8:12; 22:13; Luk. 13:28Kumta ïa une u shakri bymmyntoi — bret ïa u shabar ha kaba dum; hangta un lynñiar bad kyr-iat la ki bniat.’ ”

Ka jingbishar bakhatduh

31 # Mat. 16:27; Mat. 19:28 “Haba U Khun U Briew un wan kum u Syiem bad ki angel baroh lem bad u, un shong halor ka khet syiem jong u, 32bad ïa ki briew jong ki jaitbynriew baroh yn lumlang ha khmat jong u. Nangta un phiah ïa ki ha ki ar kynhun, kumba u nongaplangbrot u pynïakhlad ïa ki langbrot na ki blang. 33Un buh ïa ki briew kiba hok sha ka liang kamon jong u bad ïa kiwei pat sha ka liang kadiang jong u. 34Nangta u Syiem un ong ha ki briew kiba ha ka liang kamon jong u, ‘To wan, phi kiba la kyrkhu da U Kpa jong nga! To wan bad to ïoh ïa ka hima kaba la pynkhreh na ka bynta jong phi naduh kaba pynlong ïa ka pyrthei. 35Nga la thngan bad phi la bsa ïa nga, nga la sliang bad phi la ai jingdih ïa nga; nga la long u nongwei bad phi la pdiang sngewbha ïa nga ha ki ïing jong phi, 36nga la lyngkhuit bad phi la pynkup jaiñ ïa nga; nga la pang bad phi la shim ban sumar ïa nga, nga la don ha ïingbyndi bad phi la wan jngoh ïa nga.’

37“Nangta kiba hok kin jubab ïa u, ‘Mynno, ko Trai, ba ngi la ju ïohi ïa me ba me thngan bad ba ngi bsa ïa me, lane ba me sliang bad ba ngi ai jingdih ïa me? 38Mynno ngi la ju ïohi ïa me ba me long u nongwei, bad ba ngi pdiang sngewbha ïa me ha ki ïing jong ngi, lane ba me lyngkhuit bad ba ngi pynkup jaiñ ïa me? 39Mynno ngi la ju ïohi ïa me ba me pang lane ba me don ha ka ïingbyndi, bad ba ngi wan jngoh ïa me?’ 40U Syiem un jubab, ‘Nga ong ha phi, ba man ba phi leh ïa kane na ka bynta uno uno uba rit tam na kine ki dkhot jong ka longïing jong nga, phi la leh ïa kane na ka bynta jong nga!’

41“Nangta un ong ha kito kiba ha ka liang kadiang jong u, ‘Khie leit noh na nga, phi kiba hapoh ka jingtim jong U Blei! Khie leit noh sha ka ding bymjukut ïa kaba la pynkhreh na ka bynta u Ksuid bad ki angel jong u! 42Nga la thngan, hynrei phim shym bsa ïa nga, nga la sliang, hynrei phim shym ai jingdih ïa nga; 43nga la long u nongwei, hynrei phim shym la pdiang sngewbha ïa nga ha ki ïing jong phi, nga la lyngkhuit, hynrei phim shym la pynkup jaiñ ïa nga; nga la pang bad nga la don ha ïingbyndi, hynrei phim shym la sumar ïa nga.’

44“Nangta kin jubab ïa u, ‘Mynno, ko Trai, ba ngi la ju ïohi ba me thngan lane sliang lane ba me long u nongwei lane ba me la lyngkhuit lane ba me pang lane hapoh ka ïingbyndi, bad ba ngim shym la ïarap ïa me?’ 45U Syiem un jubab, ‘Nga ong ha phi, ha man ba phi kyntait ban ïarap ïa iwei na kine kiba rit tam, phi kyntait ban ïarap ïa nga.’ 46#Dan. 12:2Te, ïa kine, yn phah noh sha ka jingpynshitom bymjukut, hynrei kiba hok kin leit sha ka jingim bymjukut.”

Currently Selected:

MATTHAÏOS 25: KHACLBSI

Highlight

Copy