LOUKAS 16

U sordar uba sianti

1U Jisu u la ong ha la ki synran, “La don shisien uwei u briew uba riewspah uba la don u shakri uba pynïaid ïa ka jingdon jingem jong u. La ïathuh ha une u briew bariewspah ba u sordar jong u, u la pynsep-ei ïa ka pisa u kynrad jong u, 2kumta u la khot shapoh ïa u bad u la ong, ‘Kaei kane kaba nga ïohsngew shaphang jong me? To ai ha nga ïa ka jingkheiñ kaba pura ïa ka jingpynïaid jong me ïa ka jingdon jingem jong nga, namar men ym lah shuh ban long u sordar jong nga.’ 3U shakri u la ong ha lade, ‘U Kynrad jong nga un sa beh ïa nga na ka kam jong nga. Kaei ba ngan leh? Ngam long uba khlaiñ ban tih kharai, bad nga sngewlehrain ban khrong. 4Mynta nga tip kaei ba ngan leh! Te haba ka kam jong nga ka duh noh, ngan don ki paralok ki ban pdiang sngewbha ïa nga ha ki ïing jong ki.’

5“Kumta u la khot shapoh ïa ki briew baroh kiba shahram ha u kynrad jong u. U la ong ïa uba nyngkong, ‘Sa katno phi dei ban pynphai ïa u kynrad jong nga?’ 6‘Shispah pipa ka umphniang Olib,’ u la jubab. ‘Kane ka long ka jingkheiñ jong phi,’ u sordar u la ong ha u; ‘to shong bad thoh sanphew.’ 7Nangta u la kylli ïa uwei pat, ‘Bad ma phi — sa katno phi dei ban pynphai? Shihajar byrni u kew,’ u la jubab. ‘Kane hangne ka long ka jingkheiñ jong phi,’ u sordar u la ong ïa u; ‘to thoh phraspah.’

8“Kaba mih ka long ba u trai jong une u sordar bymhok u la ïaroh ïa u ba u leh ïa kaba kum kane kaba sianti; namar ki briew jong kane ka pyrthei ki long kiba kham sianti ha kaba trei ïa la ki kam ban ïa ki briew kiba long ki jong ka jingshai.”

9Bad U Jisu u ïai bteng ban ong, “Bad kumta nga ong ha phi: Pynlong paralok na ka bynta ïa lade da ka spah ba kynja pyrthei, khnang ba haba kam don shuh, yn pdiang sngewbha ïa phi sha ka ïing bymjukut. 10Uno uno ïa uba lah ban shaniah ha kiei kiei kiba rit un long uba lah ban shaniah ha kiba kham khraw; uno uno uba leh bymhok ha kiei kiei kiba rit un long u bymhok ha kiba kham khraw. 11Te lada ym pat lah ban shaniah ïa phi ha kaba pynïaid ïa ka spah pyrthei, kumno yn shaniah ha phi ïa ka spah bashisha? 12Bad lada phim long uba lah ban shaniah ha kaei kaba dei ka jong uwei pat, mano ban ai ha phi ïa kaba dei ka jong phi?

13 # Mat. 6:24 “Ym don u shakri uba lah ban long u mraw jong ki ar ngut ki kynrad; un isih ïa uwei bad un ieit ïa uwei pat; un kohnguh ïa uwei bad un ñiewbeiñ ïa uwei pat. Phim lah ban shakri ïa U Blei bad ïa ka spah.”

Katto katne ki jingkren jong U Jisu

(Mat. 11:12-13; 5:31-32; Mrk. 10:11-12)

14Haba ki Pharisi ki la ïohsngew ïa kane baroh, ki la rkhiebeiñ ïa U Jisu, namar ba ki ieit ïa ka pisa. 15U Jisu u la ong ha ki, “Phi long kita kiba pynlong ïa lade ban ibiang ha ka jingkhmih jong kiwei ki briew, hynrei U Blei u tip ïa ka dohnud jong phi. Naba kiei kiei baroh ïa kiba la ñiewkordor shikatdei eh da u briew, ki long ki bymdondor ei ei ruh em ha ka jingkhmih U Blei.

16 # Mat. 11:12,13 “Ka Hukum u Moses bad ki jingthoh jong ki nongïathuhlypa ki treikam haduh ka por jong u Ïoannis u Nongpynbaptis; naduh kata ïa ka Khubor Babha shaphang ka Hima U Blei la ïai ïathuh, bad uwei pa uwei u bsut jubor shapoh. 17#Mat. 5:18Hynrei ka kham jem ïa ka bneng bad ka pyrthei ban jah noh ban ïa kaba iehnoh ïa ka bynta kaba rit tam jong ka Hukum.

18 # Mat. 5:32; 1 Kor. 7:10,11 “Uno uno u briew uba pyllait noh ïa ka tnga jong u bad shongkurim ïa kawei pat ka briew u klim; bad u briew uba shongkurim ïa ka briew kaba la shah pyllait tnga u klim.

U riewspah bad u Lasaros

19“La don shisien uwei u briew uba riewspah uba la riam ha ki jaiñ kiba remdor eh bad uba im ha ka jingpahuh bakhraw man la ka sngi. 20La don ruh u briew uba duk uba kyrteng, u Lasaros, uba la dap da ki prum, ïa uba la ju wallam sha ka jingkhang jong u briew uba riewspah, 21da ka jingkyrmen ban bam ïa ki lyngkhot jingbam kiba hap na ka miej jong u riewspah. Wat ki ksew ki ju wan bad jliah ïa ki prum jong u.

22“U briew uba duk u la ïap bad la bah da ki angel ban shong hajan u Abraham ha ka jingkhawai ha bneng. U riewspah u la ïap bad la tep, 23bad ha Hades, ha kaba u la don ha ka jingshitom bakhraw, u la khmih shajrong bad u la ïohi ïa u Abraham, sha jngai bah, bad ïa u Lasaros ha syndah jong u. 24Kumta u la pyrta, ‘Ko Kpa Abraham! To sngewsynei ïa nga, bad phah ïa u Lasaros ban wieh ïa ka shynriah'ti jong u ha ka um khyndiat bad pyntngen ïa u thylliej jong nga, namar nga don ha ka jingshitom bakhraw ha kane ka ding!’

25“Hynrei, u Abraham u la ong, ‘To kynmaw, ko khun jong nga, ba ha ka por ka jingim jong me la ai ha me ïa baroh kiei kiei kiba bha, katba u Lasaros u la ïohpdiang ïa kiei kiei baroh kiba sniew. Hynrei mynta u lehkmen ïa lade hangne, katba me don ha ka jingshitom. 26Nalor kata baroh, ka don ka kharai kaba jylliew hapdeng jong ngi, khnang ba kito kiba kwah ban jam sha shiliang nangne sha me kim lah ban leh kumta, lymne uno uno un lah ban jam sha shiliang sha ngi na ka jaka kaba me don.’ 27Uta u riewspah u la ong, ‘Kumta nga kyrpad ïa me, ko kpa Abraham, to phah ïa u Lasaros sha ka ïing u kpa jong nga, ha kaba nga don san ngut ki hynmen ki para shynrang. 28Shah ïa u ban leit bad maham ïa ki, khnang ba ma ki, la kumno kumno, kin ym wan sha kane ka jaka ka jingshitom.’

29“U Abraham u la ong, ‘Ki hynmen ki para shynrang jong me ki don u Moses bad ki nongïathuhlypa ban maham ïa ki; ki hynmen ki para shynrang jong me ki dei ban shahshkor ïa kaei kaba ki ong.’ 30U riewspah u la jubab, ‘Kata kam pat biang, ko kpa Abraham! Hynrei lada uno uno u mihpat na ka jingïap bad leit sha ki, te kin phai noh na ki pop jong ki.’ 31Hynrei u Abraham u la ong, ‘Lada kim shahshkor ïa u Moses bad ïa ki nongïathuhlypa, yn ym lah ban pynngeit ïa ki wat lada uno uno un mihpat na ka jingïap.’ ”

Currently Selected:

LOUKAS 16: KHACLBSI

Highlight

Copy