LOUKAS 15

Ka langbrot ba la jah

(Mat. 18:12-14)

1 # Luk. 5:29,30 Ha kawei ka sngi mynba ki nonglum khajna bad kiwei kiba la shah kyntait ki la wan ban shahshkor ïa U Jisu, 2ki Pharisi bad ki nonghikai ka Hukum ki la sdang ban khñium, “Une u briew u pdiang sngewbha ïa kiba shah kyntait bad u da ïabam lem bad ki!” 3Kumta U Jisu u la ïathuh ha ki ïa kane ka pharshi:

4“Tharai uwei na phi u don shispah tylli ki langbrot bad u duh noh kawei na ki — kaei kaba un leh? U ieh ïa kiwei ki khyndaiphew khyndai tylli ki langbrot ha ka jaka bam phlang bad u leit ban wad ïa kata kaba la sakma haduh ba un da shem ïa ka. 5Haba u la shem ïa ka, u kmen haduh katta katta ba u buh ïa ka halor ki tyrpeng jong u bad bah pat ïa ka sha ïing. 6Nangta u khot lang ïa ki paralok bad ïa ki paramarjan jong u bad u ong ha ki, ‘Nga kmen haduh katta katta ba nga la shem ïa ka langbrot jong nga kaba la jah. To ngin ïalehkmen!’ 7Ha kajuh ka rukom, nga ong ha phi, kan don ka jingkmen kaba kham bun ha bneng halor uwei u nongpop uba kylla-kaba-mut ban ïa ki khyndaiphew khyndai ki briew badonburom ki bymdonkam ban kylla-kaba-mut.

Ka pisa ba la jah

8“Lane tharai kawei ka briew kaba don shiphew tylli ki sbai rupa ka duh noh kawei na ki — kaei ba kan leh? Ka thang ïa ka sharak, ka sar ïa la ka ïing, bad ka khmih biang biang kylleng kylleng haduh ba kan da shem ïa ka. 9Haba ka shem ïa ka, ka khot lang ïa ki paralok bad ïa ki paramarjan jong ka, bad ka ong ha ki, ‘Nga kmen haduh katta katta ba nga la shem ïa ka pisa kaba nga la jah. To ngin ïalehkmen!’ 10Ha kajuh ka rukom, nga ong ha phi, ki angel jong U Blei ki risa halor uwei u nongpop uba kylla-kaba-mut.”

U khun ba la jah

11U Jisu u la bteng ban ong, “La don shisien uwei u briew uba la don ar ngut ki khun shynrang. 12Uba kham rit u la ong ha u, ‘Ko pa to ai mynta ha nga ïa ka bhah jong nga na ka jingdon jingem.’ Kumta uta u briew, u la pynbynta ïa ka jingdon jingem jong u hapdeng ki ar ngut ki khun shynrang jong u. 13Hadien khyndiat sngi, u khun ba kham rit u la die ïa ka bynta jong ka jingdon jingem jong u bad u la mihnoh na ïing lem bad ka pisa. U la leit sha ka ri kaba jngai, ha kaba u la pynsyrwa ei ïa ka pisa jong u ha ka jingim ba-thurmur. 14U la pynlut ïa kaei kaei baroh kaba u don. Nangta ka 'nemsniew kaba jur ka la saphriang kylleng jong kata ka ri, bad um don ei ei shuh. 15Kumta u la leit ban trei na ka bynta uwei na ki traishnong jong kata ka ri, uba la phah ïa u sha ka jaka ri jingri jong u ban sumar ïa ki sniang. 16U la kwah ban pynkdang ïa lade da ki jingbam ba bam ki sniang, hynrei ym don mano mano ba ai ei ei ïa u ban bam. 17Ha kaba khatduh u la kyndit bynriew bad u la ong, ‘Baroh ki nongtrei wai jong i pa jong nga ki don kyrhai ban ïa kaba ki lah ban bam, bad nga pat hangne ngan sa ïapthngan! 18Ngan ïeng joit bad leit sha i pa jong nga bad ong, “Ko pa, nga la leh pop pyrshah ïa U Blei bad pyrshah ïa phi. 19Ngam long uba dei ba yn khot u khun jong phi; to ñiew ïa nga tang kum uwei na ki nongtrei wai jong phi.” 20Kumta u la ïeng joit bad u la leit phai pat sha la u kpa.

“U dang kham pajih ha ka lynti na ïing haba u kpa jong u, u la ïohi ïa u; ka dohnud jong u ka la dap da ka jingisynei, bad u la mareh, u la piam ïa la ki kti sawdong jong u, bad u la doh ïa u. 21‘Ko pa,’ u khun jong u, u la ong, ‘nga la leh pop pyrshah ïa U Blei bad pyrshah ïa phi. Ngam long shuh uba dei ba yn khot u khun jong phi.’ 22Hynrei u kpa u la khot ïa la ki shakri. ‘To pynkloi!’ u la ong. ‘To wanlam ïa ka jaiñkup kaba bha tam bad pynkup ïa u. Pyndeng sati ha ka shynriah'ti jong u bad pynphong juti ha ki kjat jong u. 23Nangta khie leit bad shim ïa u khun masi uba la pynsngaid bha bad pynïap ïa u, bad to ngin ïalehkmen da ka jingkhawai! 24Naba une u khun jong nga u la ïap, hynrei mynta u la im pat; u la jah noh, hynrei mynta la shem pat ïa u.’ Bad kumta ka jingkhawai ka la sdang.

25“Ha kajuh ka por u khun ba kham heh u la don ha lyngkha. Ha ka lynti ba u wan phai, haba u la poi sha jan ka ïing, u la ïohsngew ïa ka jingput jingtem bad ka jingïashad. 26Kumta u la khot ïa uwei na ki shakri bad u la kylli ïa u, ‘Ka jia aïu?’ 27‘U para jong me u la wan phai pat sha ïing,’ u shakri u la jubab, ‘bad u kpa jong me u la phah pynïap ïa u khun masi uba la pynsngaid bha, namar u la ïoh pat ïa u ha ka jingsuk bad ha ka jingkoit jingkhiah.’

28“U hynmen u la bitar haduh katta katta ba um shym leit shapoh ïing; kumta u kpa jong u, u la mih shabar bad kyrpad ïa u ban rung shapoh. 29Hynrei u la jubab ïa la u kpa, ‘Ha khmih, baroh kine ki snem nga la trei kum u mraw na ka bynta jong phi, bad ngam pat ju saitlah ïa ki hukum jong phi. Phi la ai aïu ïa nga? Ym don wat tang kawei ka blang na ka bynta jong nga ban ïakhawai bad ki paralok jong nga! 30Hynrei une u khun jong phi u la pynsyrwa ei ïa ka jingdon jingem jong phi ha ki nuti, bad haba u wan phai pat sha ïing, phi pynïap na ka bynta jong u ïa u khun masi uba la pynsngaid!’ 31‘Ko khun jong nga,’ u kpa u la jubab, ‘phi ïai don borabor hangne lem bad nga, bad kaei kaei baroh kaba nga don ka long ka jong phi. 32Hynrei ngi la dei ban lehkmen bad ban sngewkmen, namar u para jong phi uba la ïap, hynrei mynta u dang im; u la jah, hynrei mynta la shem pat ïa u.’ ”

Currently Selected:

LOUKAS 15: KHACLBSI

Highlight

Copy