LOUKAS 11

Ka jinghikai U Jisu halor ka jingduwai

(Mat. 6:9-13; 7:7-11)

1Ha kawei ka sngi U Jisu u dang duwai ha kawei ka jaka. Haba u la dep, uwei na ki synran jong u, u la ong ha u, “Ko Trai, to hikai ïa ngi ban duwai, kumba u Ïoannis u la hikai ïa ki synran jong u.”

2U Jisu u la ong ha ki, “Haba phi duwai, to ong ïa kane:

“ ‘Ko Kpa:

Ai ba ka kyrteng jong me kan long kaba la pyndonburom;

ai ban wan ka Hima jong me.

3To ai ha ngi man ka sngi ïa ka jingbam kaba ngi donkam.

4To map ïa ki pop jong ngi,

naba ngi map ïa uwei pa uwei uba leh bakla ïa ngi.

Bad wat ïalam ïa ngi sha ka jingtynjuh kaba eh.’ ”

5Bad U Jisu u la ong ha la ki synran, “Tharai uwei na phi un leit sha ka ïing u paralok jong phi ha ka por shiteng synñia bad ong ha u, ‘Ko paralok, ai kylliang ïa nga lai tylli ki lyngkhot kpu. 6U paralok jong nga uba don ha ka jingleit u la dang shu wan poi ha ka ïing jong nga, bad ngam shym don jingbam ei ei na ka bynta jong u!’ 7Bad tharai u paralok jong phi un jubab napoh ïing, ‘Wat pynwit ïa nga! Ïa ka jingkhang la lah khang, bad ma nga lem bad ki khun jong nga ngi la thiah. Ngam lah ban khie bad ai ei ei ha phi.’ 8Te, kaei pat? Nga ong ha phi ba wat la un ym khie bad ai ha phi ïa u kpu, namar ba phi dei u paralok jong u, pynban un khie joit bad ai ha phi ïa kaei kaei baroh kaba phi donkam namar ba phim lehrain ban ïai pan.

9“Bad kumta nga ong ha phi: To pan, bad phin ïohpdiang; to wad, bad phin shem; to tied, bad ïa ka jingkhang yn plie na ka bynta jong phi. 10Naba uno uno uba pan un ïohpdiang, bad uta uba wad un shem, bad ïa ka jingkhang yn plie ïa uno uno uba tied. 11Hato uno uno na phi kiba long ki kpa phin ai ïa u khun jong phi da u bseiñ haba u pan ïa ka dohkha? 12Lane hato phin ai ïa u da ka 'ñianglartham haba u pan ïa ka pylleng? 13Kiba sniew kumba phi long, phi tip kumno ban ai kiei kiei kiba bha ïa ki khun jong phi. Katno tam, te, ba U Kpa ba ha bneng un ai ïa U Mynsiem Bakhuid ha kito kiba pan na u!”

U Jisu bad u Beelsebul

(Mat. 12:22-30; Mrk. 3:20-27)

14U Jisu u dang beh noh ïa u ksuid u bym lah ban kren; bad haba u ksuid u la mihnoh, uta u briew u la sdang ban kren. Ki paidbah ki la sngewlyngngoh, 15#Mat. 9:34; 10:25hynrei katto katne ngut na u paidbah ki la ong, “U dei u Beelsebul, u rangbah jong ki ksuid, uba la ai ha U ïa ka bor ban beh noh ïa ki.”

16 # Mat. 12:38; 16:1; Mrk. 8:11 Kiwei ki la kwah ban riam ïa U Jisu, kumta ki la ong ha u ban leh ka kambah ban pyn-i ba U Blei u la pdiang ïa U. 17Hynrei U Jisu u la tip ïa kaei kaba ki la pyrkhat, kumta u la ong ha ki, “Kano kano ka ri kaba phiah ïa lade ha ki kynhun kiba ïaleh kawei ïa kawei pat kan ym neh slem; ka longïing kaba ïa-pait pyrshah ïa lade kan kyllon la ka jong ka jong. 18Kumta lada ka hima jong u Soitan ka don ki kynhun kiba ïaleh kawei ïa kawei pat, kumno kan neh? Phi ong ba nga beh noh ïa ki ksuid namar ba u Beelsebul u ai ha nga ka bor ban leh kumta. 19Lada kane ka long kumno ba nga beh noh ïa ki, da kumno ki nongbud jong phi ki beh noh ïa ki? Ki nongbud jong phi hi ki pynshisha ba phi bakla! 20Em, ka long pynban da ka bor ka jong U Blei ba nga beh noh ïa ki ksuid, bad kane ka pynshisha ba ka Hima jong U Blei ka la da wan ha phi.

21“Haba u briew uba khlaiñ, uba la khreh ïa la ki tiar ïaleh baroh, u ap phira ïa la ka jong ka ïing, baroh ki jingdon jingem jong u ki don ha ka jingshngain. 22Hynrei haba u briew uba kham khlaiñ u tur ïaleh ïa u bad jop ïa u, u kit noh ïa baroh ki tiar ïaleh kiba u trai u la shaniah bad u ïasam ïa kaei kaba u la lute.

23 # Mrk. 9:40 “Uno uno u bym long ha ka liang jong nga u pyrshah da shisha ïa nga; uno uno u bym ïarap ïa nga ban lum u pynsaphriang da shisha.

Ka jingwanphai jong u mynsiem bymman

(Mat. 12:43-45)

24“Haba u mynsiem bymman u mihnoh na u briew, u leit kylleng ka ri ba-tyrkhong da kaba wad ka jaka ban shongthait. Lada um lah ban shem ïa ka, un ong ha lade, ‘Ngan leit phai pat sha ka ïing jong nga.’ 25Kumta u leit phai pat bad u shem ïa ka ïing kaba khuid bad kaba la pynbeit ryntih. 26Nangta u mih bad wallam ïa ki hynñiew ngut kiwei pat ki mynsiem kiba kham sniew ban ïa u hi, bad ki wan bad shongsah hangta. Kumta haba ka la dep baroh, uta u briew un don ha ka jinglong ba kham sniew ban ïa kaba u la long ha kaba sdang.”

Ka jingkmen bashisha

27Haba U Jisu u la lah ong ïa kane, ka kynthei ka la kren na u paidbah bad ka la ong ha u, “A katno kaba kmen long ka briew kaba la kha bad kaba la bsa la pjiah ïa me!”

28Hynrei U Jisu u la jubab, “Pynban, katno kaba kmen long kito kiba shahshkor ïa ka ktien jong U Blei bad kiba kohnguh ïa ka!”

Ka jingdawa ïa ka kambah

(Mat. 12:38-42)

29 # Mat. 16:4; Mrk. 8:12 Katba ki briew ki dang ïalum sawdong ïa U Jisu, u la bteng ban kren, “A katno kiba sniew long ki briew jong kane ka juk! Ki dawa ïa ka kambah, hynrei yn ym ai kano kano ha ki, lait tang ka kambah u Jonah. 30#Jon. 3:4Ha kajuh ka rukom ba u Jonah u nongïathuhlypa u la long ka dak ïa ki briew jong ka Ninebeh, kumta U Khun U Briew un long ka dak ïa ki briew jong kane ka juk. 31#1 Syiem. 10:1-10; 2 Khrn. 9:1-12Ha ka Sngi Bishar, ka syiem jong ka Sheba kan ïeng bad mudui ïa ki briew kiba mynta, namar ka la wan jngai na la ka jong ka ri ban shahshkor ïa ka jinghikai bastad jong u syiem Solomon; bad nga ong ha phi ba don uei re uei hangne uba kham khraw ban ïa u Solomon. 32#Jon. 3:5Ha ka Sngi Bishar ki briew jong ka Ninebeh kin ïeng joit bad mudui ïa phi, namar ki la phai noh na ki pop jong ki haba ki la ïohsngew ba u Jonah u ïalap; bad nga pynthikna ïa phi ba don uei re uei hangne uba kham khraw ban ïa u Jonah!

Ka jingshai jong ka met

(Mat. 5:15; 6:22-23)

33 # Mat. 5:15; Mrk. 4:21; Luk. 8:16 “Ym don uba thang ïa ka sharak bad nangta u buhrieh ïa ka lane buh ïa ka hapoh ka shang; pynban, u buh ïa ka halor u diengpynïeng sharak, khnang ba ki briew ki lah ban ïohi ïa ka jingshai katba ki wan rung shapoh. 34Ki khmat jong phi ki long kum ka sharak ïa ka met jong phi. Haba ki khmat jong phi ki bha, ka met jong phi baroh kawei ka dap da ka jingshai; hynrei haba ki khmat jong phi kim bha, ka met jong phi baroh kawei kan long ha ka jingdum. 35Pynthikna, te, ba ka jingshai hapoh jong phi kam dei ka jingdum. 36Lada ka met jong phi baroh kawei ka dap da ka jingshai, khlem kano kano ka bynta jong ka ha kaba dum, kan long kaba phyrnai ha baroh, kum haba ka sharak ka tyngshaiñ ha phi da ka jingphyrnai jong ka.”

U Jisu u kynnoh ïa ki Pharisi bad ïa ki Nonghikai ka Hukum

(Mat. 23:1-36; Mrk. 12:38-40)

37Haba U Jisu u la dep kren, u Pharisi u la khot sngewbha ïa u ban ïabam bad u; kumta u la leit shapoh bad u la shong ban bam. 38U Pharisi u la kyndit haba u ïohi ba U Jisu um shym la thet ha shuwa ban bam. 39Kumta U Trai u la ong ha u, “Mynta te, phi ki Pharisi phi pynkhuid ïa kaba shabar jong ka khuri bad ka pliang jong phi, hynrei hapoh, phi dap da ka jingleh jubor bad ka jingsniew. 40A ki bieit! Hato ym dei U Blei uba la thaw ïa kaba shabar, uba la thaw ruh ïa kaba shapoh? 41Hynrei ai ïa kaei kaba hapoh ki khuri bad ki pliang jong phi ha kiba duk, bad kiei kiei baroh kin long kiba khuid kat kum ka jinglehniam na ka bynta jong phi.

42 # Leb. 27:30 “A katno kaba shyrkhei ïa phi ki Pharisi! Phi ai sha U Blei ïa kawei na ki shiphew jong ki jhur pynbang jingbam, kum u pudina bad u rue#11:42 u rue: Une u dei u jhur kthang uba don ka jingsma iwbih. bad baroh kiwei pat ki jait jhur, hynrei phi leh klet ïa ka jinglehhok bad ka jingieit ïa U Blei. Ïa kine phi la dei ban leh, khlem da leh klet ïa kiwei pat.

43“A katno kaba shyrkhei ïa phi ki Pharisi! Phi ieit ïa ki jaka shong ba la buh kyrpang ha ki synagog bad ban shah khublei da ka jingburom ha ki jaka ïew. 44A katno kaba shyrkhei ïa phi! Phi long kum ki lum jingtep ki bym don dien shuh ha kaba ki briew ki ïaid nalor khlem tip ïa ka.”

45Uwei na ki nonghikai ka Hukum u la ong ha u, “Ko Nonghikai, haba me ong ïa kane, me ñiewbeiñ ïa ngi ruh!”

46U Jisu u la jubab, “A katno kaba shyrkhei ruh ïa phi ki nonghikai ka Hukum! Phi buh ki jingkit halor ki met jong ki briew, kiba eh ïa ka ban kit, hynrei phi hi phim kner wat kawei ka shympriah kti ban ïarap ïa ki ban kit ïa kita ki jingkit. 47A katno kaba shyrkhei ïa phi! Phi thaw ki mot jingtep ba-itynnat na ka bynta ki nongïathuhlypa — kita ki nongïathuhlypa kiba ki kpa tymmen jong phi ki la pynïap. 48Phi da lade hi phi phla, te, ba phi pdiang ïa kaei kaba ki kpa tymmen jong phi ki la leh; ki la pynïap ïa ki nongïathuhlypa, bad phi tei ïa ki mot jingtep jong ki. 49Na kane ka daw ka Jingstad jong U Blei ka la ong, ‘Ngan phah ha ki ïa ki nongïathuhlypa bad ïa ki nonglamktien; kin pynïap katto katne ngut na ki bad kin pynshitom beiñ ïa kiwei pat.’ 50Kumta ïa ki briew jong kane ka juk yn pynshitom na ka bynta ka jingpynïap ïa baroh ki nongïathuhlypa kiba la shah pynïap naduh ka jingpynlong ïa ka pyrthei, 51#Jen. 4:8; 2 Khrn. 24:20,21naduh ka jingpynïap ïa u Abel haduh ka jingpynïap ïa u Sekharaïah, uba la shah pynïap hapdeng ka duwan bad ka Jaka Bakyntang. Ho-oid, nga ong ha phi, ba ïa ki briew jong kane ka juk yn pynshitom na ka bynta jong ki baroh!

52“A katno kaba shyrkhei ïa phi ki nonghikai ka Hukum! Phi la bat noh ïa u shabi uba plie ïa ka khyrdop sha ka ïing jong ka jingtip; phi hi phim leit rung shapoh, bad phi khang ïa kito kiba pyrshang ban rung shapoh!”

53Haba U Jisu u la mihnoh na kata ka jaka, ki nonghikai ka Hukum bad ki Pharisi ki la sdang ban wohnia shikatdei eh ïa u bad kylli ïa u ki jingkylli shaphang bun kiei kiei, 54da kaba pyrshang ban buh ki jingriam ïa u bad ban kem daw ïa u lada u kren ïa kaei kaei kaba bakla.

Currently Selected:

LOUKAS 11: KHACLBSI

Highlight

Copy