ÏOANNIS 11

Ka jingïap u Lasaros

1 # Luk. 10:38,39 U briew uba kyrteng u Lasaros, uba sah ha Bethania, u la pang. Ka Bethania ka dei ka shnong ha kaba ka Mari bad ka Martha ka para jong ka, ki shong ki sah. 2#Ïoan. 12:3(Kane ka Mari ka dei kato kaba la pynsleh ïa ki kjat U Trai da ka jingsleh ba-iwbih bad kaba la ñiad ïa ki da u shñiuh khlieh jong ka; u dei u Lasaros u para jong ka uba la pang.) 3Kita ki kynthei shi para ki la phah khubor sha U Jisu: “Ko Trai, u paralok uba me ieit u pang.”

4Haba U Jisu u la ïohsngew ïa kata, u la ong, “Kaba kut jong kane ka jingpang kan ym dei ka jingïap jong u Lasaros; kane ka la jia khnang ban wallam ka burom ïa U Blei, bad kan long ka lad ha kaba U Khun U Blei un ïohpdiang ïa ka burom.”

5U Jisu u ieit ïa ka Martha, ïa ka para jong ka, bad ïa u Lasaros. 6Pynban haba u la ïohpdiang ïa ka khubor ba u Lasaros u la pang, U la nang sah sa ar sngi ha ka jaka kaba U la don. 7Nangta u la ong ha ki synran, “Ïa ngin ïaleit phai noh sha Judia.”

8“Ko Nonghikai,” ki synran ki la jubab, “dang shen ki briew hangta ki la kwah ban lynthem maw ïa me, bad hato me thmu ban leit phai shata?”

9U Jisu u la ong, “Hato ym don khat-ar kynta ha ka shi sngi? Kumta uno uno uba ïaid haba dang shai ka sngi un ym jynthut, naba u ïohi ïa ka jingshai jong kane ka pyrthei. 10Hynrei lada u ïaid ha ka por mynmiet u jynthut, namar um don ka jingshai.” 11U Jisu u la ong ïa kane bad nangta u pynbud, “U paralok jong ngi u Lasaros u la ïohthiah, hynrei ngan leit bad ngan kyrsiew noh ïa u.”

12Ki synran ki la jubab, “Lada u ïohthiah, ko Kynrad, un sa koit.”

13U Jisu u mut ban ong ba u Lasaros u la ïap, hynrei ki la pyrkhat ba u mut ba u shu ïohthiah. 14-15Kumta U Jisu u la ïathuh shai kdar ha ki, “U Lasaros u la ïap, hynrei na ka bynta jong phi nga kmen ba ngam shym la don ryngkat bad u, khnang ba phin ïoh ngeit. Ïa ngin ïaleit sha u.”

16U Thomas (ïa uba la khot uba Kha Synrap) u la ong ha la ki para synran, “Ïa ngin ïaleit baroh bad u Nonghikai, ba ngin ïa-ïap ryngkat bad u!”

U Jisu uba long ka jingmihpat bad ka jingim

17Haba U Jisu u la poi, u la shem ba la lah tep ïa u Lasaros saw sngi mynshuwa. 18-19Ka Bethania ka jngai kumba lai kilomitar duna na Jerusalem, bad shibun ki nong Judia ki la wan ban peit ïa ka Martha bad ka Mari ban pyntngen ïa ki ha ka jingïap noh u para jong ki.

20Haba ka Martha ka la ïohsngew ba U Jisu u dang wan, ka la leit ban ïakynduh ïa u, hynrei ka Mari ka la sah ha ïing. 21Ka Martha ka la ong ïa U Jisu, “Lada men jin da la don hangne, ko Trai, u para jong nga un ym jin da la ïap! 22Hynrei nga tip ba wat mynta ruh U Blei un ai ha me ïa kaei kaei kaba me pan na u.”

23“U para jong pha un sa im pat,” U Jisu u la ong ha ka.

24“Nga tip,” ka la jubab, “ba un sa mihpat ha ka sngi kaba khatduh.”

25U Jisu u la ong ha ka, “Nga long ka jingmihpat bad ka jingim. Uno uno uba ngeit ha nga un im, wat la u la ïap; un ïoh im, bad uno uno uba im, bad uba ngeit ha nga un ym ïap lano lano ruh. 26Hato pha ngeit ïa kane?”

27“Ho-oid, ko Trai!” ka la jubab. “Nga ngeit ba me long U Messaïah, U Khun U Blei, u ban sa wan sha ka pyrthei.”

U Jisu u ïam

28Hadien ba ka Martha ka la ong ïa kane, ka la leit noh bad ka la khot jar jar ïa ka Mari ka para jong ka, “U Nonghikai u don hangne,” ka la ïathuh ïa ka, “bad u phah khot ïa pha.” 29Haba ka Mari ka la ïohsngew ïa kane, ka la ïeng joit bad ka la leit kyrkieh ban ïakynduh ïa u. 30(U Jisu um pat shym la poi ha kata ka shnong, hynrei u dang don ha ka jaka ha kaba ka Martha ka la ïakynduh ïa u.) 31Ki briew kiba don hapoh ïing bad ka Mari, ban pyntngen ïa ka, ki la ïabud ïa ka haba ki la ïohi ba ka la ïeng joit bad mih kyrkieh. Ki la pyrkhat ba ka leit sha ka jingtep ban ïam hangta.

32Ka Mari ka la poi ha ka jaka ha kaba U Jisu u la don, bad mar ïa-ïohi ïa u, ka la dem khrup ha ki kjat jong u. “Ko Trai,” ka la ong, “lada men jin da la don hangne, u para jong nga un ym jin da la ïap!”

33U Jisu u la ïohi ïa ka ba ka ïam, bad u la ïohi kumno ba ki briew kiba la ïadon lem bad ka, ki ruh ki la ïa-ïam; ka la ktah ïa ka dohnud jong u, bad la pynkhih jur ïa u. 34“Hangno phi la tep ïa u?” u la kylli ïa ki.

“To wan bad peit Ko Trai,” ki la jubab.

35U Jisu u la ïam. 36“Khmih katno ba u la ieit ïa u!” ki briew ki la ong.

37Hynrei don na ki kiba la ong, “U la pynpeit ïa ki khmat uba matlah, ym dei? Hato un ym lah ban ïa u Lasaros bat ym ïap?”

La pynim pat ïa u Lasaros

38Haba la ktah jur sa shisien, U Jisu u la leit sha ka jingtep, kaba long ka krem ba la khang da u mawkhang. 39“Pyntyllun noh ïa u mawkhang!” U Jisu u la hukum.

Ka Martha, ka hynmen uta uba la ïap, ka la jubab, “Kan sa don ka jingsma iwtung, ko Trai. La lah tep ïa u la saw sngi.”

40U Jisu u la ong ha ka, “Hato ngam shym la ïathuh ïa pha ba phan sa ïohi ïa ka burom U Blei lada pha ngeit?” 41Ki la pyntyllun noh ïa uta u mawkhang. U Jisu u la khmied shajrong bad u la ong, “Nga ainguh ïa me, ko Kpa, ba me shahshkor ïa nga. 42Nga tip ba me shahshkor ïa nga borabor, hynrei nga ong ïa kane na ka bynta u paidbah hangne, ba kumta kin ngeit ba me la phah ïa nga.” 43Hadien ba u la lah ong ïa kane, u la pyrta da ka sur kaba jam, “Ko Lasaros, to mihnoh!” 44U Lasaros u la mihnoh, ïa ki kti bad ki kjat jong u la kyllaiñ da ki jaiñsop ïa kiba ïap, bad da ka jaiñ la teh ïa ka khmat jong u. “To law noh na u,” U Jisu u la ong ha ki, “bad ai ba un ïaid.”

Ka jingïasylla pyrshah ïa U Jisu

(Mat. 26:1-5; Mrk. 14:1-2; Luk. 22:1-2)

45Bun na ki briew kiba la wan jngoh ïa ka Mari ki la ïohi ïa kaei kaba U Jisu u la leh, bad ki la ngeit ha u. 46Hynrei katto katne ngut na ki, ki la leit sha ki Pharisi bad ki la ïathuh ïa ki ïa kaei kaba U Jisu u la leh. 47Kumta ki Pharisi bad ki rangbah lyngdoh ki la lum ïa ka dorbar bad ki la ong, “Ngin ïaleh kumno? Peit ïa ki kambah baroh kiba une u briew u la leh! 48Lada ngi shah bad ïai leh ha kane ka rukom, baroh kin ngeit ha u, bad ki nongsynshar ka Hima Rom kin leh ei ei bad kin pynjot ïa ka Templ bad ïa ka jaitbynriew jong ngi.”

49Uwei na ki, uba kyrteng u Kaïaphas, uba la long u rangbah lyngdoh ha kata ka snem, u la ong, “A katno phi long kiba bieit! 50Hato phim sngewthuh ba ka kham bha ïa phi ban shah ba uwei u briew un ïap na ka bynta ka jaitbynriew, ban ïa kaba ka jaitbynriew baroh kawei ka jot noh?” 51-52Ha ka jingshisha, um shym la ong ïa kane na lade hi; pynban, naba u la long u Rangbah Lyngdoh ha kata ka snem, u la ïathuhlypa ba U Jisu u dei ban ïap na ka bynta ka jaitbynriew Jiw, bad ym tang na ka bynta jong ki, hynrei ba un pynwan lang ïa baroh ha kawei ka met ïa baroh ki briew jong U Blei kiba la pynsakma.

53Naduh kata ka sngi hi ki nongsynshar jong ki Jiw ki la ïasylla ïa ka ban pynïap ïa U Jisu. 54Kumta U Jisu um ïaid shuh ha Judia ha kaba paw, hynrei u la mihnoh bad leit sha ka jaka hajan ka ri shyiap, sha ka shnong ïa kaba la khot ka Ephraim, ha kaba u la sah bad ki synran.

55Ka por jong ka Jingkhawai Niam Ka Jinglait ka la jan, bad bun ki briew ki la leit kiew na ki nongkyndong sha Jerusalem ban pyndep ïa ki jinglehniam ka jingpynkhuid ha shuwa ka Jingkhawai Niam. 56Ki la wad ïa U Jisu, bad katba ki dang ïalum ha ka Templ, ki la ïakylli para ma ki, “Kaei phi pyrkhat? Ka long kaba thikna ba un ym wan sha ka Jingkhawai Niam, hato un wan?” 57Ki rangbah lyngdoh bad ki Pharisi ki la ai ïa ka hukum ba lada uno uno u tip hangno ba U Jisu u don, u dei ban wanrah khubor, khnang ba kin ïohkem ïa u.

Currently Selected:

ÏOANNIS 11: KHACLBSI

Highlight

Copy