ÏOANNIS 10

Ka pharshi u nongaplangbrot

1U Jisu u la ong, “Nga ong ha phi ïa ka jingshisha: U briew u bym rung sha ka sem ki langbrot na ka jingkhang, hynrei uba shu kiew nawei pat, u long u nongtuh bad u nonglute. 2U briew uba rung shapoh lyngba ka jingkhang u long u nongap jong ki langbrot. 3U nongap jingkhang u plie ïa ka jingkhang na ka bynta jong u; ki langbrot ki ïohsngew ïa ka sur jong u katba u dang khot ïa la ki langbrot da ka kyrteng, bad u ïalam ïa ki shabar. 4Haba u la pynmih ïa ki shabar, u ïaid ha shuwa jong ki, bad ki langbrot ki bud ïa u, namar ba ki sngewthuh ïa ka sur jong u. 5Kin ym bud ïa uwei pat; pynban, kin phet ïap na uba kum uta u briew, namar kim sngewthuh ïa ka sur jong u.”

6U Jisu u la ïathuh ha ki ïa kane ka pharshi, hynrei kim shemphang ïa kaei kaba u la mut.

U Jisu u nongaplangbrot babha

7Kumta U Jisu u la ong biang, “Nga ïathuh ha phi ïa ka jingshisha: Nga long ka jingkhang jong ki langbrot. 8Baroh kita kiwei kiba la wan ha shuwa jong nga ki long ki nongtuh bad nonglute, hynrei ki langbrot kim shym la shahshkor ïa ki. 9Nga, nga long kata ka jingkhang. Uno uno uba rung shapoh da nga un ïoh im; kin ïohrung shapoh bad mih shabar bad shem ïa ka jaka bam phlang. 10U nongtuh u wan tang ban ïoh tuh, ban pynïap bad ban pynjot. Nga la wan khnang ba phin ïoh ïa ka jingim — ka jingim ha ka jingdap kyrhai jong ka.

11“Nga, nga long u nongaplangbrot uba bha, uba kloi ban ïap na ka bynta ki langbrot. 12Haba u nongbylla sngi, u bym dei u nongaplangbrot bad u bym dei trai ïa ki langbrot, u ïohi ïa u suri ba u wan, u iehnoh ïa ki langbrot bad u phet noh; kumta u suri u kynrup ïa ki langbrot bad pynsaphred ïa ki. 13U nongbylla sngi u phet noh namar ba u long tang u nongbylla sngi bad um salia ei ei ïa ki langbrot. 14-15#Mat. 11:27; Luk. 10:22Nga, nga long u nongaplangbrot uba bha. Kumba U Kpa u ithuh ïa nga bad nga, nga ithuh ïa U Kpa, ha kajuh ka rukom nga ithuh ïa la ki langbrot bad ki ithuh ïa nga. Bad nga kloi ban ïap na ka bynta jong ki. 16Don kiwei pat ki langbrot ki bym dei na kane ka sem langbrot. Nga dei ban wallam ïa ki ruh; kin shahshkor ïa ka sur jong nga, bad kin ïalong kawei ka kynhun langbrot bad uwei u nongaplangbrot.

17“U Kpa u ieit ïa nga namar ba nga kloi ban aiti ïa la ka jingim, khnang ba nga lah ban ïohpdiang pat ïa ka. 18Ym don u ban shim noh ïa ka jingim jong nga na nga. Nga aiti ïa ka da la ka mon sngewbha hi. Nga don ka hok ban aiti noh ïa ka, bad nga don ka hok ban shim pat ïa ka. Kane ka long kaei kaba U Kpa jong nga u la hukum ïa nga ban leh.”

19Ka la don ka jingïapait biang hapdeng ki briew namar kine ki ktien. 20Bun na ki, ki la ïa-ong, “U shongksuid! U la lamwir! Balei phi ïa-shahskhor ïa u?”

21Hynrei kiwei pat ki la ïa-ong, “U briew uba shongksuid um lah ban kren kumne! Kumno u ksuid u lah ban ai jingïoh imat pat ïa ki briew kiba matlah?”

Ïa U Jisu la kyntait

22Ka la long ka por tlang, bad ïa ka Jingkhawai Niam jong ka Jingpynkyntang ïa ka Templ dang rakhe ha Jerusalem. 23-24U Jisu u dang ïaid ha ka baranda u Solomon kaba ha ka Templ, haba ki briew ki la ïalum sawdong ïa u bad kylli, “Sa katno men dang ïai pynap ïa ngi ha ka jinglyngngoh? Ïathuh ha ngi ïa ka jingshisha kaba shai kdar: Hato me long U Messaïah?”

25U Jisu u la jubab, “Nga la lah ïathuh ïa phi, hynrei phim ngeit ïa nga. Ki kam kiba nga leh ha ka bor u Kpa jong nga ki kren na ka bynta jong nga; 26hynrei phin ym ngeit, naba phim dei ki langbrot jong nga. 27Ki langbrot jong nga ki shahshkor ïa ka sur jong nga; nga ithuh ïa ki, bad ki bud ïa nga. 28Nga ai ha ki ïa ka jingim bymjukut, bad kin ym ïap da lei lei ruh. Ym don uno uno uba lah ban knieh noh ïa ki na nga. 29Kaei kaba U Kpa jong nga u la ai ha nga ka long kham khraw ban ïa kiei kiei baroh, bad ym don uno uno uba lah ban knieh noh ïa ki na ka jingsumar U Kpa. 30U Kpa bad ma nga ngi long kawei.”

31Te ki briew ki la khar ïa ki maw ban lynthem ïa u. 32U Jisu u la ong ha ki, “Nga la leh shibun ki kam babha ha khmat jong phi ïa kiba U Kpa u la ai ïa nga ban leh; kano na kine ba phi kwah ban lynthem maw ïa nga?”

33 # Leb. 24:16 Ki la jubab, “Ngim kwah ban lynthem maw ïa me namar kano kano na ki kam babha, hynrei namar ka jingkrenbeiñ Blei jong me! Me long tang u briew, hynrei me pyrshang ban pynlong Blei ïa lade!”

34 # Salm. 82:6 U Jisu u la jubab, “La thoh ha ka hukum jong phi hi ba U Blei u la ong, ‘Phi long ki blei.’ 35Ngi tip ba ïa kaei kaba ka Jingthoh Bakhuid ka ong, ka long kaba shisha junom; bad U Blei u la khot ïa kito ki briew ki blei, ki briew ha kiba U Blei u la ai ïa ka khubor jong u. 36Na ka bynta jong nga, U Kpa u la jied ïa nga bad u la phah ïa nga sha ka pyrthei. Kumno, te, phi lah ban ong ba nga krenbeiñ blei namar ba nga la ong ba nga long U Khun U Blei? 37Wat ngeit ïa nga, namarkata, lada ngam leh ïa kiei kiei kiba U Kpa jong nga u kwah ïa nga ban leh. 38Hynrei lada nga leh ïa ki, wat lada phim ngeit ïa nga, phi la dei ban ngeit ïa ki kam jong nga, khnang ba phi lah ban tip shi syn tip ba U Kpa u long ha nga bad ba nga long ha U Kpa.”

39Sa shisien ki la pyrshang ban kem ïa U Jisu, hynrei u la lait noh na ki kti jong ki.

40 # Ïoan. 1:28 U Jisu u la leit phai biang sha shiliang ka wah Jordan sha ka jaka ha kaba u Ïoannis u la ju pynbaptis, bad u la sah hangta. 41Shibun ki briew ki la wan sha u. “U Ïoannis um leh kambah ei ei,” ki la ong, “hynrei kiei kiei baroh kiba u la ong shaphang une u briew ka la long kaba shisha.” 42Bad bun ki briew hangta ki la ngeit ha u.

Currently Selected:

ÏOANNIS 10: KHACLBSI

Highlight

Copy