JENESIS 21

Ka jingkha ïa u Isaak

1U Trai u la kyrkhu ïa ka Sarah kumba u la kular, bad ka la punkhun bad kha khun shynrang ïa u Abraham haba u la tymmen. 2#Heb. 11:11Ïa uta u khun la kha ha ka por ba U Blei u la buh ba yn sa kha ïa u. 3U Abraham u la khot kyrteng ïa u, u Isaak, 4#Jen. 17:12; Ki Kam. 7:8bad haba u Isaak u la dap phra sngi ka rta, u Abraham u la otsher ïa u kumba U Blei u la hukum. 5U Abraham u la dap shispah snem ka rta mynba la kha ïa u Isaak. 6Ka Sarah ka ong, “U Blei u la wanrah ka jingkmen bad ka jingrkhie ïa nga. Kat kiba ïohsngew ïa kane kin ïa-rkhie bad nga.” 7Nangta ka bynrap, “Uei u ban leit ong ha u Abraham ba ka Sarah kan ïoh sumar khun? Pynban nga la kha khun shynrang ïa u haba u la tymmen.”

8U khunlung u la nang san, bad ha ka sngi ba la pyniehnoh buiñ ïa u, u Abraham u pynlong ka jingkhawai kaba khraw.

Ka jingbeh noh ïa ka Hagar bad ïa u Ishmael

9Ha kawei ka sngi, u Ishmael ïa uba ka Hagar ka nong Ijipt ka la kha na ka bynta u Abraham, u dang ïalehkai bad u Isaak, u khun jong ka Sarah. 10#Gal. 4:29,30Ka Sarah ka la ïohi ïa ki, bad ka ong ha u Abraham, “Beh noh ïa kane ka mraw bad ïa u khun jong ka. U khun jong kane ka briew um dei ban ïoh bynta ei ei ïa ka spah ka phew jong me, kaba u khun jong nga, u Isaak u dei ban ïohpateng.” 11Kane ka la pyndiaw shibun eh ïa u Abraham, naba u Ishmael ruh u dei u khun jong u. 12#Rom. 9:7; Heb. 11:18Hynrei U Blei u ong ha u Abraham, “Wat khuslai na ka bynta uta u khynnah bad na ka bynta ka Hagar ka mraw jong me. Leh ïa kaei kaba ka Sarah ka ong ha me, namar na u Isaak men sa ïoh ki khun ki ksiew kiba nga la kular. 13Ngan ai ruh shibun ki khun ki kti ïa u khun jong kata ka mraw ba kin long kawei ka jaitbynriew. U ruh u dei u khun jong me.”

14Dang step phyrngab ha ka sngi kaba bud, u Abraham u ai katto katne ka jingbam bad ka pla snieh ba-dap um ha ka Hagar. U pynbah ïa u khun ha ka met jong ka bad u la phah noh ïa ka. Ka la mihnoh bad ka ïaid sakma ha ka ri khlaw jong ka Beersheba. 15Haba ka um ka la lut, ka ieh ïa u khunlung hapoh kawei ka bniap, 16bad ïa lade ka leit shong kumba shispah mitar na kata ka jaka. Ka ong ha lade, “Ngam lah shah ban ïohi ïa la u khun ba u ïap.” Katba ka dang shong hangta, ka la sdang ban ïam.

17U Blei u ïohsngew ïa ka jingïam uta u khunlung, bad na bneng u angel jong U Blei u kren ha ka Hagar, “Ko Hagar, pha khuslai ïa-ei? Wat sheptieng. U Blei u la ïohsngew ïa ka jingïam uta u khunlung. 18To ïeng joit bad khie leit shim ïa u, bad khroh ïa u. Ngan pynlong ka jaitbynriew kaba khraw na ki khun ki ksiew jong u.” 19Te U Blei u pynpeit ïa ki khmat jong ka, bad ka la ïohi ïa ka pukri um. Ka la leit ban pyndap um ïa kata ka pla snieh bad ka la ai um ïa uta khynnah ba un dih. 20U Blei u la long ryngkat bad uta u khynnah katba u nang heh nang san; u la im ha ka ri khlaw jong ka Paran bad u kylla long u nongbeh mrad uba tbit. 21Ka kmie jong u ka pynbuh briew ïa u bad ka nong Ijipt.

Ka jingïateh kular hapdeng u Abraham bad u Abimelekh

22 # Jen. 26:26 Ha kata ka por, u Abimelekh u leit bad u Phikol, u rangbah ai hukum jong ka kynhun shipai jong u, bad u ong ha u Abraham, “U Blei u long ryngkat bad me ha kaei kaei baroh ba me leh. 23Kumta to kular skhem hangne ha khmat U Blei ba men ym shukor ïa nga, ïa ki khun ki kti jong nga, lane ïa ki nonghiarpateng jong nga. Nga la ju lehhok ïa me, kumta to kular ba men lehhok kylliang ïa nga bad ïa kane ka ri ha kaba me shong me sah.”

24U Abraham u ong, “Nga kular.”

25U Abraham u la ujor ha u Abimelekh shaphang ka pukri um ïa kaba ki shakri u Abimelekh ki la knieh bor. 26U Abimelekh u ong, “Ngam shym tip mano ba la leh ïa kane. Mem shym la ïathuh ei ei shaphang kane ha nga, bad kane ka long ka sien kaba nyngkong ba nga la ïohsngew ïa ka.” 27Nangta u Abraham u la ai katto katne tylli ki langbrot bad ki masi ha u Abimelekh, bad kine baroh ar ngut ki ïateh kular. 28U Abraham u pynkyrpang hynñiew tylli ki khunlangbrot na ka kynhun langbrot jong u, 29bad u Abimelekh u kylli ïa u, “Phi leh lei kumne?”

30U Abraham u jubab, “To pdiang ïa kine ki hynñiew tylli ki khunlangbrot. Da kaba leh kumne, me kubur ba dei ma nga uba la tih ïa kane ka pukri.” 31Bad kumta ïa kata ka jaka la khot ka Beersheba, namar dei hangta ba baroh ar ngut ki la pynlong ka jingsmai.

32Hadien ba ki la pynlong ïa kane ka jingïateh kular ha Beersheba, u Abimelekh bad u Phikol ki leit phai pat sha Philistia. 33Te U Abraham u la thung uwei u dieng Tamarisk ha Beersheba bad u la mane ïa U Trai, U Blei Bymjukut. 34U Abraham u la shong slem hangta ha Philistia.

Currently Selected:

JENESIS 21: KHACLBSI

Highlight

Copy