JENESIS 20

U Abraham bad u Abimelekh

1U Abraham u la kynriah noh na Mamre sha ki bynta bashathie jong ka Kanaan bad u la shong la sah hapdeng ka Kadesh bad ka Shur. 2#Jen. 12:13; 26:7Hadien, katba u dang shong ha Gerar, u la ong ba ka tnga jong u, ka Sarah ka dei ka para jong u. Te u Abimelekh jong ka Gerar u la phah ban wallam ïalam ïa ka Sarah sha u. 3Ha kawei ka miet, U Blei u mihpaw ha u ha ka jingphohsniew, bad u ong ha u, “Men sa ïap, namar me la shim ïa kane ka briew; ka la dep shongkurim.”

4Hynrei u Abimelekh um pat shym la leit hajan jong ka bad u ong, “Ko Kynrad, ngam shym tip! Hato men shu pynïap ïa nga bad ïa ki briew jong nga? 5U Abraham hi u la ong ba ka dei ka para jong u, bad ka ruh ka ong kumjuh. Nga la leh ïa kane da ka jingïatiplem kaba sngur, bad ngam shym la leh bakla.”

6U Blei u jubab ïa u ha kata ka jingphohsniew, “Ho-oid, nga tip ba me la leh ïa kane da ka jingïatiplem kaba sngur; kumta nga la khang ïa me ban leh pop pyrshah ïa nga, bad ngam shym la shah ïa me ban ktah ïa ka. 7Hynrei mynta, to pynphai noh ïa kato ka briew ha u tnga jong ka. U dei u nongïathuhlypa, bad un sa duwai na ka bynta jong me, ba kumta men ym ïap. Hynrei lada mem pynphai pat ïa ka, nga maham ïa me ba men ïap, ma me bad ki briew jong me baroh.”

8Dang step phyrngab, u Abimelekh u khot lang ïa ki rangbah synshar jong u baroh, bad u ïathuh ha ki ïa kaba la jia; bad ki la sheptieng shikatdei eh. 9Nangta u Abimelekh u khot ïa u Abraham, bad u ong, “Kaei kane kaba me la leh ïa ngi? Nga la leh sniew aïu ïa me ban pynlong ïa me ban pynngat ïa kane ka jynjar ha nga bad ha ka hima jong nga? Ym don uwei ruh u ban leh ïa kaei kaba me la leh ïa nga. 10Balei me leit leh ïa ka?”

11U Abraham u jubab, “Nga la pyrkhat ba yn ym don hangne kiba sheptieng burom ïa U Blei, ba kumta kin pynïap ïa nga ban ïoh ïa ka tnga jong nga. 12Ma ka, ka long shisha ka para jong nga. Ka dei ka khun jong u kpa jong nga, hynrei ym ka khun jong ka kmie jong nga; bad nga la shongkurim ïa ka. 13Kumta haba U Blei u la phah noh ïa nga na ka ïing u kpa jong nga sha ki ri nongwei, nga ong ha ka, ‘Pha lah ban pyn-i haduh katno pha shaniah ïa nga da kaba ïathuh ïa iwei pa iwei ba nga long u hynmen jong pha.’ ”

14Te u Abimelekh u pynphai pat ïa ka Sarah ha u Abraham, bad ha kajuh ka por u la ai ha u ïa ki langbrot, ki masi, bad ki mraw. 15U ong ha u Abraham, “Kane baroh ka dei ka ri jong nga; to shong to sah kat ha kaba me kwah.” 16Ha ka Sarah pat u ong, “Ngan ai ha u hynmen jong pha shihajar tylli ki sbai rupa kum ka jingpynshisha ha baroh kiba ïadon lem bad pha ba pha long kaba lui lui; uwei pa uwei baroh un tip ba pham shym la leh bakla.”

17-18Namar kaei kaba la jia ha ka Sarah, ka tnga jong u Abraham, U Trai u la pynlyngki ïa ki kynthei baroh ha ka ïingsyiem jong u Abimelekh. Kumta u Abraham u duwai na ka bynta u Abimelekh, bad U Blei u la pynkhiah ïa u. U la pynkhiah ruh ïa ka tnga jong u, bad ïa ki mraw kynthei jong u, ba kumta ki ruh ki lah ban ïoh khun.

Currently Selected:

JENESIS 20: KHACLBSI

Highlight

Copy