KOLOSSAI 1

1Na u Paul, uba da ka mon U Blei u long u Apostol jong U Khrist Jisu, bad na u Timothi u para jong ngi —

2Ha ki briew jong U Blei ha

Kolossai kiba long ki parabangeit baïaineh ha U Khrist:

Ai ba U Blei uba U Kpa jong ngi un ai ha phi ka jingaiei bad ka jingsuk.

Ka jingduwai ainguh

3Ngi ainguh borabor ïa U Blei, U Kpa jong U Jisu Khrist uba U Trai jong ngi, haba ngi duwai na ka bynta jong phi. 4Naba ngi la ïohsngew ïa ka jingngeit jong phi ha U Khrist Jisu bad ïa ka jingieit jong phi ïa ki briew baroh ki jong U Blei. 5Haba ka khubor bashisha, ka Khubor Babha, ka la wan nyngkong ha phi, phi la ïohsngew shaphang ka jingkyrmen ba ka tyrwa. Kumta ïa ka jingngeit bad ka jingieit jong phi la pynshong nongrim ha kaei kaba phi kyrmen, ïa kaba la buh sumar na ka bynta jong phi ha bneng. 6Ka gospel ka ïai wallam ki jingkyrkhu bad ka par kylleng ka pyrthei, kumba ka la long hapdeng jong phi naduh kata ka sngi kaba phi la ïohsngew nyngkong shaphang ka jingaiei jong U Blei bad phi la tip ïa ka kumba ka long shisha. 7#Kol. 4:12; Phlm. 1:23Phi la ïoh tip ïa ka jingaiei jong U Blei na u Epaphras, u para shakri ba-ieit jong ngi, uba long u nongtrei baïaineh jong U Khrist na ka bynta jong ngi. 8U la ïathuh ha ngi ïa ka jingieit kaba U Mynsiem u la ai ha phi.

9Na kane ka daw, ngi ju duwai borabor na ka bynta jong phi, naduh ba ngi la ïohsngew shaphang jong phi. Ngi kyrpad ïa U Blei ban pyndap ïa phi da ka jingtip ïa ka mon jong u, da ka jingstad baroh bad ka jingshemphang ba U Mynsiem jong u, u ai. 10Nangta phin lah ban im kumba U Trai u kwah bad ba phin ïai leh borabor ïa kaei kaba pynsngewbha ïa u. Ka jingim jong phi kan pynmih ïa baroh ki jingleh babha babun jait, bad phin san ha ka jingtip jong phi ïa U Blei. 11-12Ai ba yn pynkhlaiñ ïa phi da ka jingkhlaiñ baroh kaba wan na ka bor badonburom jong u, khnang ba phi lah ban shah ïa kiei kiei baroh da ka jingïaishah. Bad da ka jingkmen to ainguh ïa U Kpa, uba la pynlong ïa phi kiba bit ban ïoh ïa la ka bynta na kaei kaba U Blei u la tyngkai na ka bynta ki briew jong u ha ka hima ka jingshai. 13U la pyllait ïa ngi na ka bor jong ka jingdum bad u la wallam ha ka jingsuk ïa ngi sha ka hima jong U Khun ba-ieit jong u, 14#Eph. 1:7da uba la pyllaitluid ïa ngi, kata ka long, ba la map ïa ki pop jong ngi.

Ka jinglong bad ka jingtrei U Khrist

15U Khrist u long ka dur bapaw jong U Blei u bym lah ban ïohi. U long U Khun ba la kha nyngkong, uba hakhlieh duh jong kiei kiei baroh kiba la thaw. 16Namar da u, U Blei u la thaw ïa kiei kiei baroh ha bneng bad ha khyndew, kiei kiei kiba lah ban ïohi bad kiei kiei ki bym lah ban ïohi, kynthup ïa ki bor ba kynja mynsiem, ki kynrad, ki nongsynshar, bad ki bor synshar. U Blei u la thaw ïa ka jingpynlong baroh kawei da u na ka bynta jong u. 17U Khrist u la don shuwa ïa kiei kiei baroh, bad ha u kiei kiei baroh ki ïoh ïa la ka jaka kaba dei. 18#Eph. 1:22,23U long u khlieh jong ka balang kaba long ka met jong u; u long u tynrai jong ka jingim jong ka. U long U Khun uba la kha nyngkong, ïa uba la pynmihpat na ka jingïap, khnang ba tang ma u hi un ïoh ïa ka bynta kaba nyngkong ha kiei kiei baroh. 19Naba ka la long da ka jingrai ka jong U Blei hi ba U Khun u la don ha lade hi ïa ka jinglong ba-pura jong U Blei. 20#Eph. 2:16Da U Khun, te, U Blei u la kut jingmut ban wallam pat ïa ka jingpynlong baroh kawei sha lade hi. U Blei u la pynïasuk da ka jingïap U Khun jong u kum ka jingkñia halor ka diengphna bad kumta u la wallam pat sha lade hi ïa kiei kiei baroh, kiba ha ka pyrthei bad kiba ha bneng.

21Ha kawei ka por phi la long jngai eh na U Blei bad phi la long ki nongshun jong u namar jong kiei kiei kiba sniew kiba phi la leh bad pyrkhat. 22Hynrei mynta, da ka jingïap jong U Khun jong u ha kane ka doh, U Blei u la pynlong ïa phi ki paralok jong u, khnang ban pynïeng ïa phi, kiba khuid, kiba sngur, bad kiba khlem jingduna ha khmat jong u. 23Phi dei, da shisha, ban ïaineh ha ka nongrim kaba skhem bad kaba thikna, bad phim dei ban shah ïa lade ban shah pynkhynñiuh na ka jingkyrmen kaba phi la ïoh myn haba phi la ïohsngew ïa ka gospel. Ka dei na kane ka gospel ba ma nga u Paul, nga la kylla long u shakri — kane ka gospel kaba la ïalap ha uwei pa uwei ha ka pyrthei.

Ka jingtrei jong u Paul kum u shakri jong ka Balang

24Bad mynta nga kmen shaphang ki jingshahshitom jong nga na ka bynta jong phi, naba da ki jingshahshitom jong nga ha ka doh, nga ïarap ban pyndep ïa kaei kaba dang sah na ki jingshahshitom jong U Khrist na ka bynta ka balang, kaba long ka met jong u. 25Bad ïa nga la pynlong u shakri jong ka balang da U Blei, uba la ai ha nga ïa kane ka kam ban trei na ka bynta ka jingbha jong phi. Ka long ka kam ban pynbna pura ïa ka khubor jong u, 26kaba long ka jingmaïan kaba u la buhrieh lyngba ki rta baroh kiba mynshuwa na ki jaitbynriew baroh hynrei mynta la pynpaw ha ki briew jong u. 27Ka jingthmu jong U Blei ka long ban pyntip ïa ka jingmaïan jong u ha ki briew jong u, ïa kane ka jingmaïan basngewtynnat bad badonburom kaba u don na ka bynta ki briew baroh. Bad ka jingmaïan ka long, ba U Khrist u don hapoh jong phi, kaba mut, ba phin ïoh bynta ha ka burom jong U Blei. 28Kumta ngi ïalap ïa U Khrist ha uwei pa uwei. Da ka jingstad baroh katba lah ngi maham bad hikai ïa ki khnang ban pynïeng ïa uwei pa uwei ha khmat U Blei kum u briew uba la san pura ha U Khrist. 29Ban pyndep ïa kane nga ïaleh tyngeh bad nga ïaksaid, da kaba pyndonkam ïa ka jingkhlaiñ badonbor kaba U Khrist u ai bad kaba treikam hapoh jong nga.

Currently Selected:

KOLOSSAI 1: KHACLBSI

Highlight

Copy