KI KAM 8

1Bad u Saul u la mynjur ïa ka jingpynïap ïa u Stephan.

U Saul u pynshitom beiñ ïa ka Balang

Ha kata hi ka sngi, ka balang ha Jerusalem ka la sdang ban mad ïa ka jingpynshitom beiñ kaba shyrkhei. Baroh ki riewngeit, lait noh ki apostol, ki la sakma sha kylleng jong ki thain ka Judia bad ka Samaria. 2Katto katne ngut ki rangbah bariewblei kiba la tep ïa u Stephan, ki la ïambriew na ka bynta jong u da ka jingïam kaba jam.

3 # Ki Kam. 22:4,5; 26:9-11 Hynrei u Saul u la pyrshang ban pynjot ïa ka balang, da kaba leit na kawei ka ïing sha kawei pat, u da paring shabar ïa ki riewngeit, shynrang bad kynthei, bad u la thep ïa ki sha ka ïingbyndi.

Ïa ka Gospel la ïalap ha Samaria

4Kita ki riewngeit ïa kiba la pynsakma ki la leit kylleng, ki da ïalap ïa ka khubor. 5U Philip u la leit sha ka nongbah ha Samaria bad u la ïalap ïa U Messaïah ha ki briew hangta. 6Ki paidbah ki la pynleit jingmut bha ïa kaei kaba u Philip u la ong, haba ki la shahshkor ïa u bad ïohi ïa ki kambah kiba u la leh. 7Ki mynsiem bymman ki la mihnoh na kiba bun ki briew da kaba lynñiar jam, bad ïa kiba bun kiba pang ïapshiliang bad kiba dkoh la pynkhiah. 8Kumta la don ka jingkmen kaba khraw ha kata ka nongbah.

9U briew uba kyrteng u Simon u shong u sah hangta, uba shipor u la pynlyngngoh ïa ki nong Samaria da ka jingleh myntor jong u. 10U la kam ba u long uba khraw, bad uwei uwei baroh ha ka nongbah, na ki kyrdan baroh ha ka imlang ka sahlang, ki pynshahshkor kmang ïa u. “Une u briew u long kata ka bor jong U Blei ïa kaba la khot ‘Ka Borbah’,” ki la ong. 11Ki la pynshahshkor kumne ïa u namar la kham slem u la pynlyngngoh ïa ki da ka jingleh myntor jong u. 12Hynrei haba ki la ngeit ïa ka khubor jong u Philip shaphang ka khubor babha jong ka Hima U Blei bad shaphang U Jisu Khrist, la pynbaptis ïa ki, shynrang bad kynthei. 13U Simon hi ruh u la ngeit; bad hadien ba la pynbaptis ïa u, u la bud ha kti ha kjat ïa u Philip bad u la sngewlyngngoh haba u la ïohi ïa ki kamphylla bad ki kambah ïa kiba la leh.

14Ki apostol ha Jerusalem ki la ïohsngew ba ki nong Samaria ki la pdiang ïa ka ktien U Blei, kumta ki la phah ïa u Petros bad u Ïoannis sha ki. 15Haba ki la poi, ki la duwai na ka bynta ki riewngeit ba kin ïohpdiang ïa U Mynsiem Bakhuid. 16Naba U Mynsiem Bakhuid um pat shym la wan hiar hano hano ruh na ki; la pynbaptis ïa ki tang ha ka kyrteng U Trai Jisu. 17Te u Petros bad u Ïoannis ki la buh ïa la ki kti ha ki, bad ki la ïohpdiang ïa U Mynsiem Bakhuid.

18U Simon u la ïohi ba la ai ïa U Mynsiem ha ki bangeit haba ki apostol ki la buh ïa la ki kti halor jong ki. Kumta u la tyrwa pisa ha u Petros bad u Ïoannis, 19bad u la ong, “To ai ïa kane ka bor ha nga ruh, khnang ba uno uno ha uba nga buh ïa la ki kti un ïohpdiang ïa U Mynsiem Bakhuid.”

20Hynrei u Petros u la jubab ïa u, “Ai ba ïa me bad ka pisa jong me yn bret sha ka dujok, naba me pyrkhat ba me lah ban thied ïa ka jingai jong U Blei da ka pisa! 21Mem don bynta lane ïoh bynta ha ka kam jong ngi, namar ka dohnud jong me kam long kaba beit ha khmat U Blei. 22To kylla-kaba-mut, te, na kane ka jingthmu bymman jong me, bad duwai ha U Trai ba un map ïa me na kaba pyrkhat ïa kaba kum kane. 23Naba nga ïohi ba me dap da ka jingbishni bajur bad me long u koidi jong ka pop.”

24U Simon u la ong ha u Petros bad u Ïoannis, “Sngewbha duwai ha U Trai na ka bynta jong nga, khnang ba kawei ruh na kita kiei kiei kiba phi la kren kan ym jia ha nga.”

25Hadien ba ki la ai ïa ka jingphla jong ki bad pynbna ïa ka khubor jong U Trai, u Petros bad u Ïoannis ki la leit phai pat sha Jerusalem. Ha lynti ki la ïalap ïa ka Khubor Babha ha kiba bun ki shnong ha Samaria.

U Philip bad u rangbah synshar na Ithiopia

26U angel jong U Trai u la ong ha u Philip, “To khreh bad leit shaphang shathie sha kata ka lynti kaba leit na Jerusalem sha Gasa.” (Kane ka long ka lynti ka bym ju pyndonkam shuh mynta.) 27-28Kumta u Philip u la khreh bad u la leit. Mynta, u ïunukh na Ithiopia, uba dei u rangbah synshar ba ha khmat eh uba dei khmih ïa ka jaka kynshew jong ka syiem jong ka Ithiopia, u dang don ha ka lynti sha ïing. U la leit sha Jerusalem ban mane ïa U Blei bad ba u dang leit phai pat sha la ïing ha ka kali kulai jong u. Katba u dang leit phai, u la pule na ka kitab u Isaïah u nongïathuhlypa. 29U Mynsiem Bakhuid u la ong ha u Philip, “Khie leit sha jan ka kali kulai bad bud mar jan ïa ka.” 30U Philip u la mareh sha u bad u la ïohsngew ba u dang pule na ka Kitab u Isaïah u nongïathuhlypa. U la kylli ïa u, “Hato me sngewthuh ïa kaei kaba me pule?”

31U rangbah synshar u la jubab, “Kumno ngan lah ban sngewthuh lymda don mano mano ba batai ïa ka ha nga?” Bad u la khot sngewbha ïa u Philip ban wan kiew bad shong ha ka kali kulai ryngkat bad u. 32#Isa. 53:7,8Ka bynta jong ka Jingthoh Bakhuid kaba u dang pule ka la long kane:

“Kum ka langbrot ïa kaba la ïalam ban shah pynïap,

kum u khunlangbrot uba sngap jar haba khap ïa u shñiuh jong u,

um shym kren wat shikyntien.

33La pynjahburom ïa u, bad ym shym la bishar hok ïa u.

Ym don mano mano ba lah ban ïathuh shaphang ki khun ki ksiew jong u,

namar ba ka jingim jong u ha ka pyrthei ka la kut.”

34Uta u rangbah synshar u la kylli ïa u Philip, “To ïathuh ïa nga, shaphang jongno u nongïathuhlypa u kren ïa kane? Shaphang ïa lade ne shaphang uwei pat?” 35Te u Philip u la sdang ban kren; da kaba sdang na kane ka bynta jong ka Jingthoh Bakhuid, u la ïathuh ïa u ïa ka Khubor Babha shaphang U Jisu. 36Katba ki nang ïaleit ha lynti, ki la poi ha ka jaka ha kaba la don khyndiat ka um, bad uta u rangbah synshar u la ong, “Hangne ka don ka um. Kaei kaba khang ïa nga na kaba shah pynbaptis?” 37U Philip u la ong ha u, “Lah ban pynbaptis ïa me lada me ngeit da ka dohnud baroh.” “Nga ngeit,” u la jubab; “nga ngeit ba U Jisu Khrist u long U Khun U Blei.”

38Uta u rangbah synshar u la hukum ban pynsangeh ïa ka kali kulai, bad baroh ar ngut, u Philip bad uta u rangbah synshar ki la ïaleit hiar sha ka um, bad u Philip u la pynbaptis ïa u. 39Haba ki la wan kiew na kata ka um, U Mynsiem jong U Trai u la rah noh ïa u Philip. U rangbah synshar um shym la ïohi shuh ïa u, hynrei u la bteng ïa la ka jingleit, uba dap da ka jingkmen. 40U Philip u shem ïa lade ha Asotos; u la nang leit sha Kaisaria, bad ha lynti u la ïalap ïa ka Khubor Babha ha kawei pa kawei ka shnong.

Currently Selected:

KI KAM 8: KHACLBSI

Highlight

Copy