KI KAM 5

U Ananias bad ka Sapphira

1Hynrei la don u briew uba kyrteng u Ananias, uba, lem bad ka tnga jong u ka Sapphira, ki la die katto katne na ka jaka kaba dei ka jong ki. 2Bad da ka jingmynjur jong ka tnga jong u, u la buh katto katne ka pisa na ka bynta ïa lade bad u la ai ïa kaba sah baroh ha ki apostol. 3U Petros u la ong ha u, “Ko Ananias, balei me la shah ïa u Soitan ban bat synshar ïa me bad pynlong ïa me ban lamler ïa U Mynsiem Bakhuid da kaba bat noh katto katne ka pisa kaba me la ïohpdiang na kaba die ïa ka jaka? 4Ha shuwa ba men die ïa ka jaka, ka dei ka jong me; bad hadien ba me la die ïa ka, ka pisa ka la long ka jong me. Balei, te, ba me la kut jingmut ban leh ïa kane? Mem shym la shukor ïa ki briew — me la shukor ïa U Blei!” 5Mar ïa ïohsngew ïa kane, u Ananias u la kyllon ïap; bad baroh kiba la ïohsngew shaphang kane, ki la sngewshyrkhei. 6Ki samla shynrang ki la wan shapoh, ki la sop ïa ka met jong u, ki la bah ïa u shabar, bad tep ïa u.

7Kumba hadien lai kynta, ka tnga jong u, ka bymtip ïa kaba lah jia, ka la wan rung shapoh. 8U Petros u la kylli ïa ka, “Ïathuh ïa nga, hato kane ka pisa baroh ka dei kaba ma pha bad u tnga jong pha, phi la ïohpdiang na kaba die ïa ka jaka jong phi?”

“Ho-oid,” ka la jubab, “kato ka pisa baroh.”

9Kumta u Petros u la ong ha ka, “Balei ba ma pha bad u tnga jong pha, phi kut jingmut ban tynjuh ïa U Mynsiem jong U Trai? Ki samla kiba la tep ïa u tnga jong pha ki la don mynta ha ka jingkhang, bad kin bah noh ïa pha ruh shabar!” 10Shisyndon ka la kyllon ha ki kjat jong u bad ka la ïap. Ki samla shynrang ki la wan shapoh bad ki la ïohi ba ka la ïap, kumta ki la bah noh ïa ka shabar bad la tep ïa ka ha syndah u tnga jong ka. 11Ka balang baroh kawei bad baroh kiwei pat kiba la ïohsngew ïa kane ki la sngewshyrkhei.

Ki kambah bad ki kamphylla

12Ki apostol ki la leh shibun ki kambah bad ki kamphylla hapdeng ki briew. Baroh ki riewngeit ki la ïakynduh lang ha ka baranda u Solomon. 13Ym don mano mano nabar ka kynhun kiba la nud ban ïasoh bad ki, wat la ki paidbah ki la kren ïaroh ïa ki. 14Hynrei la nang pynïasoh kham bun ki briew sha ka kynhun — u paid ki rangbah bad ki kynthei kiba la ngeit ha U Trai. 15Kaba mih na kaei ba ki apostol ki la leh, ka long ba ïa ki briew kiba pang la rah sha ki lynti bah bad la buh ha ki jingthiah bad ki shylliah khang ba la kumno kumno ka syrngiew jong u Petros kan dei ha ki katto katne ngut na ki katba u dang ïaid najan. 16Bad ki paidbah ki la wan na ki shnong kiba sawdong ka Jerusalem, ki da wallam ïa kito kiba pang lane kiba don mynsiem bymkhuid hapoh jong ki; bad la pynkhiah ïa ki baroh.

La pynshitom beiñ ïa ki apostol

17Nangta u Rangbah Lyngdoh bad baroh kiba synran ïa u, ki dkhot jong ka kynhun ki Saddusi na kata ka jaka, ki la bishni shikatdei eh ïa ki apostol; kumta ki la kut jingmut ban leh ei ei. 18Ki la kem ïa ki apostol bad ki la set ha ka phatok. 19Hynrei ha kata ka miet u angel jong U Trai u la plie ïa ki khyrdop ka byndi, u la ïalam shabar ïa ki apostol, bad u la ong ha ki, 20“Khie leit bad ïeng ha ka Templ, bad ïathuh ha ki briew baroh shaphang kane ka jingim bathymmai.” 21Ki apostol ki la kohnguh, bad haba dang byrngut ki la rung sha ka Templ bad ki la sdang ban hikai.

U Rangbah Lyngdoh bad kiba synran ïa u ki la khot lang ïa ki tymmen ki san jong ki Jiw na ka bynta ka jingïalang ba-pura jong ka Dorbar; nangta ki la phah hukum sha ka byndi ban wallam ïa ki apostol ha khmat jong ki. 22Hynrei haba ki rangbah synshar ki la poi, kim shym shem ïa ki apostol ha byndi, kumta ki la wan phai noh sha ka Dorbar bad ki la ïathuh, 23“Haba ngi la poi ha phatok, ngi la shem ba la khang pynskhem ïa ka bad baroh ki nongap phira kiba ap ki don ha ka khyrdop; hynrei haba ngi la plie ïa ki khyrdop, ngim shem ïano ïano ruh hapoh!” 24Haba ki rangbah lyngdoh bad u rangbah pynïaidkam uba khmih ïa ki nongap phira ka Templ ki la ïohsngew ïa kane, ki la sngewphylla ïa kaei kaba lah jia ha ki apostol. 25Nangta uwei u briew u la wan rung shapoh bad u la ong ha ki, “To shahshkor! Ki briew kiba phi la buh ha byndi ki don ha ka Templ, ki da hikai ïa ki paidbah!” 26Kumta u rangbah pynïaidkam u la leit noh bad ki rangbah jong u bad wallam pat ïa ki apostol. Kim shym la pyndonkam ïa ka bor, namar ki la sheptieng ïoh ba ki paidbah ki lah ban lynthem maw ïa ki.

27Ki la wallam shapoh ïa ki apostol, ki la pynïeng ïa ki ha ka Dorbar, bad u Rangbah Lyngdoh u la kylli ïa ki. 28#Mat. 27:25“Ngi la ai ha phi ïa ki hukum bapyrkhing ban ym hikai ha ka kyrteng jong une u briew,” u la ong; “hynrei peit kaei kaba phi la leh! Phi la pynphriang ïa ka jinghikai jong phi kylleng ka Jerusalem, bad phi kwah ban pynlong ïa ngi kiba kitkhlieh na ka bynta ka jingïap jong u!”

29U Petros bad kiwei pat ki apostol ki la phai ktien, “Ngi dei ban kohnguh ïa U Blei, ym ïa ki briew. 30U Blei jong ki kpa tymmen jong ngi u la pynmihpat ïa U Jisu na ka jingïap, hadien ba phi la lah pynïap ïa u da kaba sahnar ïa u ha ka diengphna. 31U Blei u la kyntiew ïa u sha ka liang kamon jong u kum u Nongïalam bad u Nongpynim, ban ai ha ki paid Israel ka kabu ban kylla-kaba-mut bad ban ïoh ka jingmap ïa ki pop jong ki. 32Ngi long ki sakhi ïa kine kiei kiei — ma ngi bad U Mynsiem Bakhuid, uba long ka jingai jong U Blei ha kita baroh kiba kohnguh ïa u.”

33Haba ki dkhot jong ka Dorbar ki la ïohsngew ïa kane, ki la bitar shla haduh katta katta ba ki la kwah ban phah pynïap ïa ki apostol. 34Hynrei uwei na ki, u Pharisi uba kyrteng u Gamaliel, uba long u nonghikai ka Hukum bad ïa uba la burom shikatdei da ki briew baroh, u la ïeng ha ka Dorbar. U la hukum ban ïalam ïa ki apostol shipor shabar, 35bad nangta u la ong ha ka Dorbar, “Ko para Israel, da sumar ïa kaei kaba phi leh ïa kine ki briew. 36Phi kynmaw ba u Theudas u la mih katto katne por mynshuwa, u da kam ba u long uta uba khraw, bad kumba sawspah ngut ki briew ki la ïasoh bad u. Hynrei la pynïap ïa u, bad ïa baroh ki nongbud jong u la pynsakma, bad ka kynhun jong u ka la kut noh. 37Hadien kata, u Judas u nong Galilaïa u la mih ha ka por jong ka jingkheiñbriew; u la khring ïa u paidbah ban bud ïa u, hynrei ïa u ruh la pynïap, bad ïa baroh ki nongbud jong u la pynsakma. 38Bad kumta ïa kane ka kam, nga ong ha phi, wat leh kano kano pyrshah ïa kine ki briew. Ieh ïa ki! Lada kaei kaba ki la thmu bad leh ka long na ka jingleh briew, kan jah noh, 39hynrei lada ka wan na U Blei, phim lah ban jop ïa ki. Phi lah ban shem ïa lade kiba ïaleh pyrshah ïa U Blei!”

Ka Dorbar ka la kohnguh ïa ka jingai jingmut jong u Gamaliel. 40Ki la khot shapoh ïa ki apostol, ki la phah sympat ïa ki, bad hukum ïa ki ban ym kren shuh da lei lei ha ka kyrteng jong U Jisu; bad nangta ki la pyllait noh ïa ki. 41Katba ki apostol ki mihnoh na ka Dorbar, ki la kmen, namar U Blei u la ñiew ïa ki, kiba bit ban shah ïa ka jahburom na ka bynta U Jisu. 42Bad man ka sngi hapoh ka Templ bad ha ki ïing jong ki briew ki ïai bteng ban hikai bad ïalap ïa ka Khubor Babha shaphang U Jisu U Messaïah.

Currently Selected:

KI KAM 5: KHACLBSI

Highlight

Copy