KI KAM 4

U Petros bad u Ïoannis ha khmat ka dorbar

1U Petros bad u Ïoannis ki dang kren ha ki paidbah mynba katto katne ngut ki lyngdoh, u rangbah pynïaidkam uba khmih ïa ki nongap phira ka Templ, bad katto katne ngut ki Saddusi ki la wan poi. 2Ki la sngewbitar namar ba ki ar ngut ki apostol ki la hikai ïa ki briew ba U Jisu u lah mihpat na ka jingïap, kaba pynshisha ba kiba ïap kin mihpat. 3Kumta ki la kem ïa ki bad ki la buh ïa ki ha phatok haduh ka sngi kaba bud, namar ba ka la dier eh. 4Hynrei bun kiba la ïohsngew ïa ka khubor ki la ngeit; bad ka jingbun ki briew ka la roi sha kumba san hajar ngut.

5Ha ka sngi kaba bud ki nongïalam jong ki Jiw, ki tymmen ki san, bad ki nonghikai ka Hukum ki la ïalumlang ha Jerusalem. 6Ki la ïakynduh bad u Annas u Rangbah Lyngdoh bad u Kaïaphas, u Ïoannis, u Aleksandar, bad kiwei pat kiba dei na ka longïing jong u Rangbah Lyngdoh. 7Ki la pynlong ïa ki apostol ban ïeng ha khmat jong ki bad kylli ïa ki, “Kumno phi la leh ïa kane? Ka bor aïu phi la ïoh lane ïa ka kyrteng jongno phi pyndonkam?”

8U Petros, uba la dap da U Mynsiem Bakhuid, u la jubab ïa ki, “Ko nongïalam jong ki paidbah bad ko ki tymmen ki san: 9Lada yn kylli ïa ngi mynta shaphang ka kam babha ïa kaba la leh ha u briew uba dkoh bad kumno la pynkhiah ïa u, 10te ma phi baroh phi dei ban tip, bad baroh ki paid Israel ki dei ban tip, ba une u briew u ïeng hangne ha khmat jong phi uba la khiah kran da ka bor jong ka kyrteng U Jisu Khrist uba na Nasareth — ïa uba phi la sahnarphna bad ïa uba U Blei u la pynmihpat na ka jingïap. 11#Salm. 118:22U Jisu u long uta ïa uba ka Jingthoh Bakhuid ka ong,

“ ‘U maw uba ma phi ki nongtei phi la kyntait

u la kylla long uba donkam tam na baroh.’

12Ïa ka jingpynim dei ban shem tang lyngba jong u; ha ka pyrthei baroh ym don uno uno ïa uba U Blei u la ai uba lah ban pynim ïa ngi.”

13Ki dkhot jong ka Dorbar ki la sngewlyngngoh ban ïohi kumno u Petros bad u Ïoannis ki la long kiba shlur bad ban tip ba ki long ki riewpaidbah ki bymnang bymstad. Ki la sngewthuh te ba ki la long ki nongsynran jong U Jisu. 14Hynrei ym don kano kano kaba ki lah ban ong, namar ba ki la ïohi ïa u briew uba la ïohkhiah uba ïeng hangta lem bad u Petros bad u Ïoannis. 15Kumta ki la ong ïa ki ban mihnoh na ka kamra ka Dorbar, bad nangta ki la sdang ïaphylliew jingmut para ma ki. 16“Kaei kaba ngin leh ïa kine ki briew?” ki la kylli. “Uwei uwei baroh ha Jerusalem u tip ba ïa kane ka kambah kaba pher la leh da ma ki, bad ngim lah ban len ïa ka. 17Hynrei ban khanglad ïa kane ban phriang shuh shuh hapdeng ki briew, to ngin maham ïa kine ki briew ban ym kren da lei lei shuh hano hano ha ka kyrteng U Jisu.”

18Kumta ki la khot biang ïa ki shapoh bad ki la ong ïa ki ba kim dei da lei lei ban kren lane hikai ha ka kyrteng jong U Jisu. 19Hynrei u Petros bad u Ïoannis ki la jubab ïa ki, “Phi hi bishar kano kaba dei ha khmat U Blei — ban kohnguh ïa phi ne ban kohnguh ïa U Blei. 20Naba ngim lah ban sangeh ban kren ïa kaei kaba ma ngi hi ngi la ïohi bad ïohsngew.” 21Kumta ka Dorbar ka la maham ïa ki kham tyngeh bad nangta la pyllait noh ïa ki. Ki la ïohi ba ka long ka bym lah long ban pynshitom ïa ki, namar ki paidbah baroh ki la ïaroh ïa U Blei na ka bynta kaei kaba la jia. 22U briew ha kaba la leh ïa kane ka kambah ka jingpynkhiah u la palat sawphew snem ka rta.

Ki riewngeit ki duwai na ka bynta ka jingshlur

23Mar ïapyllait, u Petros bad ïa u Ïoannis ki la leit phai sha la ka kynhun bad ki la ïathuh ha ki ïa kaei kaba ki rangbah lyngdoh bad ki tymmen ki san ki la ong. 24#Eks. 20:11; Neh. 9:6; Salm. 146:6Haba ki riewngeit ki la ïohsngew ïa kata, baroh ki la ïasoh lang ha ka jingduwai sha U Blei: “Ko Kynrad bad ko Nongthaw ïa ka bneng, ka pyrthei, bad ka duriaw, bad ïa baroh kaba don ha ki! 25#Salm. 2:1,2Da U Mynsiem Bakhuid me la kren lyngba u Dabid u kpa tymmen jong ngi, u shakri jong me, haba u la ong,

“ ‘Balei ba ki Jentil ki bitar shla;

balei ki briew ki thaw ïa ki jingsylla bymmyntoi?

26Ki syiem jong ka pyrthei ki la pynkhreh ïa lade,

bad ki nongsynshar ki la ïakynduh lang

pyrshah ïa U Trai bad ïa U Messaïah jong u.’

27 # Luk. 23:7-11; Mat. 27:1,2; Mrk. 15:1; Luk. 23:1; Ïoan. 18:28,29 Naba shisha u Herod bad u Pontios Pilat ki la ïakynduh lang ha kane ka nongbah lem bad ki Jentil bad ki paid Israel pyrshah ïa U Jisu, u shakri bakhuid jong me, ïa uba me la pynlong U Messaïah. 28Ki la ïalumlang ban leh ïa kaei kaei baroh kaba ma me da ka bor bad ka mon jong me, me la lah thmu ba kan jia. 29Bad mynta, ko Trai, to khmih ïa ki jingbyrngem kiba ki la pynlong, bad shah ïa ngi, ki shakri jong me, ban kren ïa ka khubor jong me da ka jingshlur baroh. 30To kner ïa la ka kti ban pynkhiah, bad ai ba ki kamphylla bad ki kambah yn leh ha ka kyrteng jong U Jisu u Shakri bakhuid jong me.”

31Haba ki la dep duwai, ka jaka ha kaba ki la ïakynduh ka la khynñiuh. La pyndap ïa ki baroh da U Mynsiem Bakhuid bad ki la sdang ban pynbna ïa ka khubor U Blei da ka jingshlur.

Ki riewngeit ki ïasam ïa la ki jingdon jingem

32 # Ki Kam. 2:44,45 Ka kynhun ki riewngeit ka la long ha kawei ka jingmut bad kawei ka mynsiem. Ym don uba ong ba kano kano ka jingdon jong u ba ka long ka jong u hi, hynrei baroh ki la ïasam iwei ïa iwei pat ïa kaei kaei kaba ki la don. 33Da ka bor bakhraw ki apostol ki la sakhi ïa ka jingmihpat jong U Trai Jisu, bad U Blei u la theh ki jingkyrkhu ba-dap kyrhai ha ki baroh. 34Ym don mano mano hapoh ka kynhun kiba don ka jingdonkam. Kito kiba long trai ïa ki lyngkha, ki wallam ïa ka pisa ba la ïohpdiang na ka jingdie, 35bad ai ïa ka ha ki apostol; bad ïa ka pisa la ïasam ha uwei pa uwei kat kum ka jingdonkam jong u.

36Bad kumta ka la long ba u Joseph, u Lebi uba la kha ha Sypros, ïa uba ki apostol ki khot u Barnabas (kaba mut “Uta uba pynshlur”), 37u la die ïa ka lyngkha ba u long trai, u la wallam ïa ka pisa, bad u la ai ha ki apostol.

Currently Selected:

KI KAM 4: KHACLBSI

Highlight

Copy