KI KAM 13

La jied ïa u Barnabas bad u Saul ban leit sha ki Jentil

1Ha ka balang ha Antiokh la don katto katne ngut ki nongïathuhlypa bad ki nonghikai: U Barnabas, u Simeon (ïa uba la khot u Niger), u Lukios (na Kyrini) bad u Manaen (ïa uba la pynsan pynrangbah bad u Herod Antipas uba long u lyngskor) bad u Saul. 2Katba ki dang ïashakri ïa U Trai bad shahjingit, U Mynsiem Bakhuid u la ong ha ki, “Pynkyrpang na ka bynta jong nga ïa u Barnabas bad u Saul, ban trei ïa ka kam sha kaba nga la khot ïa ki.”

3Ki la shahjingit bad ki la duwai, ki la buh ïa la ki kti halor jong ki, bad ki la phah noh ïa ki.

Ha Sypros

4Haba la phah da U Mynsiem Bakhuid, u Barnabas bad u Saul ki la leit sha Seleukia bad ki la leit da ka lieng nangta sha ka dewlynnong Sypros. 5Haba ki la poi ha Salamis, ki la ïalap ïa ka ktien U Blei ha ki synagog. Ki la don lang bad ki u Ïoannis Markos ban ïarap ha ka kam.

6Ki la ïaid sha shiliang ka dewlynnong sha Paphos, ha kaba ki la ïakynduh ïa uwei u nongleh myntor uba kyrteng u Bar Jisu, u Jiw uba la kam ba u long u nongïathuhlypa. 7U la long u paralok jong u lyngskor jong kata ka dewlynnong, u Sergius Paulos uba la long u briew uba shemphang bha. Uta u lyngskor u la phah khot ïa u Barnabas bad u Saul ha khmat jong u namar u la kwah ban ïohsngew ïa ka ktien U Blei. 8Hynrei ïa ki la pyrshah da u nongleh myntor uba kyrteng u Elumas (kata ka long ka kyrteng jong u ha ka ktien Grik), uba la pyrshang ban pynphai noh ïa u lyngskor na ka jingngeit. 9Te ïa u Saul — ïa uba la khot ruh u Paul — la pyndap da U Mynsiem Bakhuid; u la khmih shlip ïa uta u nongleh myntor bad u la ong, 10“Me u khun jong u Ksuid! Me long u nongshun ïa kaei kaei baroh kaba bha. Me long uba dap da kiba bun jait ki buit bymman, bad me ju ïai pyrshang ban pynphai ïa ki jingshisha jong U Trai sha ki jinglamler! 11Ka kti U Trai kan sa wan ha me mynta; men sa matlah bad men ym ïohi ïa ka jingshai jong ka sngi shipor.”

Mar kumta hi u Elumas u la sngew ba u lyoh khyndew uba ïong u la tap ïa ki khmat jong u, bad u la ïaid kylleng da kaba pyrshang ban wad ïano ïano ban ïalam ïa u na ka kti. 12Haba uta u lyngskor u la ïohi ïa kaei kaba la lah jia, u la ngeit; naba u la sngewlyngngoh shikatdei eh ïa ka jinghikai shaphang U Trai.

Ha Antiokh kaba ha Pisidia

13U Paul bad ki paralok jong u ki la leit da ka lieng na Paphos, bad ki la wan poi sha Perga, ka nongbah ha Pamphylia, ha kaba u Ïoannis Markos u la iehnoh ïa ki bad u la leit phai pat sha Jerusalem. 14Ki la nang leit na Perga bad ki la poi ha Antiokh kaba ha Pisidia, bad ha ka sngi Sabbaton ki la leit sha ka synagog bad ki la shong. 15Hadien ka jingpule na ka Hukum u Moses bad na ki jingthoh jong ki nongïathuhlypa, ki rangbah synshar jong ka synagog ki la phah khubor sha ki: “Ko hynmen ko para, ngi kwah ïa phi ban kren ha u paidbah lada phi don ka khubor ai mynsiem na ka bynta jong ki.” 16U Paul u la ïeng joit, u la ai dak da la ka kti, bad u la sdang ban kren:

“Ko ki para Israel bad ko ki Jentil baroh hangne kiba mane ïa U Blei: To shahshkor ïa nga! 17#Eks. 1:7; Eks. 12:51U Blei jong ki paid Israel u la jied ïa ki kpa tymmen jong ngi bad u la pynlong ka jaitbynriew kaba khraw ïa une u paid ha ka por ba ki la im kum ki nongwei ha ka ri Ijipt. U Blei u la ïalam noh ïa ki na ka ri Ijipt da ka bor bakhraw jong u, 18#Jkhñ. 14:34; Deut. 1:31bad haduh sawphew snem u la ïaishah bad ki ha ka ri shyiap. 19#Deut. 7:1; Josh. 14:1U la pynjot ïa ki hynñiew tylli ki jaitbynriew ha ka ri Kanaan bad u la pynlong ïa ki briew jong u ki trai jong ka ri. 20#Nbshr. 2:16; 1 Sam. 3:20Kane baroh ka la shim por kumba sawspah sanphew snem.

“Hadien kane u la ai ha ki ïa ki nongbishar haduh ka por jong u Samuel u nongïathuhlypa. 21#1 Sam. 8:5; 1 Sam. 10:21Bad haba ki la pan syiem, U Blei u la ai ha ki ïa u Saul u khun jong u Kish na ka jait Benjamin, ban long u syiem jong ki haduh sawphew snem. 22#1 Sam. 13:14; 1 Sam. 16:12; Salm. 89:20Hadien ba la weng noh ïa u, U Blei u la pynlong ïa u Dabid ban long u syiem jong ki. Kane ka long kaei kaba U Blei u la ong shaphang jong u: ‘Nga la shem ba u Dabid u khun jong u Jesse, u long u jait briew uba nga sngewbha, u briew u ban leh ïa baroh kaba nga kwah ïa u ban leh.’ 23U la dei U Jisu, uba hiarpateng na u Dabid, ïa uba U Blei u la pynlong u Nongpynim ïa ki paid Israel, kumba u la lah kular. 24#Mrk. 1:4; Luk. 3:3Ha shuwa ba U Jisu un sdang ïa ka kam jong u, u Ïoannis u la ïalap ha ki paid Israel baroh ba ki dei ban phai noh na ki pop jong ki bad ban shah pynbaptis. 25#Ïoan. 1:20; Mat. 3:11; Mrk. 1:7; Luk. 3:16; Ïoan. 1:27Bad haba u Ïoannis u la jan pyndep ïa la ka jingtrei, u la ong ha u paidbah, ‘Phi tharai ba nga dei uei? Ngam long uta uba phi ïa-ap khmih. Hynrei to shahshkor! U da wan hadien jong nga, bad ngam long uba bit ban loit ïa ki juti jong u na ki kjat jong u.’

26“Ko para Israel jong nga, ki khun ki ksiew jong u Abraham, bad baroh ki Jentil hangne kiba mane ïa U Blei: Ka long ha ngi, ba la phah ïa kane ka khubor ka jingpynim! 27Naba ki briew kiba shong ha Jerusalem bad ki nongsynshar jong ki kim tip ba u long U Nongpynim, lymne ba ki la shemphang ïa ki kyntien jong ki nongïathuhlypa ïa kiba la pule man ka sngi Sabbaton. Pynban ki la pynlong ïa ki kyntien jong ki nongïathuhlypa ban urlong shisha da kaba pynrem ïa U Jisu. 28#Mat. 27:22,23; Mrk. 15:13,14; Luk. 23:21-23; Ïoan. 19:15Bad wat la kim shym la shem kano kano ka daw ban rai pynïap ïa u, ki la kyrpad ïa u Pilat ban phah pynïap ïa u. 29#Mat. 27:57-61; Mrk. 15:42-47; Luk. 23:50-56; Ïoan. 19:38-42Bad hadien ba ki la lah pyndep ïa kaei kaei baroh kaba ki Jingthoh Bakhuid ki ong shaphang jong u, ki la pynhiar noh ïa u na ka diengphna bad ki la buh ïa u ha ka jingtep. 30Hynrei U Blei u la pynmihpat ïa u na ka jingïap, 31#Ki Kam. 1:3bad bun sngi u la mihpaw ha kito kiba la ïaleit lem bad u na Galilaïa sha Jerusalem. Ki long mynta ki sakhi na ka bynta jong u sha ki paid Israel. 32-33#Salm. 2:7Bad ngi don hangne ban wallam ïa ka Khubor Babha sha phi: Ïa kaei kaba U Blei u la kular ïa ki kpa tymmen jong ngi ba un leh, u la pyndep mynta na ka bynta jong ngi, kiba long ki khun ki ksiew jong ki, da kaba pynmihpat ïa U Jisu. Kumba la thoh ha ka Salm kaba ar:

“ ‘Me long U Khun jong nga;

ha kane ka sngi nga la long U Kpa jong me.’ ”

34 # Isa. 55:3 Bad kane ka long kaei kaba U Blei u la ong shaphang kaba pynmihpat ïa u na ka jingïap, ym ban pyut noh ha ka jingtep:

“ ‘Ngan ai ha me ïa kita ki jingkyrkhu bakyntang bad kiba thikna

kiba nga la kular ha u Dabid.’ ”

35 # Salm. 16:10 Kumba da shisha u ong ha kawei pat ka bynta:

“ ‘Men ym shah ïa u shakri baneh jong me ban pyut hapoh ka jingtep.’

36Naba u Dabid u la shakri ïa ki jingthmu jong U Blei ha ka por jong u; bad nangta u la ïap, la tep ïa u bad ki kpa tymmen jong u, bad ka met jong u ka la pyut hapoh ka jingtep. 37Hynrei kane kam shym la jia ha uta ïa uba U Blei u la pynmihpat na ka jingïap. 38-39Ngi kwah ïa phi ban tip, ko ki para Israel jong nga, bad ka long lyngba U Jisu ba ïa ka khubor shaphang ka jingmap ïa ki pop la ïalap ha phi; bad ba ïa uwei uwei baroh uba ngeit ha u la pyllait na ki pop baroh na kiba ka Hukum u Moses kam lah ban pyllait ïa phi. 40To sumar bha, te, ba kaei kaba ki nongïathuhlypa ki la ong kan ym jia ha phi:

41 # Hab. 1:5 “ ‘Ha khmih, phi kiba beiñ briew! To sngewlyngngoh bad to ïap!

Naba kaei kaba nga leh mynta

ka long kaei kaei kaba phin ym ngeit,

wat haba uno uno u batai ïa ka ha phi!’ ”

42Katba u Paul bad u Barnabas ki dang ïamihnoh na ka synagog, ki paidbah ki la khot sngewbha ïa ki ban wan biang ha ka sngi Sabbaton kaba bud bad ban ïathuh shuh shuh ha ki shaphang kine kiei kiei. 43Hadien ba ki paidbah ki la mihnoh na ka jingïalang, ïa u Paul bad u Barnabas la bud da kiba bun ki Jiw bad da kiba bun ki Jentil kiba la kylla sha ka niam ki Jiw. Ki apostol ki la kren ha ki bad ki la pynshlur ïa ki ban ïai im ha ka jingaiei jong U Blei.

44Ha ka sngi Sabbaton kaba bud, la jan baroh shi shnong ki la wan ban sngap ïa ka ktien jong U Trai. 45Haba ki Jiw ki la ïohi ïa ki paidbah, ki la dap da ka jingpihuiñ; ki la ïania ïa kaei kaba u Paul u la kren bad ki la krenbeiñ ïa u. 46Hynrei u Paul bad u Barnabas ki la nang kham kren shlur: “Ka long kaba donkam ba ïa ka ktien jong U Blei dei ban kren nyngkong ha phi. Hynrei namar ba phi kyntait ïa ka bad ba phim ñiew ïa lade kiba bit ïa ka jingim bymjukut, ngin iehnoh ïa phi bad leit sha ki Jentil. 47#Isa. 42:6; 49:6Naba kane ka long ka hukum kaba U Trai u la ai ha ngi:

“ ‘Nga la pynlong ïa phi ka jingshai na ka bynta ki Jentil,

khnang ba baroh ka pyrthei ka lah ban lait im.’ ”

48Haba ki Jentil ki la ïohsngew ïa kane, ki la kmen bad ki la ïaroh ïa ka khubor jong U Trai, bad kito ïa kiba la jied na ka bynta ka jingim bymjukut ki la long ki riewngeit.

49Ka ktien jong U Trai ka la phriang kylleng ha kata ka thain. 50Hynrei ki Jiw ki la pynkhih ïa ki rangbah bapawkhmat jong ka nongbah bad ïa ki kynthei Jentil kiba don ha ki kyrdan kiba halor ha ka imlang ka sahlang kiba la mane ïa U Blei. Ki la sdang ban pynshitom beiñ pyrshah ïa u Paul bad u Barnabas bad ki la beh ïa ki shabar na ka thain jong ki. 51#Mat. 10:14; Mrk. 6:11; Luk. 9:5; 10:11Ki apostol ki la kynther noh ïa u pui pui na ki kjat jong ki ha ka jingpyrshah ïa ki bad ki la leit noh sha Ikoniom. 52Ki riewngeit ha Antiokh ki la dap da ka jingkmen bad da U Mynsiem Bakhuid.

Currently Selected:

KI KAM 13: KHACLBSI

Highlight

Copy