KI KAM 12
12
Ki jingpynshitom beiñ kiba bun
1Hamar kane ka por u Syiem Herod u la sdang ban pynshitom beiñ ïa ki katto katne ngut ki dkhot jong ka balang. 2U la phah pynïap ïa u Jakob, u para jong u Ïoannis, da ka waitlam. 3Haba u la ïohi ba kane ka la pynsngewbha ïa ki Jiw, u la thew ruh ban kem sa ïa u Petros. (Kane ka la jia ha ka por ka Jingkhawai Niam U Kpu Bakhlem Thiat). 4#Eks. 12:1-27Hadien ba la kem ïa u, ïa u Petros la thep ha phatok, ha kaba la aiti ïa u ban ap phira da ki saw tylli ki kynhun kiba kawei kawei ka don saw ngut ki shipai. U Herod u la thmu ban bishar ha khmat u paidbah hadien ka Niam Ka Jinglait. 5Kumta la buh ïa u Petros ha ka phatok, hynrei ki briew jong ka balang ki la duwai jur ha U Blei na ka bynta jong u.
La pyllait ïa u Petros na byndi
6Ha ka miet shuwa ba u Herod un wallam ïa u sha u paidbah, u Petros u dang ïohthiah hapdeng ar ngut ki nongap phira. La teh ïa u da ar tylli ki kynjri, bad la don ki nongap phira kiba ap ha ka khyrdop jong ka byndi. 7Kynsan u angel jong U Trai u la ïeng hangta, bad ka jingshai ka la thaba hapoh ka kamra byndi. U angel u la pynkhih ïa u Petros na ka tyrpeng, u la kyrsiew ïa u, bad u la ong, “Pynkloi! Khie joit!” mar kumta hi ki kynjri ki la hap na ki kti jong u Petros. 8Te u angel u la ong, “To panpoh ïa lade bad phong ïa la ki juti.” U Petros u la leh kumta, bad u angel u la ong, “To tawah ïa la ka jaiñkup sawdong jong me bad wan bad nga.” 9U Petros u la bud ïa u shabar jong ka byndi, khlem da tip, la kaei kaba u angel u la leh ka long kaba shisha; u la pyrkhat ba u la ïohi ka jingïohipaw. 10Ki la ïaid najan ka jaka ap phira kaba nyngkong bad nangta ïa kaba ar, bad ki la poi khatduh ha ka khyrdop nar kaba lam sha ka nongbah. Ka khyrdop ka la plie hi na ka bynta jong ki, bad ki la mih shabar. Ki la ïaid ha ka lynti bah, bad kynsan u angel u la iehnoh ïa u Petros.
11Te u Petros u la sngewthuh ïa kaei kaba la lah jia ha u, bad u la ong, “Mynta nga tip ba ka long kaba shisha! U Trai u la phah ïa u angel jong u ban pyllait ïa nga na ka bor jong u Herod bad na kaei kaei baroh kaba ki Jiw ki la khmih lynti ba kan jia.”
12Da kaba tip ïa la ka jinglong jingman, u la leit sha ka ïing jong ka Mari, ka kmie jong u Ïoannis Markos, ha kaba bun ki briew ki la ïalumlang bad ba ki dang duwai. 13U Petros u la tied ïa ka jingkhang kaba shabar, bad ka shakri kaba kyrteng ka Rhoda ka la wan ban peit uei uba tied. 14Ka la sngewthuh ïa ka sur jong u Petros bad ka la kmen haduh katta katta ba ka la mareh pat shapoh khlem da plie ïa ka jingkhang, bad ka la pynbna ba u Petros u ïeng shabar. 15“Pha long kaba lamwir!” ki la ong ïa ka. Hynrei ka la ïai ban ba ka la long kaba shisha. Kumta ki la jubab, “U dei u angel jong u.”
16Ha kajuh ka por u Petros u ïai tied. Khatduh ki la plie ïa ka jingkhang, bad haba ki la ïohi ïa u, ki la sngewlyngngoh. 17U la ai dak ïa ki da ka kti jong u ba kin sngap jar, bad u la batai ha ki kumno U Trai u la ïalam ïa u shabar ka byndi. “Ïathuh ïa kane ha u Jakob bad ha kiwei pat ki parabangeit,” u la ong; nangta u la mihnoh bad u la leit shawei pat.
18Haba ka step ka la poi, ka la don ka jingkulmar jingmut kaba jur hapdeng ki nongap phira — kaei kaba la jia ha u Petros? 19U Herod u la ai hukum ban wad ïa u, hynrei kim shym la shem ïa u. Kumta u la phah tohkit ïa ki nongap phira bad u la hukum ban pynïap ïa ki.
Hadien kane, u Herod u la iehnoh ïa ka Judia bad u la pynlut katto katne por ha Kaisaria.
Ka jingïap u Herod
20U Herod u bitar shikatdei eh ïa briew jong ka Tyros bad Sidon, kumta ki la leit shi kynhun ban ïakynduh ïa u. Nyngkong ki la pynngeit ïa u Blastos, u briew uba dei khmih ïa ka ïingsyiem, ba u dei ban ïarap ïa ki. Nangta ki la leit sha u Herod bad pan ban ïasuk bad u, namar ka ri ka jong ki ka ïoh ïa ki jingbam na ka ri ka jong u syiem.
21Ha ka sngi ba la ïakut, u Herod u la phong ki jaiñkup syiem, u la shong halor ka khet jong u, bad u la kren ha u paidbah. 22“Ym dei u briew uba kren, hynrei u blei!” ki la pyrta. 23Mar kumta hi u angel jong U Trai u la tied ïa u Herod, namar ba um shym ai burom ïa U Blei. La bam ïa u da ki ksaiñ, bad u la ïap.
24Ha kajuh ka por ka ktien U Blei ka la nang phriang bad nang roi.
25U Barnabas bad u Saul ki la lah pyndep ïa la ka kam bad ki la leit phai sha Jerusalem, da kaba ïalam ïa u Ïoannis Markos lem bad ki.
Currently Selected:
KI KAM 12: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
