KI KAM 1

1 # Luk. 1:1-4 Thiophilos badonburom:

Ha ka kitab banyngkong jong nga, nga la thoh shaphang kiei kiei baroh kiba U Jisu u la leh bad hikai naduh ka por ba u la sdang ïa ka jingtrei jong u tad haduh ka sngi ha kaba la shim noh ïa u sha bneng. 2Ha shuwa ban shim noh shajrong ïa u, u la ai ki jingbthah da ka bor U Mynsiem Bakhuid ha ki rangbah kiba u la jied kum ki apostol jong u. 3Ha ki sawphew sngi hadien ka jingïap jong u, u la mihpaw bunsien ha ki ha ki rukom kiba la pynshisha khlem jingartatien ba u im. Ki la ïohi ïa u bad u la ïakren bad ki shaphang ka Hima U Blei. 4#Luk. 24:49Bad haba ki la ïawanlang, u la ai ha ki ïa kane ka hukum: “Wat leit noh na Jerusalem, hynrei ap ïa ka jingkular kaba nga la ïathuh, ka jingai kaba U Kpa jong nga u la kular. 5#Mat. 3:11; Mrk. 1:8; Luk. 3:16; Ïoan. 1:33U Ïoannis u la pynbaptis da ka um, hynrei ha ki khyndiat sngi yn sa pynbaptis ïa phi da U Mynsiem Bakhuid.”

Ïa U Jisu la shim noh sha bneng

6Haba ki apostol ki la ïalumlang bad U Jisu, ki la kylli ïa u, “Ko Kynrad, hato ha kane ka por men ai pat ïa ka Hima ha ki Israel?”

7U Jisu u la ong ha ki, “Ïa ki por bad ki jingjia la buh da U Kpa ha ka bor jong u hi, bad kam dei ïa phi ban tip lano kin jia long. 8#Mat. 28:19; Mrk. 16:15; Luk. 24:47,48Hynrei haba U Mynsiem Bakhuid u wan ha phi, yn pyndap ïa phi da ka bor, bad phin long ki sakhi jong nga ha Jerusalem, ha baroh ka Judia bad Samaria, bad shaduh kiba kut jong ka pyrthei.” 9#Mrk. 16:19; Luk. 24:50,51Hadien ka jingong ïa kane, la shim noh ïa u sha bneng katba ki dang khmih ïa u, bad u lyoh u la buhrieh ïa u na ka jingïohi jong ki.

10Katba ki dang ïaï khmied la ki khmat sha sahit bneng mynba u dang kiew, kynsan ar ngut ki rangbah kiba riam lieh ki la ïeng hajan jong ki bad ki la ong, 11“Ko nong Galilaïa, balei phi ïa-ïeng hangne da kaba khmied sha ka sahit bneng? Une U Jisu, ïa uba la shim noh sha bneng na phi, un wan pat ha kajuh ka rukom ba phi la ïohi ba u kiew sha bneng.”

U nongmih bujli ïa u Judas

12Nangta ki apostol ki la leit phai pat sha Jerusalem na u lum ki Olib, uba jngai kumba shi kilomitar na ka nongbah. 13#Mat. 10:2-4; Mrk. 3:16-19; Luk. 6:14-16Ki la rung sha ka nongbah bad ki la leit sha ka kamra ha kaba ki la sah: U Petros, u Ïoannis, u Jakob bad u Andriw, u Philip bad u Thomas, u Bartholomai bad u Matthaïos, u Jakob u khun jong u Alphaïos, u Simon u Riew-ieit Ri, bad u Judas u khun jong u Jakob. 14Ki la ïalumlang tista ban duwai kum ka kynhun, ryngkat lem bad ki kynthei bad ka Mari ka kmie jong U Jisu bad ki para shynrang jong u.

15Hadien khyndiat sngi, ka la don ka jingïalang jong ki riewngeit, kumba shispah arphew ngut baroh, bad u Petros u la ïeng ban kren. 16“Ko hynmen ko para jong nga,” u la ong, “ka Jingthoh Bakhuid ka dei ban urlong shisha ha kaba U Mynsiem Bakhuid u kren lyngba u Dabid, u la pynlong ka jingïathuh lypa shaphang u Judas, uba la long u nongïalam ïa kito kiba la kem ïa U Jisu. 17U Judas u la long u dkhot jong ka kynhun jong ngi, namar la lah jied ïa u ban ïadon bynta lem ha ka kam jong ngi.”

18 # Mat. 27:3-8 (Da ka pisa kaba u Judas u la ïoh na ka bynta ka kam sniew jong u, u la thied ïa ka lyngkha, ha kaba u la noh ïap ïa lade; u la pait bad ki snier jong u baroh ki la mih shabar. 19Baroh ki briew kiba shong basah ha Jerusalem ki la ïohsngew shaphang kata, bad ki la khot kyrteng ha ka ktien jong ki ïa kata ka lyngkha “Ka Akeldama,” kaba mut “Ka lyngkha ka snam.”)

20 # Salm. 69:25; Salm. 109:8 “Naba la thoh ha ka kitab ki Salm,

“ ‘Ai ba ka ïing jong u kan kylla long kaba thylli;

ai ban ym don mano mano bashong hapoh jong ka.’ ”

La thoh ruh,

“ ‘Ai ba uwei pat un shim ïa ka jaka jong u ha ka jingshakri.’

21-22 # Mat. 3:16; Mrk. 1:9; Luk. 3:21; Mrk. 16:19; Luk. 24:51 “Kumta te, uwei pat u dei ban ïasoh bad ngi kum u sakhi ïa ka jingmihpat jong u Trai Jisu. U dei ban long uwei na ki rangbah uba don hapoh ka kynhun jong ngi ha ka por baroh ba U Trai Jisu u dang leit kylleng bad ngi, da kaba sdang naduh ka por ba u Ïoannis u ïalap ïa ka khubor ka jingpynbaptis haduh ka sngi ba ïa U Jisu la shim noh sha bneng na ngi.”

23Kumta ki la tyrwa ar ngut ki rangbah: U Joseph ïa uba la khot u Barsabbas (ïa uba la tip ruh kum u Justos), bad u Matthias. 24Nangta ki la duwai, “A Trai, me tip ïa ki jingpyrkhat jong uwei pa uwei, kumta pyn-i ha ngi uno na kine ar ngut uba me la jied 25ban shakri kum u apostol ha ka jaka jong u Judas, uba la iehnoh ban leit sha ka jaka kaba u dei ban leit.” 26Nangta ki la ïakynting sbai ban jied napdeng ki ar ngut ki rangbah, bad uta uba la jied u la long u Matthias, ïa uba la pynïasoh sha ka kynhun ki khatwei ngut ki apostol.

Currently Selected:

KI KAM 1: KHACLBSI

Highlight

Copy