LUKA 4
4
Isu thlêma a um thu
(Mt 4.1-11; Mk 1.12-13)
1Chun, Isu chu Thlarau Inthiengin a sip a, Jordan vadunga inthawkin a kîr nâwk a, thlalêrah ni sâwmli Thlarau ṭhuoia umin Diebol thlêmin a um a.
2Chun, chuong nihaia chun iengkhawm a fâk naw a; chuongchun, a tâwpa chun a phîng a hung ṭâm ta a.
3Chun, Diebol chun a kuomah, “Pathien Naupa i ni chun hi lung hi beia inchang dingin thu pe rawh,” a ta.
4 #
Dt 8.3
Chun, Isûn a kuomah, “ ‘Mihriem hi bei chauin hring naw ni hai,’ ti ziek a nih,” a ta, a dawn a.
5Diebol chun a ṭhuoi tung a, mit khap kâr lovin khawvêl ram po po ân entir a.
6Chun, a kuomah, “Hieng po po chunga thuneina le ropuina hi pêng ka ti che; ka kuomah pêk a ni ta si a, ka nuom taphawt kuomah ka pêk hlak bawk a nih.
7Chuongchun, chibai mi bûk la, a rêngin i ta vawng nîng a tih,” a ta.
8 #
Dt 6.13
Chun, Isûn a kuomah, “ ‘Lalpa i Pathien chibai bûk la, ama rawng chau bâwl rawh,’ ti ziek a nih,” a ta, a dawn a.
9Chun, Diebol chun Jerusalemah a ṭhuoi a, Pathien biekin sîp zuma chun a sie a; a kuomah, “Pathien Naupa i ni chun, hitaka inthawk hin tla thla rawh;
10‘Nangma humhim ding chein
A vântirkohai chu thu pêng a tih,’ ti le,
11 #
Sm 9.11-12
‘An kutin dawm an ti che a,
Chuong naw chun i kein lung sui hlau rawi i tih,’ ti ziek a ni si a,” a ta.
12 #
Dt 6.16
Chun, Isûn a kuomah, “ ‘Lalpa i Pathien infie naw,’ ti a nih,” tiin a dawn a.
13Chun, Diebolin a thlêmna ding tinrênga a thlêm zo chun, a remchâng phaa dingin a fe san ta a.
Isu a rawngbâwlna Galilia a phut
(Mt 4.12-17; Mk 1.14-15)
14Chun, Isu chu Thlarau thilthawtheina putin Galili ramah a fe nâwk ta a; chun, a chanchin chu chu lai vêl ram tina chun ân thang ta a.
15Chun, an inkhâwmna inahai ân chûktir pei a, mi po po inpâkin a um a.
Nazaretha Isu a hnawng thu
(Mt 13.53-58; Mk 6.1-6)
16Chun, a seilienna khuo Nazareth chu a hung tlung a; Châwlnia a thaw dân pângngaiin inkhâwmna inah a lût a, tiem dingin a ngîr a.
17Chun, zâwlnei Isai lekhabu chu a kuomah an pêk a, Lekhabu ziel chu a sût a, hi thu ziekna lai hi a phar a,
18 #
Is 61.1-2
“Riengvaihai kuoma Chanchin Ṭha hril dingin Lalpân hriek a mi nal leiin,
Lalpa Thlarau chu ka chungah a um;
Ama chun salhai kuoma suokna thu le,
Mitdelhai kuoma mitvar nei nâwkna thu hril ding dâm,
Suknawmnat tuorhai insuoktirna ding dâm,
19Lalpa lungawi kum thu hril ding dâmin,
A mi tir a nih,” ti hi.
20Chun, lekhabu chu a ziel a, rawngbâwltu a pêk nâwk a, a ṭhung ta a. Chun, inkhâwmna ina mi po po mit chu ama chungah a fu a.
21Chun, an kuomah, “Hi Pathien Lekha Thu hi vawisûn hin in ihrietah a hung tlung tah,” tiin a hril ṭan a.
22Chun, an rêngin ama an inpâk a, a bausuok lunginsietna thu dâm chu mak an ti hle a. “Hi pa hi Josef naupa a ni naw am a nih?” an ta.
23Chun, ama chun an kuomah, “Hi ṭawngbau hi, ‘Dâktawr, nang insukdam rawh,’ ‘Kapernauma i thilthaw kan lo hriet taphawt kha, nangma khuo tieng khawm hin thaw ve rawh,’ tiin in mi la ti ngei âwm de hi,” a ta.
24 #
Jn 4.44; 1 Lal 17.1; 8.16; 2 Lal 5.1-14 Chun, ama bawkin, “Titakzetin ka hril cheu hi, zâwlnei tukhawm mâni khuo tieng mîn an lâwm ngai nawh.
25Chuongchun, indiktakin ka hril cheu, Elija dam laia kum thum le thla ruk vân a ping a, khawvêla ṭâm nasatak a hung tla khan, Israel ramah hmeithai tamtak an um a;
26nisienlakhawm, anni laia tukhawm kuomah Elija tir a ni naw a, Sidon ram tienga Sarepta,#Thuthlung Hluiah, “Zarephath” ti a nih nuhmei pakhat hmeithai kuoma chau tir a ni lem kha.
27Chun, zâwlnei Elisa dam lai khawm khan Israel ramah inphâr tamtak an um a; nisienlakhawm, Naaman Suria rama mi chau naw chu anni laia tukhawm sukthiengin an um naw kha,” a ta.
28Chun, inkhâwmna ina mi po po chun, chuong thu chu an hriet phingleh an lunginsen ta bêk bêk a,
29an tho tâwl a, khuoa inthawk chun an nam dawk a, pei thlâk dingin an khuo umna râwl khoa chun an ṭhuoi ta a.
30Nisienlakhawm, ama chu an kârah a fe thleng a, a fe ta pei a.
Khawhri inthieng naw iman sukdam thu
(Mk 1.21-28)
31Chun, Galili rama khuo pakhat, Kapernauma chun an zu fe a, Châwlni chun mihai ân chûktir a;
32 #
Mt 7.28-29
chun, thuneitaka a hril leiin a thu inchûktir chu mak an ti hle a.
33Chun, inkhâwmna ina chun khawhri inthieng naw thlarau nei mi pakhat a lo um a; ama chu râwl inringtakin,
34“A! Nazareth Isu, keini le nang ieng am ei inzâwlna? A mi sukbohmang dingin i hung a ni maw? Nang ka hriet che, Pathien Mi Inthieng i nih,” tiin a khêk suok a.
35Chun, Isûn a hal a, “To la, a sûnga inthawkin hung suok rawh,” a ta. Chun, khawhri chun a laiah a sukthlûk zet a, sukna lovin a sûnga inthawk chu a hung suok ta a.
36Chun, an rêngin mak an ti hle a, “Hi hi ieng thu am a ni leh? Thu neitak le thilthawtheitakin khawhri inthieng nawhai thu a pêk a, an suok hi,” tiin an inbiek a.
37Chun, chu lai ram khaw tinah a chanchin ân thang ta a.
Isûn Peter tarpinu a sukdam
(Mt 8.14-15; Mk 1.29-31)
38Chun, a tho a, inkhâwmna ina inthawk chu a suok a, Simon inah a lût ta a. Chun, Simon nuhmei nu chu nasatakin a khuo a sik a, chuongchun, a ta dingin an lo ngênpêk a.
39Chun, a kâwlah a ngîr a, khawsik chu a hal a, a bo ta a; chun, a tho nghâl ta a, an rawng a bâwlpêk ta a.
Damnaw dang tamtak a sukdam
(Mt 8.16-17; Mk 1.32-34)
40Chun, nisa tlâk ding laiin natna tum tuma na, damnaw nei taphawtin a kuomah an hung ṭhuoi a; chun, an rênga chunga chun kut ân nghat seng a, a sukdam ta pei a.
41Chun, khawhrihai khawm, “Pathien Naupa i nih,” tia khêkin, mi tamtak sûnga inthawkin an hung suok a. Chun, anni a hal a, Krista a nih ti an hriet leiin an ṭawng a phal naw a.
Isu thuhril dingin ân zin
(Mk 1.35-39)
42Chun, khawvar phingleh a suok a, thlalêr hmunah a fe a; chun, mipuihai chun an zawng a, a kuomah an hung a, anni a fe san nawna dingin chel an tum a.
43Nisienlakhawm, ama chun an kuomah, “Khaw dangahai khawm Pathien ram Chanchin Ṭha ka hril ding a nih, chu lei tak chun tir ka ni si a,” a ta.
44Chuongchun, Judai#Ziek ṭhena chu, “Galili” ti a nih rama inkhâwmna inahai thu a hril a.
Currently Selected:
LUKA 4: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
