INṬANNA 42

Josef unauhai Aiguptaah bu zawnga an hung

1 # Tt 7.12 Jakobin Aigupta ramah bu a um ti a lo hriet a, a naupasalhai kuomah, “Iengdinga in inen mei mei am a na?” a ti a.

2Ama bawk chun, “Ngai ta u, Aigupta ramah bu a um ti ka lo hriet tah: thi lova ei hring suok theina dingin chutaka chun zu fe unla, chutaka inthawk chun zûn chaw ro khai,” a ti a.

3Chuongchun, Josef uhai sâwm chu Aiguptaah bu inchaw dingin an zu fe a.

4Josef sang Benjamin ruok chu a uhai lai Jakob chun ân fetir ve naw a, “Tuok suol zu tuok hlau rawi a tih,” a ti a nih.

5Chuongchun, Israel naupasalhai chu mi fehai lai chun bu inchaw dingin an fe ve ta a, Kanaan rama khawm ṭâm a tla ve si a.

6Chun, Josef chu Aigupta ram chunga chun hotu a ni a, ama chu chu rama mi po po kuoma a zawrtu a nih: chuongchun, Josef unauhai chu an hung a, hnuoi sikin ama chibai an bûk tâwl a.

7Josef chun a uhai chu a lo hmu a, anni chu a lo hriet tâwl hle a; nisienlakhawm, mi dang anga hriet naw tehlêm thawin inrawmtakin anni a biek a, “Khawlaia inthawka hung am in ni a?” a ti a. Anni chun, “Bu inchaw dinga Kanaan rama inthawka hung kan nih,” an ti a.

8Josef chun a uhai rawi chu a lo hriet a, anni ruok chun ama chu an hriet si naw a.

9 # Gen 37.5-10 Chun, Josef chun anni chungchâng thu manga a hmuhai kha a hung hriet suok ta a, an kuomah, “Enthlatuhai in ni hi, ram ruokzie en dinga hung in ni hi tie,” an lo ti a.

10Anni chun a kuomah, “Ni lo e, Pu, i siehlawhai hi bu inchaw dinga hung kan nih.

11Mi pakhat nau vawng kan ni a, mi indiktak kan nih, i siehlawhai hi enthlatuhai kan ni naw tawp el,” an ti a.

12Ama chun an kuomah, “Ka awi nawh, ram ruokzie en dinga hung in ni hi maw,” a ti a.

13Anni chun, “Keini i siehlawhai hi unau sâwmpahni, Kanaan rama um, mi pakhat nau kan nih: chun, ngai ta, kan mi tlum tak tuhin kan pa kuomah a um a, pakhat ruok chu a um ta naw a nih,” an ti a.

14Josef chun an kuomah, “ ‘Enthlatuhai in ni hi,’ ka ti kha in ni ngei hi.

15Hieng ang hin infiein um in tih: in mi tlumtak chu hitaka hin a hung naw chun Pharao hringna sâlin hitaka inthawk hin suok naw ti niu ti ka hril cheu.

16Nangniah thutak a um le a um naw infiena dingin nangni laia mi pakhat tir unla, in sangpa chu hung ṭhuoi raw se; nangni ruok chu khuopin lo um phawt in tih: chuong naw chun Pharao hringna sâlin, ‘Enthlatuhai in nih,’ ka ti ngei ding cheu a nih,” a ti a.

17Chun, an rêng chun ni thum ân tângtir tâwl a.

18A ni thum ni chun Josef chun an kuomah, “Hieng ang hin thaw unla hring in tih, Pathien ka ṭi si a:

19mi indik in ni chun, in unau laia mi pakhat in intângna ina hin khuopin um sienla, a dang po chu fe unla, in sûnghai ṭâm ta ding chun bu phur ro:

20chun, in mi tlumtak chu ka kuomah hung ṭhuoi ro; chuongchun, in thu chu fieng a ta, in thi naw ding a nih,” a ti a. Chuongchun, chuong ang chun an thaw ta a.

21 # Tv 5.22; 11.21; Mt 7.2 Chun, anni chun, “Ei sangpa chunga ei thilthaw kha ei thiemnaw tak tak a ni hi, lunginsiet dinga a mi ngên ṭâwk ṭâwk laia, a lungril lunginzîngzie hre zing sia ei ngaipêk nuom naw kha: chuleiin, hi lunginzîngna hin a mi hung nel ve a ni ta hi,” an in ti a.

22Chun, Reuben chun, “Naupang chungah thil suksuol naw ro ka ti naw cheu am a nih? in ngai naw a, chuleiin, ngai ta u, a thisen phuba chu an lâk a ni hi,” tiin anni chu a dawn a.

23An kâra ṭawng inlettu a um leiin Josef chun an thu hril chu a hriet ti an hriet naw a.

24Chun, ama chu ân her hmang a, a ṭap ta a: chun, an kuomah a kîr nâwk a, anni a biek a, anni laia Simeon chu a tumin a ṭhuoi a; an mithmua chun a khuop ta a.

Josef unauhai Kanaan rama an Kîr thu

25Chun, Josef chun an bâwmhai chu bua suksip ding le an tangkahai an ipa sie nâwk seng ding le, lampuia dinga fâk ding pe dingin thu a pêk a: chuong ang chun an thaw pêk tah 26Chun, an bu chu an sabengtunghai chu an inphurtir a, chutaka inthawk chu an suok ta a.

27Anni laia mi pakhatin riebûka chun a sabengtung bu pe dinga a ip a hang hawng chun, a tangka chu a hmu ta el a, a ip bau bula chun a lo um a.

28Chuongchun, a unauhai kuoma chun, “Ka tangka kha an lo sie nâwk a ni hi tie, en ta u, ka ipa hi a lo um zing el,” a ta: chun an lung a kak rak a, “Pathienin hieng anga a mi thaw hi iengtizie am a ni aw?” tiin, inthin pumin an inen tâwl a.

29Kanaan rama an pa kuom chu an hung tlung a, an chunga thil hung tlung po po chu an hril a.

30“Chu an ram hotu chun inrawmtakin a mi biek a, ram enthlatuah a mi ruot a.

31Chun, keini chun a kuomah, ‘Mi indiktak kan nih, enthlatuhai kan ni naw tawp el,

32unau sâwm le pahni kan nih; kan pa naupasalhai kan ni vawng a, pakhat chu a um ta naw a, kan mi tlumtak chu tuhin Kanaan ramah kan pa kuomah a um a nih,’ kan ti a.

33Chun, ram hotu chun kan kuomah, ‘Hieng ang hin mi indiktak in nih ti hre thei ka tih, in unau pakhat ka kuomah mâksan unla, in sûnghai ṭâm ta ding chun bu phur unla, fe ta ro: chun in mi tlumtak chu ka kuomah hung ṭhuoi ro:

34chuongchun, enthlatuhai in ni naw a, mi indiktak in ni lem ti hrieng ka tih; chun, in unaupa hi pe nâwk ka ti cheu a, hi rama hin sumdâwng tâng in tih,’ a mi ti a nih,” an ti a.

35Chun, an iphai chu an bun ruok chun, ngai ta, an tangka fûn seng chu an ip senga chun a lo um a; chun, anni le an pa chun an tangka fûn chu an hmu chun an ṭi hle a.

36Chun, an pa Jakob chun an kuomah, “Nangni hin ka nauhai in mîn sûntir a ni hi: Josef a um ta naw a, Simeon a um ta naw a, Benjamin chen khawm ṭhuoi hmang in tum nâwk pei a: chuong thil po po chun a mi baw buoi a ni ta hi,” a ti a.

37Chun, Reuben chun a pa kuomah, “I kuomah ka hung ṭhuoi nâwk naw leh ka naupasalhai hi that el de ti ni: ama chu ka kutah mîn kawltir la, i kuomah hung ṭhuoi nâwk el ka tih,” tiin a hril a.

38Ama chun, “Ka naupa hi nangni leh fe thla ve naw tawp a ti, a u a thi ta a, ama bak hi a ni ta si a: in fena lampuia dâm tuoksuol zu tuok sienla, ka lu inṭuok hi lungngaitakin thlânah in inliemtir ding a nih,” a ti a.

Currently Selected:

INṬANNA 42: HMOVBSI

Highlight

Copy