INṬANNA 41
41
Josefin Pharao mang a hrilfie
1Chun, kum hni zet hnungah Pharao chun mang a nei a: Nile vadung panga hin a lo ngir a.
2Bâwngpui pasari naltak tak, thâutak tak tuia inthawka hung suok a, phairuong laia tla hi a hmu a.
3Chun, bâwngpui dang pasari bertak tak, chêrtak tak hi tuia inthawk bawka an hnunga hung suok ve chu a hmu a, bâwngpui danghai kâwlah vadung panga chun an lo ngîr a.
4Chun, bâwngpui bertak tak, chêrtak tak chun bâwngpui naltak tak, thâutak tak chu an fâk zo el ta a. Chun, Pharao chu a ṭhanghar ta a.
5Chun, a hang in nâwk a, mang a nei nâwk chun, bu kûng khata hin vui sari lientak tak, ṭhatak tak an hung suok a.
6Chu hnunga chun vui sari chitê te khawsak thliin a mût ṭâwl bir berhai chu an hung suok nâwk a.
7Chun, vui chitê têhai chun vui sari lientak tak, ṭhatak takhai chu an lem zo el ta a. Chun, Pharao chu a ṭhang a, a mang a lo ni zing el ti a hriet a.
8Chun, zîngtieng chun a lunginzîng ta hle el a; chuongchun, mi a tir a, Aigupta rama mitvaidawithiem po po le mivar po po chu a ko a; Pharao chun a mang chu a lo hril tâwl a: nisienlakhawm, Pharao hrilfie thei tukhawm an um naw a.
9Chun, uoin pe hotu tak chun Pharao kuomah, “Vawisûn hin ka suksuolzie ka hriet suok tah:
10Pharao a siehlawhai chungah a lunginsen a, vêngtu pâwl hotu ina chun kei le bei siem hotu tak chu a mîn tângtir a;
11Chun, kei le ama chun zân khatah mang kan nei a, mang umze tum ve ve a nih kan nei chu.
12Chutaka chun kan kuoma vêngtu pâwl hotu siehlaw, Hebrai mi, tlangvâl pakhat a um a: ama chu kan hril a, ama chun kan manghai chu a mi hril a, kan mang ang dungzui pei chun a mi hrilfiepêk ve ve a.
13Chun, a mi hrilfie ang tak chun a hung um ta ngei a nih: kei chu ka sinthaw hi a mîn thawtir nâwk a, ama chu a khaihlum ta a,” a ti a.
14Chuongchun, Pharao chun Josef chu ân kotir nghâl ta a, inhmawtakin ripa inthawk chun an ṭhuoi suok ta a; chun, ama chu ânvaw fai a, a silfên chu a thleng a, Pharao kuomah a hung lût a.
15Chun, Pharao chun Josef kuomah, “Mang ka nei a, a hrilfie thei tukhawm an um naw a, nangin mang hi a thu i hriet chun i hrilfie thei ti i chanchin mi hril ka lo hriet a,” a ti a.
16Josef chun Pharao chu a dawn a, “Chu chu keimaa um a ni naw a, Pathienin Pharao chu thlamuongthlâktakin dawn lem a tih,” a ti a.
17Chun, Pharaoin Josef kuomah, “Ngai ta, ka manga chun Nile vapanga hin ka lo ngîr a,
18bâwngpui pasari naltak tak, thâutak tak hi tuia inthawk chun an hung suok a, phairuong lai hin an lo tla a:
19chun, bâwngpui dang pasari bertak tak, chêrtak tak le inthirtak tak, chuong ang hrima sie Aigupta ram po poa khawm ka la hmu ngai naw hi, an hnungah an hung suok ve a;
20chun, bâwngpui bertak tak, chêrtak takhai chun bâwngpui pasari thâutak tak hung suok hmasahai chu an fâk zo el ta a.
21Amiruokchu, an fâk zo hnung khawm chun tu khawma an fâk ti an hriet chuong nawh, a phuta ang bawk khan an la ber zing a. Chun, ka ṭhang ta a.
22Chun, ka manga chun bu kûng khata vui sari lientak tak, ṭhatak tak hung suok ka hmu bawk a;
23chu hnunga chun vui sari vuoi sil sel, chite te, khawsak thli imût ṭâwl bir ber hi an hung suok nâwk a:
24chun, vui chite tehai chun vui sari ṭhatak takhai chu an lem zo el ta a. Chun, mitvaidawithiemhai chu ka hril a, nisienlakhawm, a mi hrilfie thei tukhawm an um si naw a,” tiin a hril a.
25Chun, Josef chun Pharao kuomah, “Pharao mang hi thuhmun a nih: Pathienin a thilthaw ding Pharao ân hriettir a ni chu.
26Bâwngpui pasari ṭhatak takhai chu kum sari an nih, bu vui sari ṭhatak takhai khawm chu kum sari an ni bawk a; mang chu thuhmun a nih.
27An hnunga bâwngpui pasari bertak tak, chêrtak tak hung suokhai chu kum sari an nih; bu vui sari a si ruok khawsak thli imût ṭâwl bir berhai khawm chu: chuong chu ṭâm kum, kum sari ding a nih.
28Chu chu a nih Pharao kuoma ka hril kha: Pathienin a thilthaw ding Pharao ân hriettir a ni hi.
29Aigupta ram sûng po poa hin hausakna nasatak kum sari a hung tlung ding a nih;
30chu hnunga chun ṭâm kum, kum sari hung um nâwk a tih, chuongchun, hausakna po po kha Aigupta rama hin theinghil vawng ni tâng a tih; ṭâm chun ram hi fa se zo a tih:
31hausakna kha a zuitu ṭâm lei chun hi rama hin hre ta naw ni hai, a nasa hle ding a ni si a.
32Chun, Pharao mang ân nei nawntirna che chu hi lei hi a nih, thil thaw ding chu Pathienin a sukdet a, Pathien bawkin ân tlungtir vak ding leiin.
33Chuleiin, tuhin Pharao chun mi pakhat vartak, bengvârtak zawng suok sienla, Aigupta ram chunga hin hotuah inumtir raw se.
34Pharaoin chu chu thaw sienla; chun, ram chunga hin hotuhai ruot sienla, hausak kum, kum sari sûng chun Aigupta ram bu hi hmun ngaa ṭhea hmun khat pei la khâwm raw hai se.
35Anni chun chuong kum ṭhat kum hung tlung dinga bu po po chu Pharao thuneinain la khâwmin, fâk dingin khuoahai sung khâwmin vawng ṭha raw hai se.
36Chuongchun, ṭâm leia ram hi a bohmang nawna dingin, bu chu ṭâm kum, kum sari, Aigupta rama hung tlung ding sûnga ding chun, hi ram ta ding hin inringlâwkna ding nîng a tih,” a ti a.
Josef Aigupta ram rorêltua siema a um
37Chu thu chu Pharao le a siehlawhai po po chun ṭha an ti zâwng tak a ni a.
38 #
Tt 7.10
Chun, Pharao chun a siehlawhai kuomah, “Hieng ang, Pathien thlarau umna mi hi, ei hmu zo ding am a nih?” a ta.
39Pharao bawk chun Josef kuomah, “Pathienin chuong po po chu ân hriettir che leiin, nang anga bengvâr le var hrim hi an um nawh:
40nang hi ka sûnghai chunga hotuah um i ta, ka khuoletui po po i thu thuin um a tih: lalṭhungphaa ṭhung thua chau hin nanga nêkin inlal ka tih,” a ta.
41Pharao bawk chun Josef kuomah, “En ta, Aigupta ram sûng po poa hin hotuah ka siem che,” a ti a.
42 #
Dan 5.29
Chun, Pharaoin a kuta inthawkin a hming namna kutsebi chu a phawi a, Josef kutah ân buntir a, puon zai inhmia siem silfênhai ân hâktir bawk a, a rîngah rângkachak khaidiet ân hlîtir a;
43Chun, a tawlailîr nei pahninaa chun ân chuongtir a, a hmaa chun, “Dingṭhaṭhuon#NIV Lam inkien ro. Hi thumal hi Hebraia dingṭhaṭhuon tina le lam rîk chau inang Abrek ni tak âwm a nih ro,” tiin an khêk pei a; chuongchun, Aigupta ram po po chunga chun hotuah a siem ta a.
44Chun, Pharaoin Josef kuomah, “Kei Pharao ka nih, nanga thu naw chun Aigupta ram sûng po poa hin tukhawmin an kut amanih, an ke amanih inlet naw ni hai,” a ta.
45Chun, Pharaoin Josef hmingah Zaphenath-paneah ân bûk a: On khaw thiempu Potiphera naunu Asenath chu nuhmeiah ân neitir bawk a. Chun, Josef chu a suok a, Aigupta ram chu a fang ta a.
46Josef chu Aigupta lal Pharao hmaa a ngîr laiin kum sâwmthum mi a nih. Chun, Josef chu Pharao kuoma inthawk chu a suok a, Aigupta ram po po chu a fang suok ta a.
47Chun, kum ṭhat kum, kum sari sûng chun hnuoi chun hlâwktakin bu an suo hlak a.
48Aigupta rama kum ṭhat kum, kum sari hung tlunga bu po po chu a lâk khâwm a, bu chu khuohaia chun a sung khâwm ta a; khaw tinah a vêl lova bu seng chu a sung khâwm pei a.
49Chuongchun, Josef chun bu chu tamtak, tuisuorieta phaiphin zâtin a sung khâwm rei rui el a, ân khi khawm chu a ma ta hiel a, inkhi sêng ruol a ni ta si naw a.
50Ṭâm hung tlung hma chun Josef chun naupasal pahni a nei a, chuhai chu On khaw thiempu Potiphera naunu Asenath chun a neipêk a nih.
51Josef chun a nau lutîr hminga chun Manasse#Hebraia “theinghil” tinaa inthawka lâk ni takin ân lang a sak a, “Pathienin kân rimna po po le ka pa sûnghai chu a mîn theinghiltir ta si a,” a ta.
52Chun, a nau pahnina hminga chun Ephraim#Hebraia “ṭum hni ra insuo” tina a ang tak a sak a, “Pathienin ka rinum tuorna rama hin chi a mîn thlatir ta si a,” a ta.
53Kum ṭhat kum, kum sari, Aigupta rama hung tlung chu a hung bo ta a.
54 #
Tt 7.11
Chun, ṭâm kum, kum sari chu Josef hril ang takin a hung tlung phut ve ta a: ram tinah ṭâm a hung tla ta a, Aigupta ram sûng poa ruok chun fâk ding a um a.
55Aigupta rama mi po po chu an ṭâm phingleh Pharao kuomah fâk ding hniin an khêk a. Pharao chun Aigupta mi po po kuoma chun, “Josef kuomah fe unla, a hril taphawt cheu chu thaw ro,” a ti a.
56Ṭâm chu ram po poa a hung tla phing chun Josef chun an sung khâwmna in po po chu a hawng a, Aigupta mihai kuoma chun a zawr a: Aigupta rama chun ṭâm chu a tla nasa hle a.
57Chun, hnuoi chung po poa ṭâm chu a tlâk nasat hle leiin ram tina mihai chu bu inchaw dingin Aiguptaa Josef kuoma chun an hung a.
Currently Selected:
INṬANNA 41: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
