INṬANNA 40
40
Josefin lung in intânghai mang a hrilfie
1Chuong thil hnunga chun Aigupta lal uoin petu le a bei siemtu chun an pu Aigupta lal chu an suklungninaw a.
2Chuongchun, Pharao chu a siehlaw pahni, a uoin pe hotu tak le, a bei siem hotu tak chunga chun a lunginsen ta a.
3Chuongchun vêngtu pâwl hotu inah, intângna in, Josef khuopa a umnaa chun, ân tângtir ta a.
4Vêngtu pâwl hotu chun Josef chu anni ân enkawltir a: chuongchun, ama chun anni chu a nghâk a, an rawng a bâwl ta a: chun, ni iengzat lai amanih an intâng phawt a.
5Chun, intângna ina khuopa um, Aigupta lal uoin petu le bei siemtu chun, an pahniin zân khatah mang umze tum ve ve an nei a.
6A zînga zîngkâr chun Josef chu an kuomah a va lût a, anni chu lungngai hmêl deuin a va hmu a.
7Chun, ama chun, “Iem a tia vawisûn chu lungngai hmêl in va put de?” tiin, Pharao siehlaw hotuhai, a pu ina ama kuoma intâng vehai chu ân dawn a.
8Anni chun a kuomah, “Mang kan nei a, a mi hrilfie thei tukhawm an um si nawa a nih,” an ti a. Josef chun an kuomah, “Mang hrilfienahai chu Pathien ta a ni naw am a nih? Lunginsiettakin mi hang hril ta u,” a ti a.
9Chuongchun, uoin pe hotu tak chun a mang chu Josef a hril a, a kuomah, “Ka manga chun ka hmaa hin grêp hrui a lo um a,
10grêp hruia chun a kau pathum a um bawk a; chun, inder suok angin a lo um a, pârhai a lo hung suok a: a pâr bâwrhai chun grêp hminhai a hung insuo ta a.
11Chun, Pharao no chu ka kuta hin a lo um a; chuongchun, grêp rahai chu ka lo a, Pharao noa chun ka sâwr a, no chu Pharao kutah ka lo pêk a,” a ta.
12Josef chun a kuomah, “Hi hi a hrilfiena a nih: a kau pathum chu ni thum a nih.
13Tuta inthawk ni thuma chun Pharaoin i lu dawm kâng a ta, i sinthaw chu inthawtir nâwk a ti che: chuongchun, a uoin petu i ni laia i pêk dân pângngai ang khan Pharao no chu a kutah i pêk nâwk ding a ni chu.
14Amiruokchu, i chan ṭhat nâwk pha chun mi hung hre zing la, lunginsiettakin lunginsietna ka chungah hung inlangtir la, Pharao kuomah ka chanchin hung hril la, hi ina inthawk hin mi ṭhuoi suok rawh.
15Hebrai mihai rama inthawka miin ân rûka an mîn rûk hmang ka ni a, hi rama khawm hin rip sûnga an mi khumna khawp iengkhawm ka suksuol nawh,” a ti a.
16Bei siemtu chun hrilfiena chu a ṭha ti a hrietin Josef kuomah, “Kei khawm mang ka nei a, bei vâr leikhâwr pathumin ka lo sipsuon a;
17chun, leikhâwr chunghnung taka chun Pharao bu, beisiemtuin a siem, chi tinrêng hi a lo um a; chuong chu vatehaiin ka leikhawr sîpsuona inthawk chun an lo fâk mur mur a,” a ti a.
18Josef chun a dawn a, “Hi hi a hrilfiena a nih: leikhâwr pathum chu ni thum a nih;
19tuta inthawka ni thuma chun Pharaoin i tisaa inthawkin i lu chu dawm kâng a ta, thing lêrah khai a ti che; chuongchun, vatehaiin i sa chu an fâk mur mur ding a ni chu,” tiin.
20Chun, ni thum ni, Pharao pieng champhaphâk ni chun, Pharaoin ama siehlaw po pohai ta dingin ruoi a ṭhe a; chun, a siehlawhai laia mi uoin pe hotu tak le bei siem hotu tak lu chu a dawm kâng ta a.
21Uoin pe hotu tak chu uoin pe hotuah ân ṭhangtir nâwk a; chuongchun, no chu Pharao kuta chun a pêk ta a;
22bei siem hotu tak ruok chu a khai ta a, Josefin an kuoma a hrilfie ang tak khan.
23Nisienlakhawm, uoin pe hotu tak chun Josef chu a hriet zing awzâwng ta naw a, a theinghil ta a.
Currently Selected:
INṬANNA 40: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
