INṬANNA 37
37
Josef le a unauhai
1Jakob chu a pa khuolchâmna Kanaan rama chun a um ta a.
2Hieng hi Jakob thlahai chu an nih: Josef chu kum sâwmpasari a niin a uhai, a pa nuhmeihai Bilha le Zilpah naupasalhai leh ran ruol an inthla a. Josef chun an suol thukhawchâng chu a pa kuomah ân tlun a.
3Chun, Israel chun Josef chu a tar tieng nau a ni leiin a nauhai po po nêk chun a hmangai lem a; chuongchun, zakawfuol rawng tamtaka ṭiel a siempêk a.
4An pa chun ama chu a uhai po po nêkin a hmangai lem ti a unauhaiin an hriet chun ama chu an theida ta hle a, ṭawngbau ṭha hrim a chungah an rawl thei ta naw a.
5Chun, Josef chun mang a nei a, a uhai kuoma a hril chun ama chu an theida zuol ta a.
6Ama chun an kuomah, “Lunginsiettakin ka mang thu hi lo ngai ro:
7ngai ta u, loa hin buphalhai ei lo intêl a, ngai ta u, ka buphal chu a hung tho a, a ngîr ta a; in buphalhai chun an hung inhuol a, ka buphal chu chibai an bûk tâwl a,” a ti a.
8A uhai chun a kuomah, “Nang tehin kan chungah ro i rêl vei ding maw? Nang tehin kan chungah thu i nei vei ding maw?” an ti a. Chuongchun, a mang lei le a thuhril lei chun ama chu an theida nâwk zuol det a.
9Chun, mang dang a nei nâwk a, a uhai chu a hril nâwk a, “Ngai ta u, mang ka nei nâwk a, nisa, thla le arasi sâwmpakhat khin chibai an mi lo bûk chu tie,” a ti a.
10Chun, a pa chu a hril a, a uhai khawm; chun, a pa chun a kâwk a, a kuomah, “Mang i nei hi ieng mang am a ni lie? Kei le i nu le i uhai hin hnuoi sikin chibai kan bûk hlak ding che am a nih?” a ti a.
11 #
Tt 7.9
Chun, a uhai chun ama chu an îtthîk a, a pa ruok chun a thuhril chu lungrilin a vawn zing a.
Aiguptaah Josef zawrin a um
12Chun, a uhai chu Sekema chun an pa ran ruol chu inthlain an fe a.
13Israel chun Josef kuomah, “I uhaiin Sekemah a ni maw ran ruol chu an inthla? hung ta, an kuomah tir ka ti che,” a ti a. Ama chun, “Mi tir ta la,” a ta.
14A pa chun a kuomah, “I uhai an dam am, ran ruol khawm an dam am va en la, an chanchin mi hung hril nâwk raw aw,” a ti a. Chuongchun, Hebron ruoma inthawk chun a tir suok a; ama chun Sekem chu a va tlung ta a.
15Chun, mi tuin amanih phûla ân vâk ân vâk lai chun a hmu a; chuongchun, mi chun, “Iengam i zawng leh?” tiin ân dawn a.
16Ama chun, “Ka uhai ka zawng a nih: lunginsiettakin ran ruol an inthlâna chu mi hril ta khai,” a ti a.
17Mi chun, “Hitaka inthawkin an suok kha tie, ‘Dothanah fêng ei tiu,’ an ti chu ka hriet,” a ti a. Chun, Josef chun a uhai chu a hnawt a, Dothana chun a va hmu a.
18Anni chun hlataka inthawkin an lo hmu a, an kâwl hnai a tlung hmain ama thatna ding thu an lo rawt ta a.
19“En ta u, mang neipa a hung saw.
20Thaw ro, that ei ta, khur pakhatah thlâk ei tiu khai; chun, ‘Sain a se tah,’ ei ti el ding annâwm: chuongchun, a manghai chu iengtin am a um hre el ei tih,” an inti tâwl a.
21Reuben ruok chun chu chu a lo hrietin an kuta inthawk chun a sansuok a, “A that êm chu that nâwng ei tiu,” a ti a.
22Reuben bawk chun a pa kuoma ṭhuoi nâwkna dinga an kuta inthawk chu a sansuok theina dingin, an kuoma chun, “Thisen chu insuo naw ro, thlalêra khura hin thlâk unla, kut chu a chunga hin thlâk naw ro,” a ti a.
23Chun, Josef chun a uhai kuom a va tlung chun, ama chu a zakawfuol rawng tamtaka ṭiel a ihâk chu an lo hlîppêk a;
24an ṭhuoi a, khurah an thlâk ta a: khur chu a ruok tui um nawna a nih.
25 #
Heb 1.7; Am 6.6 Chun, bu fa dingin an hang ṭhung tâwl a; chun, an hang dâk a, Ismael inzinpâwl Gileada inthawk an sanghâwngseia riminhnik, thing hnai damdawi le murra phura Aiguptaa zu fe ding hunghai chu an hmu a.
26Chun, Juda chun a unauhai kuomah, “Ei sang ei that a, a thisen suok ei ip chun iengam ṭhathnemna um a ta?
27Thaw ro, a chungah kut thlâk lovin Ismael mihai kuoma sawn zawr el lem ei tiu; ama hi ei sang, ei tisa ngei a ni si a,” a ti a. A unauhai chun a thu chu an zâwm ta a.
28 #
Tt 7.9
Chun, Midian mihai sumdâwng an hung a; chuongchun, Josef chu khura inthawk chu an khai suok a, Ismael mihai kuoma chun Josef chu tangka sawmhniin an zawr ta a, anni chun Josef chu Aiguptaah an ṭhuoi ta a.
29Reuben chu khura chun a hung kîra Josef chu khurah a lo um ta nawh ti a hmu chun a silfênhai a keithlêr a,
30chun, a sanghai kuom tieng a kîr nâwk a, “Bawipu kha a um ta nawh, kei hi khaw tieng am fe tâng ka ti le aw?” a ta.
31Chun, Josef zakawfuol chu an lâk a, kêlchal an thata a thia chun zakawfuol chu an inchie a.
32Chun, zakawfuol chu an inphur a, an pa kuoma chun an hung chawi a, a kuomah, “Hi hi kan hmu ringawt a, i naupa zakawfuol a ni am a ni naw en ta,” an ti a.
33Ama chun a lo hriet el a, “Ka naupa zakawfuol a ni hi, sahrângin a se a ni hi aw, Josef chu keinawi nengin a um ni ngei a tih,” a ti a.
34Chun, Jakob chun a silfênhai a keithlêr a, saiip puon a dierkei a, ni sâwttak a naupa chu a sûn a.
35A naupasalhai po po le a naunuhmeihai po po chu ama thlamuon dingin an tho a; nisienlakhawm, ama chun thlamuon a nuom naw a, “Ni lo, lusûn pumin thlânah ka naupa kuomah ka fe ding a nih,” a ti a. Chuongchun, a pa chu ama ngaiin a ṭap hlak a.
36Chun, Midian mihai chun Josef chu Aiguptaah Pharao hnuoia hotu pakhat, vêngtu pâwl hotu Potiphar kuoma chun an zâwr a.
Currently Selected:
INṬANNA 37: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
