INṬANNA 35

Pathienin Bethelah Jakob mal a sâwm

1Chun, Pathienin Jakob kuoma chun, “Tho la, Bethelah hang fe la, chutaka chun um rawh: i u Esaua inthawka i tlân hmang laia i kuoma inlâr Pathien ta ding khan chutaka chun maichâm siem rawh,” a ti a.

2Chuongchun, Jakob chun a sûnghai le a kuoma umhai po po kuoma chun, “Nangni laia mi dang pathien umhai chu sie hmang dai unla, insukthiengin in silfênhai inthleng ro:

3tho ei ta, Bethelah fêng ei tiu: chuongchun, ka lunginzîng laia mi dawna, ka fenaa ka kuoma um pei Pathien ta ding khan maichâm siem ka tih,” a ta.

4Chuongchun, mi dang pathien an kuta um po po le, an naa nabe an ibe po po chu Jakob an pêk a, chun Jakob chun Sekem khaw kâwla thingsaisuo hnuoia chun a thuphmang ta a.

5Chun, an fe a, an vêla khuohai chun an lo ṭi nasa hle a, Jakob naupasalhai chu an hnawt ngam naw a. 6Chuongchun, Jakob chun Kanaan rama Luz khuo (chu chu Bethel) chu a tlung a, ama le a kuoma umhai po po leh.

7Chun, chutaka chun maichâm a siem a, a u kuoma inthawka a tlân hmang lai khan chutaka chun Pathien a kuoma ân lâr leiin a hmun chu, “El-Bethel,”#Bethel Pathien ân bûk a.

8Chun, Rebeka dawntu Debora chu a thi a, Bethel thlanga thingsaisuo hnuoia chun an phûm a; thingsaisuo hminga chun “Ṭapna thingsaisuo”#Allon Bakuth an inbûk ta a.

9Chun, Jakob chu Paddan-aram rama inthawka a hung nâwk chun Pathien a kuomah ân lâr nâwk a, mal a sâwm a,

10Pathien chun a kuomah, “I hming hi Jakob a ni a, i hming hi Jakob ti nâwk ta naw ni hai chea, i hming chu Israel ni lem tâng a tih,” a ta; chuongchun, a hminga chun Israel ti a ni ta a.

11Pathien bawk chun a kuomah, “Kei Pathien Iengkimthawthei#Heb. El Shaddai ka nih: chi tamtak inthlain hung pung rawh. Chi ti khawp le chi tum tum um khâwm khawm nanga inthawkin la hung um an tih; i ṭhalbea inthawkin lalhai khawm la hung suok bawk an tih.

12Abraham le Isak kuoma ram ka pêkhai hi i kuomah pêng ka ti che, i um naw hnunga i thlahai kuoma khawm ram hi pe pei ka tih,” a ti a.

13Chun, Pathienin ama a biekna hmuna inthawk chun Jakob chu a fesan ta a.

14Chun, a biekna hmuna chun Jakobin ban (lung ban) a phun a, a chunga chun thilinhlân dâwn mi a buok a, a chungah sahriek a buok bawk a.

15Chun, Jakob chun Pathienin ama a biekna hmun hminga chun Bethel ân bûk a.

Rakil thi thu

16Chun, Bethela inthawk chun an fe a; Ephrath tlungna ding chu hla rei a la ni a, Rakil chun nauha ân vawi a, na deu el hin ân vawi ta a.

17Chun, nataka ân vawi lai chun nau dawm mi chun, “Ṭi naw rawh, naupasal dang i nei ding a ni hi,” a ti a.

18Chun, a thlarau a suok ding lai chun (a thi ta si a) a hminga chun Ben-oni#Ka lunginzîngna naupa a sak a; a pa ruok chun Benjamin#Ka changtieng naupa a sak a.

19Chuongchun, Rakil chu a thi a, Ephrath lampuia chun an phûm a (Ephrath chu Bethlehem a nih).

20Chun, a thlân chunga chun Jakobin lung a phun a. Chu chu tu chen a Rakil thlân Lungphun la um chu a nih.

Jakob naupasalhai

21Chun, Israel chu a fe pei a Eder. Insâng#Migdal-Eder khêla chun puon in a zar ta a.

22Israel chu chu rama a um lai chun, Reubenin a pa thaikêm Bilha chu a va zâlpui a; chun, Israel chun chu chu a hriet a. Tuhin Jakob naupasalhai chu sâwmpahni an ni tah.

23Leah naupasalhai chu Reuben (Jakob nau lutîr), Simeon, Levi, Juda, Issakar le Jebulun an nih.

24Rakil naupasalhai chu Josef le Benjamin an nih.

25Rakil suoknu Bilha naupasalhai chu Dan le Naphtali an nih.

26Leah suoknu Zilpah naupasalhai chu Gad le Aser an nih. Chuong chu Jakob naupasal, Paddan-aram rama pienghai chu an nih.

Isak thi thu

27Chun, Jakob chu Abraham le Isak khuolchâmna hmun Kiriatharba (Hebron an ti bawk) Mamrea a pa Isak kuom chu a tlung ta a.

28Chun, Isak dam sûng chu kum za le sâwmriet a nih.

29Chun, Isak chun a thlarau ân thla a, upatak, tarkûna damin a thi a, a chipuihai kuoma ṭhuoiin a um ta a: chun, a naupasalhai Esau le Jakob chun an phûm ta a.

Currently Selected:

INṬANNA 35: HMOVBSI

Highlight

Copy