THILTHAWHAI 8
8
Kristienhai suknawmnatna le indarna
1Chu ni chun, kohran Jerusalema umhai chu mîn nasatakin an suknawmna ṭan ta a; chuongchun, tirkohai bak naw chu Judai le Samari ram khaw tinah an indar ta vawng a.
2Chun, Pathien ngaisak tuhaiin amanih Stephan chu an phûm a, nasatakin an ṭap a.
3Saula ruok chun kohranhai chu a suknawmna bêk bêk a, in tinah a lût a, a nuhmei a pasalin a hnûk dawk a, intângna inah a khum hlak a.
Samari ramah Chanchin Ṭha hril a nih
4Chun, ân darhai chu khaw tinah an fe a, thu chu an hril pei a.
5Chun, Philip chu Samari khuoah a zu fe a, an kuomah Krista thu a khêk pui a.
6Mipuihaiin a thu an hriet a, a thilmak thawhai an hmu chun Philip thu hril chu lungril hmunkhatin an ngaisak a,
7khawhri inthiengnawhai chu mi tamtak an imanhai sûnga inthawkin rawl inringtaka khêka an suok leiin le, zeng le keinbai tamtak khawm an hung dam ta leiin.
8Chun, chu khuoa chun nasatakin an lâwm ta a.
9Chun, a hming Simon, mi pakhat a um a; ama chun, chu khuoa chun dawi hmangin Samari khuoa mihai maktitakin a lo siem ta hlak a.
10Mi po po chun mi setaka inthawka ân laltak chenin, “Hi mipa hi Pathien thilthawtheina, ‘Ropui,’ an ti kha a ni hi,” tiin a thu an ngaisak tâwl hlak.
11A dâwi hmangin sâwttak mak titaka a siem hlak leiin a thu an ngaisak a nih.
12Nisienlakhawm, anni chun Pathien ram chanchin ṭha le Isu Krista hming Chanchin Ṭha Philip hril chu an âwi phingleh, a nuhmei a pasalin baptisma an chang ta a.
13Chun, Simon rau khawmin a âwi ve ta a, chun baptisma a chang zo chun, Philip kuomah a um zing a. Inchikna le thilmak nasatak thawa umhai chu a hmu ve a, mak a ti hle hlak a.
14Chun, tirko Jerusalema umhai khan Samari khuoa mihaiin Pathien thu an awi ti an hrietin, an kuomah Peter le Johan chu an tir a.
15Anni chu an zuk tlung chun Thlarau Inthieng an hmu theina dingin an ṭawngṭaipêk a.
16Chu hma chun anni laia tu chunga khawm a la tlung nawh; Lal Isu hmingin baptisma an chang chau a la nih.
17Chun, an chungah an kut an innghat a, Thlarau Inthieng an hmu ta a.
18Chun, tirkohai kut innghat leia Thlarau Inthieng pêk a nih ti Simonin a hmu a,
19“Hi thuneina hi mi pe ve ro, tû chunga khawm kut kân nghatna taphawtin Thlarau Inthieng an hmu vena dingin,” tiin an kuomah tangka pêk a tum a.
20Nisienlakhawm, Peterin a kuomah, “I tangka hi nanga ruolin bohmang raw se, Pathien thilpêk tangka suma inchâwk i tum leiin.
21Hieng thua hin i ṭhang ve nawh, chan khawm i nei bawk nawh; i lungril Pathien ngaiin a fel nawh.
22Chuleiin, i suol hi sim la, Lalpa kuomah ṭawngṭai rawh, chuongchun, i lungrila i ngaituo hi a ngaidam thei khiet che rawi mawh.
23Thil khâkna mîta le, suol khuop thlûkna hmunah i um ti ka hriet a nih,” a ta.
24Chun, Simonin, “In thil hril hi ka chunga iengkhawm a tlung nawna dingin nangnîn Lalpa kuomah mi ṭawngṭaipêk ro,” a ta, a dawn a.
25Chuongchun, anni chun Lalpa thu chu an inhriettira an hril zoin, Jerusalemah an fe nâwk ta a; Samari rama mihai khaw tamtak kuomah Chanchin Ṭha chu an hril pei a.
Philip le Ethiopia mitillâk chu
26Chun, Lalpa vântirko pakhatin Philip chu a biek a, “Tho la, sim tienga Jerusalema inthawka Gaza zuk sun lampuia khan fe rawh, chu lampui chu thlalêra fe thleng a nih,” a ta.
27Chuongchun, a tho a, a fe ta a. Chun, ngai ta, Ethiopia rama mi pakhat, Ethiopia lalnu Kandaki hnuoia mitillâk inlaltak, a ro po po enkawltu, Jerusalemah Pathien be dingin a hang fe a.
28A hung tieng chun a tawlailîra ṭhung pumin zâwlnei Isai lekhabu a tiem pei a.
29Chun, Thlarau chun Philip kuomah, “Saw tawlailîr saw va hnai la, va pâwl rawh,” a ta.
30Chun, Philip chu mitillâk kuoma chun a va tlân a, zâwlnei Isai lekhabu a tiem a hriet a, “I tiem kha a umzie i hriet am?” a ta.
31Ama chun, “Tukhawmin an mi hrilfie naw chun, iengtin am hre thei ka ta?” a ta. Chun, a kuoma hung ṭhung dingin Philip chu a fiel ta a.
32Pathien Lekha a tiem lai chu hi hi a nih:-
“That dingin berâm angin ama chu an ṭhuoi a;
Berâmtê a hmul vâwtu hmaa a to zing angin,
Ama khawmin a bau a ka nawh;
33 #
Is 53.7-8
A tlâwm laiin a rorêlna chu lâkpêkin a um a;
A thlahai chanchin tuin am hril tâng an ta?
Khawvêla inthawkin a hringna an lâkpêk ta si a,” ti hi.
34Chun, mitillâk chun Philip a biek a, a kuomah, “Zâwlneiin hieng thu hi tû thu am a na a hril, ama thu am a ni, mi dang thu? kân dawn che,” a ta.
35Philip chun a hril a, chu Pathien Lekha Thu chu a bulah a ṭan a, a kuomah Isu thu a hril a.
36Chun, lampuia an fe malamin tui umna an tlung a; chun, mitillâk chun, “En ta, hitaka hi tui a um, baptisma chang dingin iengin am a mi hluo a?” a ta.
37[Chun, Philip chun, “I lungril po poa i ring chun, i chang thei,” a ta. Ama chun, “Isu Krista chu Pathien Naupa a ni ka ring,” a ta, a dawn a].#Ziek ṭhenah Ch.37 na hi a um nawh.
38Chun, tawlailîr chu ân ngîrtir a, an pahni chun, Philip le mitillâk chu tuia chun an zu fe a; chun, Philip chun ama chu a baptis ta a.
39Tuia inthawk chu an hang suok phingleh, Lalpa Thlarau chun Philip chu a lâk hmang ta a; mitillâk chun ama chu a hmu nâwk ta naw a, nisienlakhawm, hlimtakin a fe ta pei a.
40Philip chu miin Azota khuoah an hmu nâwk ta a; chun, a fe thleng a, Kaisari khuo a tlung hmakhat chun, khaw tinah Chanchin Ṭha chu a hril pei a.
Currently Selected:
THILTHAWHAI 8: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
