THILTHAWHAI 7

Stephan thuhril

1Chun, Thiempu Laltak chun, “Hieng thu hi ân dik am?” a ta.

2Chun, Stephan chun, “Unauhai, pahai ngai ta u, ei thlatu Abraham Harana a um hmaa, Mesopotamia rama a um lai khan Ropuina Pathien chu a kuomah a hung inlâr a,

3 # Gen 17.1 a kuomah, ‘I khuoa inthawk le i chihai laia inthawkin suok la, ram ka lân entir ding che tieng chun fe rawh,’ a ta.

4 # Gen 11.31; 12.4,7; 13.15; 15.18; 17.8 Chun, ama chu Kaldaihai rama inthawkin a suok a, Haranah a va um ta a; chun, a pa a thi hnungin chutaka inthawkin hi tuta in umna khuo tieng hin Pathienin ân pêm lûttir a.

5Chun, hitaka hin chu iengkhawm hmun hluo ding, a ke innghatna khawp khawm a pêk naw a; nisienlakhawm, ama le a hnunga a thlahai chena ro dingin pêk a tiem a, nau a la nei hma ngei khawmin.

6 # Gen 15.13-14 “Chun, Pathienin hieng ang hin a hril:- ‘A thlahai mi khuo tieng kum za li thang an tih, miin suokah siem an ta,suknawmna bawk an tih,’ tiin.

7Chun, Pathienin, ‘Suoka neitu ding hnam chu keiin la ngaituong ka tih, chun, chu zoa chun hung suok an ta, hi hmuna hin ka rawng la bâwl an tih,’ a ti bawk a.

8 # Gen 17.10-14; 21.2-4; 25.26; 29.31; 35.18 Chun, Pathienin a kuomah sertan thu kha a thlung a, chuongchun, Abraham chun, Isak a hung nei a, a ni riet niah a ser a tan a; chun Isak chun Jakob a nei a, Jakob chun chi thlatu sâwm le pahnihai kha a hung nei ta a.

9 # Gen 37.11; 39.2,21 “Chun, chi thlatuhai khan Josef an îtthik a, Aigupta tieng an zawr a, nisienlakhawm, Pathien a kuomah a um a.

10A rinum tuor po poah a san suok pei a, Aigupta ram lal Pharao khawm ân lunginsiettir a, mi vartak a ni ti ân hriettir bawk a. Chuongchun, ama chun Aigupta ram le a ina mi po po chungah hotuin a siem ta a.

11 # Gen 41.39-41; 42.1-2 “Chun, Aigupta le Kanaan ram po poa chun ṭâm a hung tla a, rinum nasatak a hung tlung ta a; ei thlatuhai chun fâk ding hrim hrim an hmu ta naw a.

12Nisienlakhawm, Jakob chun Aiguptaah bu a um ti a hriet phingleh ei thlatuhai chu a tir suok a; chu chu an fe phutna tak a nih.

13 # Gen 45.1,16 Chun, an fe a vawi hninaa chun, Josef chu a unauhai kuoma chun ân hriettir a, chun Josef unauhai chu Pharao an inhriettir ta a.

14 # Gen 45.9-10; 46.1-7; 46.27; 49.33 Chun, Josef chun a pa Jakob le a unauhai po po ân kotir a; anni chu sâwmsari le panga an nih.

15Chuongchun, Jakob chu Aigupta ramah a zu fe a, chutaka chun ama le ei thlatuhai chu an thi ta a,

16 # Gen 23.3-16; 33.19; 50.7-13; Jos 24.32 Sekem khuo an zâwn tlung a, Abrahamin Sekem khuoa Hamor naupahai kuoma thlân, tangka suma a inchâwka khan an phûm ta a.

17 # Ex 1.7-8,10-11,22 “Chun, Pathienin Abraham kuoma thu a tiem kha a hung tlung hun chu a tlung dingin, mihai chu Aiguptaa chun an pung a, an tam ta deu deu a,

18Josef hre naw lal dang a hung um chen khan.

19Ama chun ei chihai chu a zaihlêm a, a suknawmna a, an nautêhai dam lo dingin ân pei suoktir hlak.

20 # Ex 2.2,3-10 Chu lai chun, Mosie a hung pieng a, a hmêl a ṭha bêk bêk a, a pa inah thla thum an châwm a.

21Chun, an pei suok chun Pharao naunu chun a lâk a, ama nau dingin a châwm ta a.

22“Chun, Mosie chu Aigupta mihai varna po po an inchûktir a, a thu le a thilthawah a ropui bêk bêk a.

23 # Ex 2.11-15; 18.3-4 Chun, ama chu kum sâwmli a tling ding vêlin a unau Israel thlahai chu kan a tum a.

24Chun, anni laia mi pakhat sukrinum tuor lai a hmu a, a san a, suknawmnatna tuortu phuba chu a lâk a, Aigupta mi chu a sukhlum ta a.

25Mosie chun ama kutin Pathienin anni a sanhim ding ti a unauhaiin an hriet amanih a ta, nisienlakhawm, an hriet si nawh.

26Chun, a zîngah anni laia mi pahni an insuol laiin an kuom a hung tlung a, ‘Puhai, unau in nih annâwm; iengdinga indiknawtakin in inthaw am?’ tiin anni rem a tum a.

27Nisienlakhawm, a ruolpa chunga a kawmawpa lem chun Mosie a nampei a, ‘Kan chungah rorêltu le hotuin tuin am a siem che a?

28Zânita Aigupta mi i sukhlum ang khan, mi sukhlum i tum a ni maw?’ a ta.

29Chun, chu thu lei chun Mosie a tlân hmang a, Median ramah a thang zing a, chutaka chun naupasal pahni a nei a..

30 # Ex 3.1-10 Chun, kum sâwmli a tling hnungin Sinai tlâng thlalêrah chîmbukah meichawk lai vântirko pakhat a kuomah ân lâr a.

31Chun, Mosiein a hmu chun, a thil hmu chu mak a ti hle a; chun, en dinga a va hnai laiin, Lalpa rawlin,

32‘Kei i thlatuhai Pathien ka nih, Abraham Pathien, Isak Pathien, Jakob Pathien chu,’ a lo ti a. Chuongchun, Mosie chu ân thin a, a en ngam ta naw a.

33Chun, Lalpa chun a kuomah, ‘I kephaa inthawkin i kekawk kha sût rawh, i ngîrna hmun kha hnuoi inthieng a nih.

34Aiguptaa ka mi umhai chu an rimsikzie ka hmu zing a, anni sanhim dingin ka hung ṭum a nih. Hung ta, Aiguptaah tir ka ti che,’ a ta.

35“Chu Mosie, ‘Hotu le rorêltu dingin tuin am a siem che a?’ tia an sêl chu, chîmbuka vântirko a kuoma inlâr khan a ṭhangpui a, Pathienin ama ngei chu hotu le sanhimtu ni fâwm dingin a tir a nih.

36 # Ex 7.3; 14.21; Nam 14.33 Ama chun Aiguptaa dâm, Tuipui Sena dâm, thlalêra dâm chun kum sâwmli sûngin thilmak le inchiknahai inhmutirin anni a ṭhuoi suok ta a.

37 # Dt 8.15,18 “Israel mihai kuomah ‘Pathienin kei a mi siem ang hin, in unauhai laia mi zâwlnei pakhat siempêk a ti cheu,’ titu kha a nih, chu Mosie chu.

38 # Ex 19.1; 20.17; Dt 5.1-33 Ama chu thlalêra pungkhâwmhai laia Sinai tlânga betu vântirko kuoma le ei thlatuhai kuoma um kha a nih; ama chu a mi pêk sâwng dinga thu hringhai latu kha a nih.

39Ei thlatuhai chun a thu an zâwm nuom naw a, an sêl a, an lungrilhai chu Aigupta ram tieng a lêt nâwk ta a.

40 # Ex 32.1-6 Aron kuomah, ‘Kan hmaṭhuoitu dingin pathienhai mi siempêk rawh, Mosie Aiguptaa mi ṭhuoi suoktu hlak hi a chanchin kan hriet ta si naw a,’ an ta.

41Chun, chuonglai chun sebâwngte lim an siem a, a lim chu ran thatin an biek a, anni kutsuok chunga chun an hlim ta a.

42Chuongchun, Pathienin a nghat san a, vâna arasihai chibai an bûk theina dingin anni a ensan ta a; Zâwlnei Lekhabua,

‘Israel chihai, thlalêra khan kum sâwmli sûngin,

Sa that le ran thatin kei in mi biek am a nih?

43 # Am 5.25-27 Molok puon in le pathien Rephan arasi khawm chu,

Chibai bûk dingin a lim in siemhai kha,

In zâwm lem hlak a;

Chuleiin, Babulon khaw khêl tieng

Ṭhuoi hmang ka ti cheu,’ ti ziek ang khan.

44 # Ex 25.9,40 “A lim a hmu anga siem dinga Mosie hriltuin a ruot ang khan, ei thlatuhaiin thlalêra khan inhriettirna puon in chu an nei a.

45 # Jos 3.14-17 Chu bawk chu ei thlatuhai thla nâwk khawmin an nei sâwng pei a, Pathienin ei thlatuhai hmaa Jentail a hnawt suokhai ram an hluo lai khan Josua lût ruolin an lûtpui a; David hung um chen khan chutaka chun a um ta zing a.

46 # 2 Sam 7.1-16; 1 Chr 17.1-14 Chu David chu Pathien mithmuin ditsak tlâkin a um a, Jakob Pathien ta dinga umna ding siempêk a hni a.

47 # 1 Lal 6.1-38; 2 Chr 3.1-17 Nisienlakhawm, Solomonin in chu a bâwlpêk ta lem a.

48Nisienlakhawm, Achunghnungtak chu kuta bâwl inhaia a um ngai nawh; zâwlnei chun:-

49Lalpain, ‘Vân ka ṭhungpha a na,

Hnuoi ka kepha innghatna a nih;

In ieng angin am mi bâwlpêk in ta?

Ka châwlna hmun khawm ieng am a na?

50 # Is 66.1-2; 63.10 Keia kutin hieng thil iengkim hi ka siem naw am a nih? a tih, ti ziek ang khan.

51“Mi kâwmawhai, lungril le naa sertanlohai, in thlatuhaiin an thaw hlak ang khan, Thlarau Inthieng chu in dodâl kumkhuo a nih.

52In thlatuhaiin zâwlnei lai an suknawmnat naw tu am an um a? Mi feltak hung ding thu hril lâwktuhai kha an sukhlum a; tuhin nangni ama inmantirtu le sukhlumtuhai in hung ni tah.

53Vântirkohai ipêk sâwng Dân kha hmu zeta zâwm si lohai,” a ta.

Stephan thina

54Chun, chuong thu chu an hrietin an lungril a khei ta a, Stephan chunga chun an ha an râwt a.

55Nisienlakhawm, ama chu Thlarau Inthienga sip a na, vân tieng a en tlat a, Pathien ropuizie le Pathien changtienga Isu ngir a hmu a,

56“Ngai ta u, vân inhawnghai ka hmu a, Pathien changtienga Mihriem Naupa ngîr khawm ka hmu,” a ta.

57Chun, anni chu rawl inringtakin an khêk a, an na an hip a, inthuruolin an thaw a.

58Khuoa inthawk chu an hnawtsuok a, lungin an dêng a. A hretuhai chun tlangvâl pakhat a hming Saula ke bula chun an puonhai an sie tâwl a.

59Chuongchun, Stephanin, “Lal Isu, ka thlarau la rawh,” tia Lalpa a ko laiin lungin an dêng mur mur a.

60Chun, a dingṭhaṭhuon a, rawl inringtakin a khêk a, “Lalpa, hi an thil suksuol hi an chungah maw inphurtir naw rawh,” a ta. Chu thu chu a hril zo phingleh a ininnghil ta a. Saula khawm chun a thi chu a remti a.

Currently Selected:

THILTHAWHAI 7: HMOVBSI

Highlight

Copy