2 KORINTH 6
6
1Chun, Pathien lunginsietna chu ṭhathnempui lova in hmu nawna dingin, ama thawpuiin ka ngên cheu a nih.
2 #
Is 49.8
“Hun lâwmumah ka ngaithlâk che a,
Sandamna niah ka ṭhangpui che,” a ti si a.
Ngai ta u, tu hi hun lâwmum chu a na; ngai ta u, tu hi sandamna ni chu a nih.
3Kan rawngbâwlna sin chu an dem nawna dingin ieng kawnga khawm tlûkphâna ding hrim hrim kan siem naw a;
4Pathien rawngbâwltuhai angin iengkimah mi mit tlungin kan um lem hlak, nasataka selnaa dâm; hnawchêpnaa dâm,
5 #
Tt 16.23
vuoknaa dâm, lungin intângnaa dâm, buoinaa dâm, sininrimnaa dâm, intheinawnaa dâm, bu ngheinaa dâm,
6inthiengnaa dâm, hrietnaa dâm, dawtheinaa dâm, ngilneinaa dâm, Thlarau Inthienga dâm, hmangaina taktaka dâm;
7Thutak thua dâm, Pathien thilthawtheinaa dâm, changtieng le vawitienga felna hriemhreihaiin,
8sukropuina le sukmuolphonain, hming hril siet le hming hril ṭhatin, hlêmtu angin, mi indiktak ni siin,
9mi hriet khawp naw angin, hming inthangtak siin, thi vâng vâng angin, ngai ta u, kan hring si a; thunun angin sukhluma um si lovin;
10lungngai angin, nisienlakhawm, lâwm rawp siin; pasie angin, nisienlakhawm, mi tamtak sukhausa siin; iengkhawm neilo angin, iengkim hau siin.
11Aw, Korintha mihai, in kuomah kan bau kan ka a, kan lungril kan hawng lien pêk cheu,
12keinîn kan lungril kan khârpêk cheu a ni naw a, nangnîn in mi khârpêk lem a nih.
13Chuongchun, nauhai kuoma hril ang elin ka hril cheu; nangni tienga lungril kan put ang hi, mîn hmutir ve unla, in lungril hawng lien ve ro.
Pathien hring biekin
14Awinawhai leh inruolnawtaka rîngkawl bât hmunkhatin um naw ro; rîtlona le felnain ieng am inṭawmna an nei a? Annawleh, inthim le varin ieng am inpâwlna an nei a?
15Belier le Krista khawmin ieng am inngeina an nei a? Annawleh, awinaw le awitu chun ieng am chan hmunkhat an nei a?
16 #
1 Kor 3.16; 6.19; Lev 26.12; Ezek 37.27 Milimhai le Pathien biekin khawmin ieng am inremna an nei a? Eini chu Pathien hring biekin ei ni si a; Pathienin,
“Anniah um ka ta,
Anniah lêng bawk ka ta;
Chun, an Pathien nîng ka ta,
Anni khawm ka mihai nîng an tih”,
a ti ang khan.
17 #
Is 52.11
Chuleiin, “Anni laia inthawkin hung suok unla,
A tumin um ro, thil inthiengnaw hrim khawm them naw ro,
Lalpain a tih,”
Chuongchun, “Lâwm ka ti cheu a,
18 #
Sm 7.14; 1 Chr 17.13; Is 43.6; Jer 31.9 In ta dingin Pa nîng ka ta,
Nangni khawm keia ta dingin naunu naupa ning in tih,”
Lalpa iengkimthawthei chun a tih.
Currently Selected:
2 KORINTH 6: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
