ROM 1

Chibai bûkna

1Paula, Isu Krista suok, tirko ni dinga ko, Pathien Chanchin Ṭha hril dinga ṭhethlâka um lekhathawn:

2Chu Chanchin Ṭha chu Pa- thienin inhmata a lekha inthieng- haia zâwlneihai baua a ilo tiem tah, a Naupa ei Lalpa Isu Krista thu chu a nih.

3Tisa tienga chun ama chu David suona insieng a na,

4inthiengna Thlarau tieng thua ruok chun mithi laia inthawka a thonâwkna chun Pathien Nau a ni zie thilthawtheina nasatakin ân hriettir a;

5A hming leia hnam tin laia mi ringna thu chu inzâwmtir dingin; ama zâra chun lunginsietna le tirko nina chu kan chang tah a;

6nangni khawm chuonghai lai chun Isu Krista ta ni dinga ko chu in nih.

7Rom khuoa Pathien idittakhai, mi inthieng ni dinga kohai po po kuomah; Pathien ei Pa le Lalpa Isu Kristaa inthawka lunginsietna le inremna in kuomah um raw se.

Paulain Rom sir a tum

8A hmasatakin, khawvêl po poah in ringna thu ân thang leiin in rênga chunga ka lâwm thu, Isu Krista zârah ka Pathien kuomah ka hril a nih.

9A Naupa Chanchin Ṭha hrila ka thlaraua a rawng ka ibâwl Pathien chu a mi hrepuitu a nih; ka ṭawngṭainahaia chun maloin in hminghai ka lam rawp a.

10Tu bêk hin in kuoma ka hung theina dingin Pathien remti ang anga, hung inzinna remchâng ka nei tei tei theina dingin ka hni rawp hlak.

11In detna dinga Thlarau tieng thilpêk iengamanih ka pêk theina ding cheuin hmu cheu kân hâwk hle a nih.

12Chu chu in ringna le keia ringnain ei inthlamuon tuo theina dingin ka tina a nih.

13 # Tt 19.21 Unauhai, Jentail danghai laia kân rimna ra ka hmu ta ang bawkin, nangni lai khawm a ra ka hmu theina dingin, in kuoma hung vawi tamtak ka tum tah ti in hriet naw ka nuom nawh; nisienlakhawm, kha hma po khan chu dangin ka um rawp a.

14Grik mihai le hnamchawmhai kuomah bat ka nei, mi var le mi invêthai kuoma khawm.

15Chuongchun, nangni Rom khuoa mihai kuoma khawm Chan- chin Ṭha ka theitâwpa hril dingin inzosa zinga um ka nih.

Chanchin Ṭha thilthawtheina

16Chanchin Ṭha chu kân zâpui si nawh a, tûkhawm a awihai po ta dinga sandamna dinga Pathien thilthawtheina a ni sih a; a phutin Juda mi ta dingin, chun, Grik mihai ta ding khawmin a hung nih.

17 # Mk 8.38; Heb 2.4 Chutaka chun awi nâwkzuolna dingin, ringnain Pathien felzie chu a hung inlang a, “Ringna leia mifel chu hring a tih” tia ziek ang khan.

Jentailhai suol zie

18Thutak fel nawtaka dangtuhai Pathien ngaisak nawna le fel nawna po po chunga chun vâna inthawkin Pathien lungsen a hung inlang a nih.

19Pathienin ân hriettir ta leiin, Pathien chanchin hriet dinghai chu an lungrilah inhriettirin a um sih a.

20Amaa mizie hmu thei lo hai, a chatuon thilthawtheina le a Pathien nizie chu, leihnuoi siem tîra inthawkin chiengtaka hmuin a um a, thilsiema chun ân lang a nih; chuleichun, suonlam ding hrim an nei nawh;

21 # Eph 4.1-18 Pathien hre zing siin Pathien angin an chawimawi nawh a, lâwmthu khawm an hril bawk si nawh. Teplo mei mei an ngaituo lem tah a, an lungril invêt chu a hung inthim tah a.

22Vara inngaiin invêt an lo ni tah a,

23 # Dt 4.16-18 Pathien thi thei lo ropuina chu, mihriem thi thei dâm le vatehai dâm, sapheimanli le thilhringhai lim angah an inchangtir tah a.

24Chuleichun, an taksa inzakum- taka insiem tuo dingin an lungril inhâwk anga pawrchêtaka um phalin Pathienin a nghatsan tah a.

25Pathien thutak chu khêla inchangtirin, a siemtu biek nêkin a isiemhai chu bein an rawng an bâwl ta lem sih a. A siemtu chu kumkhuoa inpâk tlâk a nih! Amen.

26Chuleichun, Pathienin inzak- umtaka hur phalin a nghatsan a; an nuhmeihai rau khawma an um dân insiengpui chu dân naw anga um dingin an insuk danglam sih a;

27pasalhai khawm nuhmei le inhmang dân pângngai chu bânsana hurin, ân hnarin an inhnar tuoh a; pasal le pasal khawm ṭha nawtakin an inthawh a, an suol man hmu ding chu anni le annia chun an hmuh a.

28Chun, Pathien hriet an nuom naw leiin, thil mawi naw tak tak thaw dinga a dit naw zâwng lungril nei phalin Pathienin a nghatsan tah a;

29chuongchun, rîtlona tinrêng dâm, suolna tinrêng dâm, inhnarna tinrêng dâm, lungril ṭhat nawna tinrêng dâmin an hung sip tah a; îtsîkna dâm, tuolthatna dâm, inhalna dâm, inhlêmna dâm, lungril setak dâma sip an na; inberu hmanghai,

30mi rêl hmanghai, Pathien theida zâwnghai, intiveihai, chapo- hai, mi uonghai, thil suol thar suksuoktuhai, nu le pa thu awi lohai,

31hrietthiemna bo, thu tiem bawsietuhai, piengpui lunginsietna nei naw mihai, lunginsietna nei naw mihai an lo ni tah a;

32chuong ang thawtuhai chu thi tlâk an nih, ti Pathien iruot chu hre zing siin, anni chau khawma thaw loin, mi dang a thawhai chunga khawm chun an lâwm bawk a.

Currently Selected:

ROM 1: HMARCLBSI

Highlight

Copy