MARKA 10
10
Nuhmei mâk thua inchûktirna
(Mt 19.1-12; Lk 16.18)
1Chun, a tho a, chutaka inthawk chu Judai ram le Jordan râlah a fe tah a; chun, mi- puihai chu a kuomah an hung inkhâwm nâwk a, chuongchun, a thaw dân ta ang rawpin a lo inchûktir nâwk a.
2Chun, Pharisaihai ṭhenkhat a kuomah an hung a, ama fiena dingin “Mîn a nuhmei a mâk a thieng am?” tiin an indawn a.
3Ama chun an kuomah, “Mosien iengtin am thu a pêk cheu a?” tîn a dawn a.
4 #
Dt 24.1-4; Mt 5.31 Chun, anni chun, “Mosie chun inmâkna lekha inziekin mâk a phal hlak a nih,” an tih a.
5Nisienlakhawm, Isûn an kuomah, “In lungril ngar leiin a nih in sawnnaw chu thu chu ân ziekpêk cheu chu.
6 #
Gen 1.27; 5.2 Nisienlakhawm, leilung insîeng tîra inthawk chun, ‘Anni chu nuhmei le pasalin a siem a nih,’
7‘Chuleichun, pasalin a nu le pa mâksan a ta, a nuhmei chel a ta;
8 #
Gen 2.24
chuongchun, an pahni chun tisa pumkhat lo ni tâng an tih, chuongchun, pahni an ni ta nawh a, tisa pumkhat an lo ni ta lem a nih’.
9Chuleiin, Pathienin a izawm ta hnung chu mihriemin ṭhe naw raw se,” a ta.
10Chun, ina chun, a închûk- tirhaiin chuong thu chu an indawn nâwk a.
11Ama chun an kuomah, “Tû- khawm a nuhmei mah a, mi dang nei taphawt chun a nuhmei chu a retsan a nih;
12ama khawm chun a pasal inṭhepuia mi dang a nei chun a uire a ni bawk,” a ta.
Isûn naupangtehai mal a sâwm
(Mt 19.13-15; Lk 18.15-17)
13Chun, a ithem dingin naupang- tehai an hung ṭhuoi a; chun, inchûktirhai chun an lo hal a.
14Nisienlakhawm, Isûn chu chu a hmuin a lung a ni naw bêk bêk a, an kuoma chun, “Naupangtêhai ka kuomah inhungtir unla, khap naw ro; Pathien ram chu hieng ang mihai ta a ni sih a.
15 #
Mt 18.3
Titakzetin ka hril cheu, tû- khawm Pathien ram chu naupang- têin a lâwm anga lâwm naw phawt chu a sûngah lût naw tawp an tih,” a ta.
16Chun, annirawi chu a hang kuoh a, an chungah kut innghatin mal a sâwmpêk tah a.
Tlangvâl hausa chatuon hringna zawngtu chu
(Mt 19.16-30; Lk 18.18-30)
17Chun, fe dinga a suok laitakin mi pakhat a kuom tieng a hung tlân a, a hmaah a dingṭhaṭhuon a, a kuom- ah, “Inchûktirtu ṭha, kumkhuoa hringna ka nei theina dingin ieng am thâwng ka ta?” tiin ân dawn a.
18Chun, Isu chun a kuomah, “Iengdinga ṭha i mi ti? Mi pakhat chau naw chu tukhawm ṭha an um nawh, chu chu Pathien a nih.
19 #
Ex 20.13-16; Dt 5.17-20 Thupêkhai chu i hriet annâwm: ‘Tuol that naw, Uire naw, Inru naw, Hrietpuina inkhêl pe naw, Hlêm naw, I nu le pa chawimawi rawh,’ tihai hi,” a ta.
20Chun, ama chun a kuomah, “Inchûktirtu, chuong thu po po chu naupang chîte ka ni laia inthawkin ka zâwm hlak,” a ta.
21Chun, Isûn ama chu a en a, a hmangai tah a, a kuomah, “Kawng khat i la bâk, fe la, i nei taphawt zawr la, pasiehai kuomah pe rawh, chuongchun, vânah ro nei i tih; chun, hung la mi hung zui rawh,” a ta.
22Nisienlakhawm, chuong thu lei chun a hmêl chu a hung inthim khup el a, lungzîngtakin a fe hmang tah a, sum tamtak nei mi a ni sih a.
23Chun, Isûn a en vêl a, a închûk- tirhai kuoma chun, “Sumhauhai chu Pathien rama lût a vân tak âwm deh e,” a ta.
24Chun, inchûktirhai chun, a thu hril chu mak an ti hle a, Isu ruok chun a dawn nâwk a, an kuomah, “Nauhai, sum ringhai ta ding chun Pathien rama lût a vân tak hlak deh aw;
25Mihausa Pathien rama a lût nêkin sanghâwngsei ṭhim naa a lût thleng awl lem a tih,” a ta.
26Chun, anni chun mak an ti nasa bêk bêk a, a kuomah, “Anleh, tu am sandam ni thei an ti leh?” an ta.
27Isûn anni chu a en a, “Chu chu mihriem ta dingin thaw ruol a ni nawh a, Pathien ta ding ruok chun thaw ruol lo a ni nawh; Pathien ta dingin iengkim thaw thei a ni sih a,” a ta.
28Peterin a kuomah, “Ngai ta, keinîn iengkim mâksanin kan zui cheh a,” tiin a hang hril phut a.
29Isu chun, “Titakzetin ka hril cheu, tûkhawm keia lei le Chanchin Ṭha leia in amanih, unaupahai amanih, farnuhai amanih, nu ama- nih, pa amanih, nauhai amanih, ram dâm khawm amanih fe san taphawt chu,
30hi dam sûng ngei khawm hin, inhai, unaupahai, farnuhai, nuhai, nauhai, ramhai dâm a lêt zain, suknawmnatnahai leh, hmu naw ding tukhawm an um nawh, hun la hung tlung dinga chatuona hringna leh.
31 #
Mt 20.16; Lk 13.30 Nisienlakhawm, mi tamtak a hmasataka umhai chu a nuhnung- takah la um an ta, a nuhnungtakhai khawm chu a hmasatakah la um an tih,” a ta.
A thi ding thu a hrillâwk vawithumna
(Mt 20.17-19; Lk 18.31-34)
32Chun, Jerusalema hang fe dingin lampuiah an um a; Isu chu a hmasah a. Anni chun mak an ti hleh a, a hung zuituhai chun an ṭih a. Chun, ama chun sâwm le pahnihai chu a tumin a ṭhuoi nâwk a,
33“Ngai ta u, Jerusalemah ei hang fe nâwk ding a ni hi; Mihriem Naupa hi thiempu lalhai le Dân inchûk- tirtuhai kuoma inmantirin a la um ding a nih. Anni chun thi dingin a chungah thu rêlthlûng an ta, Jentailhai kuomah pêng an tih.
34Chun, nuizat siemnân hmang an ta, chil sâk khum an ta, vuong an ta, sukhlum an tih; chun, ni thum chenah thonâwk a tih,” tiin a chunga thil hung tlung dinghai chu an kuomah a hril tah a.
Jakob le Johan thil hni chu
(Mt 20.20-28)
35Chun, Zebedai naupahai Jakob le Johan chun ama chu an hung hnai a, a kuomah, “Inchûktirtu, i kuomah kan hni dinghai hi i mi thawpêk kan nuom,” an ta.
36Chun, ama chun an kuomah, “In ta dingin ieng am thawpêk inla cheu in nuom a?” a ta.
37Anni chun a kuomah, “I ropuinaa chun i changtieng pakhat, i vawitieng pakhat mîn ṭhungtir rawh aw?” an ta.
38Isu ruok chun an kuomah, “In hni chu in hriet naw a nih. Ka no dâwn ding chu in dâwn thei am a nih? Ka baptisma chang ding khawm chu in chang thei am a nih?” a ta.
39Chun, anni chun a kuomah, “Thei e,” an tih a. Chun, Isûn an kuomah, “Ka no dâwn ding chu dâwn in ta, ka baptisma chang ding khawm chu chang vêng in tih;
40Nisienlakhawm, ka chang- tienga manih ka vawitienga manih, ṭhung ding thu chu keia pêk ding a ni nawh a, an#Ziek ṭhenah chun, “an” hi “ka” ti a nih ibuotsaipêkhai ta ding ni lem a tih,” a ta.
41Chun, sâwmhai chun chu chu an lo hrietin Jakob le Johan chunga chun an lungninaw ta bêk bêk a.
42 #
Lk 22.25-26
Isu ruok chun annihai chu a ko a, an kuomah, “Jentailhai chunga rorêltua an iruothai chu an chungah an inlal bêk bêk hlak a, an mi lienhai chun an chungah thu an nei nasa hle ti in hriet a.
43Nangni lai ruok chun chuong chu ni naw nih, tukhawm in laia mi lien ni nuom phawt chu in rawngbâwltuin a um lem ding a nih!
44 #
Mt 23.11; Mk 9.35; Lk 22.26 Tukhawm nangni laia a hmasatak ni nuom phawt chu mi po po rawng bâwltuin a um bawk ding a nih.
45Mihriem Naupa meu khawm rawngbâwlpêka um dinga hung a ni nawh a, mi tamtak intlanna dinga a hringna pe ding lema hung a ni sih a,” a ta.
Mitdel Bartimai sukdama a um
(Mt 20.29-34; Lk 18.35-43)
46Chun, Jeriko an hung tlung a; chun, Isu Jerikoa inthawk chun a închûktirhai leh, mipui nasatak leh a suok laiin kutdaw mitdel, Timai naupa Bartimai chu lampui sîrah a lo ṭhung a.
47Chuongchun, Nazareth Isu a nih ti a hriet phingin, “Isu David naupa, mi lunginsiet rawh,” tiin a khêk tah a.
48Mi tamtakin to dingin an hal a; nisienlakhawm, ama chun, “David naupa, mi lunginsiet rawh,” tiin a khêk zuol det a.
49Isu chu a lo ngîr a, “Ama chu hung ko ta u,” a ta. Chun, mitdel chu an ko a, a kuomah, “Lungmuongtakin um rawh, a ko che,” an ta.
50Chun, ama chun a puon a pei a, ân châwm tho a, Isu kuomah a feh a.
51Chun, Isûn ama chu a lo biek a, “I chungah ieng ang am ka thaw i nuom a?” a ta. Chun, mitdel chun a kuomah, “Rabboni, hmu thei ka nuom,” a ta.
52Chun, Isûn, “Fe ta rawh, i ring- na hi i dampui a nih,” a ta. Chuongchun, a hmu thei nghâl tah a, lampuia chun Isu a zui tah a.
Currently Selected:
MARKA 10: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
