MATTHAI 8
8
Phâr sukdam
(Mk 1.40-45; Lk 5.12-16)
1Tlânga inthawka a hung ṭumin mipui nasatakin ama an zui tah a.
2Chun, ngai ta, a kuomah phâr a hung a, “Lalpa, i nuom chun i mi sukthieng thei,” tiin chibai a bûk a.
3Isûn a hang ban a, a them a, “Ka nuom ie, lo inthieng ta rawh,” a ta, kâr loin a phâr chu a lo inthieng nghâl tah a.
4Chun, Isûn a kuomah, “Tu- khawm hril lo dingin fîmkhur rawh aw; amiruokchu, thiempu kuomah vân entir la, Mosiein pêk dinga a ruothai kha inhlân rawh, an hriet felna dingin,” a ta.
Sipai za hotu suokpa sukdam thu
(Lk 7.1-10)
5Chun, Kapernaum a lûtin, a kuomah sipai za hotu a hung a,
6“Lalpa, ka naupang a zeng a, inah a zâl zing a, nasataka suknatin a um a nih,” tiin a ngên a.
7Ama chun a kuomah, “Hung ka ta, sukdam ka tih,” a ta.
8Sipai za hotu chun, “Lalpa, ka in sûng i lûtna tlâk a ni nawh ie; thu chau hril la ka naupang dam el a tih.
9Kei khawm mi thua um ka na, ka hnuoiah sipaihai an um a; chu mipa kha mipa chu, ‘Fe rawh,’ ka ti leh a fe hlak; mi dang kuoma khawm, ‘Hung rawh,’ ka ti leh a hung hlak, ka suok kuoma khawm, ‘Ahi thaw rawh,’ ka ti leh a thaw hlak,” tiin a dawn a.
10Isûn chuong thu chu a hrietin mak a ti hleh a, ama zuituhai kuoma chun, “Titakzetin ka hril cheu, Israel- hai lai khawm hieng ang lâwma ringna nasa hi ka hmu nawh.
11Ka hril cheu hi, sak le thlanga inthawkin mi tamtak hung an ta, vân rama chun Abraham hai, Isak hai, Jakob hai kuomah ṭhung an ta;
12ram nauhai ruok chu tuol inthima chun hnawt dawkin um an ta; chutaka chun ṭap le harâwt chu um a tih,” a ta.
13Chun, Isûn sipai za hotu kuoma chun, “Fe ta rawh, i ring angin i chungah hung tlung raw se,” a ta. Chuongchun, naupang chu chu dâra chun a lo dam tah a.
Peter tarpinu sukdam thu
(Mk 1.29-31; Lk 4.38-39)
14Chun, Isu chu Peter ina a lûtin, a nuhmei nu chu khawsika zâlin a hmuh a.
15Chuongchun, a kut chu a them pêk a, a khawsik chu a bo tah a, chun, a tho a, a rawng a bâwlpêk tah a.
Khawhri iman le damnaw tamtak sukdam thu
(Mk 1.31-34; Lk 4.40-41)
16Chun, khuo a hung inhnu chun, a kuomah khawhri imanhai tamtak an hung ṭhuoi a; thuin khawhrihai chu a hnawt dawk a, damnaw po po chu a sukdam bawk a:
17 #
Is 53.4
zâwlnei Isaiin, “Ama ngeiin ei hrâtnawnahai a lâk a, ei natnahai a phur a,” tia a hril kha a hung tlung theina dingin.
Inchûktir ni tumtuhai ta dinga fiena
(Lk 9.57-62)
18Chun, Isûn, mipui nasatak a vêla a hmuin râl khingtienga fe dingin thu a pêk a.
19Chun, Dân Inchûktirtu pakhat a hung a, a kuomah, “Inchûktirtu, i fena taphawtah zui ka ti che,” a ta.
20Isûn a kuomah, “Sihalhaiin kuo an nei a, chunglêng vatehai khawmin bu an nei a, Mihriem Naupa ruok hin chu a lu innghatna a nei nawh,” a ta.
21Chun, inchûktirhai laia mi dangin a kuomah, “Lalpa, fea ka pa hung vui hmasa phawt dingin mi phal rawh,” a ta.
22Nisienlakhawm, ama chun a kuomah, “Mi zui rawh, mithiin anni mithi chu vui raw se,” a ta.
Tuifâwn hal re thu
(Mk 4.35-41; Lk 8.22-25)
23Chun, lawngah a chuong a, a inchûktirhai chun an zui a.
24Chun, ngai ta, dila chun thlipui nasatak a hung hrâng a, chuongchun, tuifâwn chun lawng chu a chîm pup pup el a; ama ruok chu a in a.
25A kuomah an hung a, an keitho a, “Lalpa, mi sanhim rawh, kan bohmang ding annâwm hi,” an ta.
26Ama chun an kuomah, “Ringna tlâwmhai, iengdinga in ṭi?” a ta. Chuongchun, a tho a, thli le dîl chu a hal a, chun, a hung re ta duok el a.
27Mihai chun mak an ti hle a, “Hi mipa hi mi ieng am a na, thli le dîl chen khawma a thu an awi hi?” an ta.
Gadarin rama khawhri iman sukdam thu
(Mk 5.1-20; Lk 8.26-39)
28Chun, râl khingtieng Gadarin mihai ram chu a tlungin, khawhri iman pahni, thlâna inthawka hung suokin, an hung intuokpui a; an hrâng bêk a; chuongchun, chu lampuia chun tukhawm an fe thei nawh a.
29Chun, ngai ta, anni chun, “Pathien Naupa, nang le keini ieng am ei inzâwlna? A hun tlung hmain a mi sawisa dinga hitaka hung am i nih?” tiin an khêk a.
30Chun, an kâwla inthawka hla reia chun vawk ruol tamtak an tlah a.
31Khawhrihai chun, “I mi hnawt dawk chun vawk ruol sûngahai sawn mîn fetir rawh,” tiin a kuomah an ngên a.
32Ama chun an kuomah, “Fe ta ro am,” a ta. Chuongchun, an hung suok a, vawkhai sûnga chun an va lût a; chun, ngai ta, vawk ruol po po chu râwlah an tlân thla hum hum el a; dîlah an tla lût a, tuia chun an tla hlum tah a.
33Chun, a vâituhai chu an tlân a, khuoa chun an feh a, iengkim an hril tah a, khawhri iman chunga thil tlunghai khawm chu.
34Chun, ngai ta, akhuoin Isu tuok dingin an hung suok a; chun ama an hmu phingleh an rama inthawka suok dingin an ngên tah a.
Currently Selected:
MATTHAI 8: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
