MATTHAI 14
14
Baptistu Johan thi thu
(Mk 6.14-29; Lk 9.7-9)
1Chu lai tak chun lal Herod chun Isu chanchin a lo hriet a,
2a siehlawhai kuomah, “Chu chu Baptistu Johan kha a ni chu, mithi laia inthawkin a tho nâwk tah a ni chu tie; chuleiin, chuong thilthaw- theinahai chun amaah sin a thaw a ni chu,” a ta.
3 #
Lk 3.19-20 Herod chun a unaupa Philip nuhmei Herodi leiin Johan chu a man a; a khuop a, intângna inah a khum tah a na;
4 #
Lev 18.16; 20.21 Johan chun a kuomah, “Ama i nei hi a thieng nawh,” a ti pêk leiin.
5Chun, Johan chu sukhlum a tum leh mipui a ṭih a, zâwlneiin an ruot si leiin.
6Nisienlakhawm, Herod pieng champhaphâk ni chu a hung tlungin Herodi naunu chu a laiah a lâm a, Herod chu a suklâwm tah a.
7Chuleichun, a ihni taphawt pe dingin inkhâmin ân tiem tah a.
8Chun, ama chun a nu infuiin, “Hiva hin thlêngin Baptistu Johan lu mi pe rawh,” a ta.
9Chun, lal chu a lungngai tah a; nisienlakhawm, a thutiem le a thlai- thlêng awtpuihai lei chun pêk ding thu a pêk a;
10chuongchun, mi a tir a, intângna ina Johan lu chu ân tantir a.
11Chun, a lu chu thlêngin a hung lâk a, naupangnu kuoma chun an pêk a; ama chun a nu kuomah a fepui tah a.
12Chun, a inchûktirhai chu an hung a, a ruong chu an inhlawm a, an phûm a; chun, an feh a, Isu an va hril tah a.
Mipui sâng nga vai
(Mk 6.30-44; Lk 9.10-17; Jn 6.1-14)
13Chun, Isûn chu chu a hrietin, chutaka inthawkin thlalêr hmun tieng lawngin a tumin a fe tah a. Nisienlakhawm, mipuihai chun an hriet phingleh khuoa inthawk dâm chun kea fein an zui tah a.
14Chuongchun, ama chu vapanga a suok chun, mipui nasatak a hmuh a; a lunginsiet bêk bêk a, an damnawhai a sukdam a,
15Chun, zântieng a hung ni chun, inchûktirhai chu a kuomah an hung a, “Ahi thlalêr hmun a na, an ta dinga fâk ding an inchâwk theina dingin mipuihai hi infetir ta la,” an ta.
16Isu ruok chun an kuomah, “An fe hmang a ngai nawh ie; nangniin fâk ding pe ro,” a ta.
17Anni chun a kuomah, “Ahin beiphêk panga le nga pahni chau kan nei a nih,” an ta.
18Chun, ama chun, “Ahin ka kuomah hung la ro,” a ta.
19Chun, hlo chunga ṭhung dingin mipui chu thu a pêk a, beiphêk panga le nga pahni chu a lâk a, vân tieng enin mal a sâwm a, a khawi a, beiphêk panga chu inchûktirhai kuomah a pêk a; inchûktirhai chun mipui kuoma chun an pêk a.
20Chun, an rêngin an fâk a, an khawp tâwl tah a; an fâk mahla nawi khawm chu bâwm sâwm le pahni an rût sip a.
21A fatuhai chu nuhmei le nau- pang tiem loin patling ruok khawm sâng nga rau an nih.
Dîl chunga Isu kea a lâwn
(Mk 6.45-52; Jn 6.16-21)
22Chun, mipuihai chu ân ṭîntir vêl sûngin, a fe hmaa râlkhing tienga fe dingin inchûktirhai chu lawngah ân chuongtir hrâm nghâl tah a.
23Chun, mipuihai chu ân ṭîntir hnungin ṭawngṭai dingin tlânga chun a tumin a hang feh a; chun, zântieng a hung ni chun ama chauin chutaka chun a um tah a.
24Lawng ruok chu dîl lailung takah a um tah a; thliin annaw tieng a mût leiin tuifâwnin a vawr tah a.
25Chun, vârṭien tâwmin dîl chunga kea lâwnin an kuom tieng a hung pan a.
26Inchûktirhai chun, ama chu dîl chunga kea lâwn an hang hmu chun, “Thla a ni saw,” tiin an thlaphâng a, an ṭih a, an khêk ta rak el a.
27Nisienlakhawm, Isûn anni chu a biek nghâl tah a, “Lungmuongtakin um ro, kei ka ni annâwm, ṭi naw ro,” a ta.
28Chun, Peterin a dawn a, “Lalpa, nang i ni chun, tui chunga i kuoma hung thu mi pe rawh,” a ta.
29Ama chun, “Hung ta la,” a ta. Peter chu lawnga inthawk chun a ṭum a, Isu kuom tieng panin tui chunga chun kein a fe tah a.
30Nisienlakhawm, thli hrâng chu a hmuin a ṭih a; chun a tlum vâng vâng a, “Lalpa, mi sandam rawh” tiin a khêk tah a.
31Chun, Isûn a ban nghâl tah a, ama chu a chel a, a kuomah, “Nang ringna tlâwm, iengdinga i ringhla am a na?” a ta.
32Chun, lawngah an chuong chun thli chu a ma ta el a.
33Lawnga umhai chun, “Pathien Naupa i lo ni tak zet hi,” tiin chibai an bûk a.
Gennesaret rama sukdama umhai
(Mk 6.53-56)
34Chun, râlkhing tieng an kai chun, Gennesaret ram khawmuol an tlung tah a.
35Chu hmuna mihai chun ama an hriet phingleh, chu kâwl vêl ram po poa chun mi an tir a, damnaw po po chu a kuomah an hung ṭhuoi a;
36chun, a puon hmawr bêk them thei an hnih a; chun, a them phawt chu an hung dam ta pei a.
Currently Selected:
MATTHAI 14: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
