LUKA 16
16
Sum enkawltu ringum naw tekhithu
1Chun, Isûn a inchûktirhai kuomah hi thu khawm hi a hril a; “Mi hausa tuin amanih sum enkawltu a nei a; chu pa chun a sum a sukthâmpêk mei mei chungah a kuomah an hêk a.
2Chuongchun, ama chu a ko a, a kuomah, ‘I chungchâng thu ka hriet hi iengtizie am a na? I sum enkawl chanchin hung ziek vawng rawh; tuta hnung chu sum enkawltu hin ṭhang thei ta naw ti ni,’ a ta.
3“Chun, sum enkawltu chun, a lungrilin, ‘Ka puin ka sum enkawl a mi bân ding hi iengtin am thâw tâng ka ti aw? hnuoi cho ka pei si nawh a, kut daw hlak chu kân zak sih a.
4Sum enkawl a mi bân phaa mîn an ina an mîn umtirna dingin ka thaw dân ding ka hriet tah,’ a ta.
5Chuongchun, a pu sum battuhai chu a ko seng a, a hmasatak kuoma chun, ‘Ka pu kuomah iengzât am i bat a?’ a ta.
6Ama chun, ‘Hriek tekhâwng za khat,’ a ta. Chun, ama chun a kuomah, ‘I lekha la la, ṭhung vat la, sâwmnga ziek rawh,’ a ta.
7Chun, mi dang kuomah, ‘Nang iengzât am i bat a?’ a ta. Ama chun, ‘Bu tekhâwng za khat,’ a ta. Chun, ama chun a kuomah, ‘I lekha la la, sâwmriet ziek rawh,’ a ta.
8Chun, a pu chun, sum enkawltu fel naw chu a rem hriet leiin ân pâk tah a; var nauhai nêkin khawvêl nauhai hi an tulai dâna hin an var lem a nih.
9“Ka hril cheu hi, sum tehlêmin in ta dingin ruolhai siem ro; sum a bohmang pha leh chatuona umnaa chun inumtira in umna dingin.
10Tukhawm tlâwmte chunga ringum chu tamtak chunga khawm ring a um hlak. Tukhawm, tlâwmte chunga ringum naw chu tamtak chunga khawm ring a um nawh.
11Sum tehlêm chunga hman ring in um naw chun, tûin am sum tak chu inkawltir a ti cheu a?
12Mi dang ta chunga hman ring in lo um ta naw chun, nangni ta ding chu tûin am pêng an ti cheu a?
13 #
Mt 6.24 Siehlaw tukhawmin hotu pahni rawng a bâwl kawp thei nawh; pakhat chu theidain pakhat chu dit a tih, annawleh, pakhat ṭanin pakhat hmusit a tih. Pathien le sum rawng in bâwl kawp thei nawh,” a ta.
Dân le Pathien ram chu
(Mt 11.12-13; 5.31-32; Mk 10.11-12)
14Chun, Pharisai tangka ngaina- tuhai chun chuong thu chu an hriet a, an nuisan a.
15Chuongchun, ama chun an kuomah, “Mi mithmua insukfel el in nih, nisienlakhawm, Pathienin in lungril a hriet sih a; mihriem laia an ichawimawi chu Pathien mithmua chun tirdakumtak a nih.
16 #
Mt 11.12-13
Dân le zâwlneihai thu chu Johan hung um chen khan a um a; chu chena inthawk chun Pathien ram Chanchin Ṭha hi an hril a, mi tin an lût hrâm seng a,
17 #
Mt 5.18
nisienlakhawm, Dân thu sun- hâng chîterek khawm a bo nêk chun vân le khawvêl bohmang a awl lem a nih.
Inmâk thua inchûktirna
(Mt 19.1-12; Mk 10.1-12)
18 #
Mt 5.32; 1 Kor 7.10-11 “Tûkhawm nuhmei maa, nuhmei dang nei taphawt chu a uire a nih; tûkhawm mi nuhmei mâk nei taphawt chu a uire a nih.
Mi hausa le Lazar thu
19“Chun, mi hausa tû amanih a um a, puon senduk le puon zai inhmitak a sil a, ni tin inhawitirtakin a um hlak a.
20Chun, a hming Lazar, kutdaw pakhat pânna ibâwm sip, a kawtkhâr bulah an inzâltir hlak a,
21mi hausa dawkâna a fâk nawi tla chu fâk a nuom a; uihai hlak chun a pânna chu an liekpêk hlak a.
22Chun, hieng ang hi a na, kutdaw chu a thi a, vântirkohaiin an fepui a, Abraham ângsûngah an sieh a. Mi hausa khawm chu a thi a, phûmin a um tah a.
23Chun, mithi khuoa chun natak tuorin a um a, a hang dâk a, hlataka Abraham, a ângsûnga Lazar um leh a hmu tah a.
24Chun, a khêk a, ‘Pa Abraham, mi lunginsiet la, Lazar kha hung tir rawh, a kutpâr tuiah inchie sien- la; ka lei sukdeina dingin; hi meichawka hin ka na bêk bêk el,’ a ta.
25“Nisienlakhawm, Abrahamin, ‘Ka naupa, i dam lai khan thil ṭha i hmuh a, chuong ang bawkin Lazarin thil ṭha naw a hmu kha hre zing ta la; nisienlakhawm, ama chu tuhin hitaka hin thlamuongtakin a um a, nang chu i na a ni kha.
26Hieng naw khawm hi, hitaka inthawka nangni kuoma fe tumhai chu an fe thei nawna dingin le, tu- khawm khataka inthawka keini kuom tieng an hung kai thei nawna dingin, keini le nangni inkâra hin hnuoi kak nasatak an siem tlat a nih,’ a ta.
27“Chun, ama chun, ‘Anleh, pa, ama chu ka pa ina bêk infetir dingin ka ngên che;
28piengpui pasal panga ka nei sih a; hi na umnaa hin hung ve rawi an tih, ṭhahnemngaitakin hril raw se,’ a ta.
29Abraham ruok chun, ‘Mosie le zâwlneihai an nei annâwm; chuhai thu chu ngai raw hai se,’ a ta.
30Chun, ama chun, ‘Pa Abraham, ni lo e, mithi laia mi meu an kuomah fe sienla, sim an tih,’ a ta.
31Chun, ama chun a kuomah, ‘Mosie le zâwlneihai thu an awi naw chun, mithi laia mi tho nâwk sienla khawm awi chuong naw ni hai,’ a tih a,” a ta.
Currently Selected:
LUKA 16: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
