LUKA 15

Berâm inhmang tekhithu

(Mt 18.12-14)

1 # Lk 5.29-30 Chun, siedâwltuhai le mi suolhai po poin a thu hre dingin a kuom an hung pan a.

2Chun, Pharisaihai le Dân inchûktirtuhai chun, “Hi mipa hin mi suolhai a pâwl a, an kuoma hai bu a fâk ve hlak,” tiin an chier ve veh a.

3Chuongchun, ama chun an kuomah hi tekhithu hi a hril a;

4“Nangni lai tûkhawmin berâm za nei sienla, an laia pakhat inhmang ang sienla, thlalêrah sâwmkuo le pakuohai chu mâksanin ân hmang chu a hmu nâwk hmakhat tûin am zawng nâwng a ta?

5Chun, a hmu nâwk chun, lâwmtakin a liengkoah a put hlak.

6Chun, in a tlung phingleh a ruolhai le a vênghai a ko khâwm a, an kuomah, ‘Mi lâwmpui ro, ka berâm inhmang kha ka hmu nâwk tah ie,’ a ti hlak.

7Ka hril cheu hi, chuong ang bawk chun, mi fel sâwmkuo le pakuo sim chuong ding nei nawhai chunga nêkin mi suol pakhat sim chunga hin vânah lâwmna um lem a tih.

Duli inhmang tekhithu

8“Chun, nuhmei tûkhawm duli#drachma sâwm neiin pakhat inhmang ang sienla, khâwnvar insita, in phîtin, a hmu nâwk hmakhat chu nguntakin tûin am zawng nâwng a ta?

9Chun, a hmu nâwk chun, a ruolhai le a vênghai a ko khâwm a, ‘Mi lâwmpui ro, ka duli#drachma inhmang kha ka hmu nâwk tah,’ a ti hlak.

10Ka hril cheu hi, chuong ang bawkin, mi suol pakhat sim chunga hin Pathien vântirkohai an lâwm hlak a nih.

Naupa tlân hmang tekhithu

11“Mi tûin amanih naupasal pahni a nei a;

12chun, a naupang lem chun a pa kuomah, ‘Pa, ro ka chanâi mi pe rawh,’ a ta. Chuongchun, a sum chu an kuomah a sem tah a.

13Chun, ni sâwt nawtê hnunga chun a naupa naupang lem chun a chanâi po po chu a lâk khâwm vawng a, khaw ram hlatakah a fe tah a, chutaka chun inhawi taluoin a um a, a sum chu a sukthâm ta mei mei a.

14Chun, a sukthâm vawng phing- leh, chu khuoa chun ṭâm nasatak a hung tla a; fâk ding a hung tlasam tah a.

15Chuongchun, chu ram mi-mi pakhat a va bêl a; chu mipa chun vawk bu pe dingin a lo tieng a tir a.

16Chun, iengkhat kâwm vawkin an fâkhai chun insukkhawp a nuom bêk bêk a; tukhawmin iengkhawm an pêk si nawh.

17“Chun, ân hriet suok phingleh, ‘Ka pa kuoma inhlâwfahai bu fâk sêng loa nei an tam vei leh, kei hlak chu hitaka hin phîngṭâmin ka thi ding a ni sih a!

18Tho ka ta, ka pa kuomah fêng ka ta, Pa, vâna mi chunga le nanga mithmuin thil ka suksuol a.

19I naupaa înbûk tlâk khawm ka ni ta nawh; i kuoma inhlâwfa pakhat angin mi siem ve rawh, tîng ka tih,’ a ta.

20“Chuongchun, a tho a, a pa kuomah a fe tah a. Chuongchun, hlataka a la um laiin a pain a lo hmuh a, a lunginsiet bêk bêk a, a tlân a, a kuoh a, a fâwp ta ngâwi ngâwi a.

21Chun, a kuomah a naupa chun, ‘Pa, vâna mi chungah le nanga mithmuin thil ka suksuol a; i naupaa inbûk tlâk ka ni ta nawh,’ a ta.

22Nisienlakhawm, a pa chun a suokhai kuomah, ‘Puon ṭha tak kha hung la vat unla, insiltir ro; a kutah kutsebi dâm, a keah kekawk dâm inbuntir ro;

23sebâwngte thâu tak kha hung la unla, that ro, hlimtakin fâng ei tiu;

24hi ka naupa hi a thih a, a hung hring nâwk tah a ni hi; ân hmang a, ei hmu nâwk tah a ni hi,’ a ta. Chuong- chun, hlimtakin an um ṭan tah a.

25“Chun, a naupa upa lem chu loah a um a; chun, in a hung tlung tâwm chun iengkhat mûtrîk le lâm ri a hriet tah a.

26Chuongchun, siehlaw pakhat a ko a, ‘Chu ieng am a ni ta leh?’ tiin ân dawn a.

27Chun, ama chun a kuomah, ‘I sang a hung a, himtaka a hmu nâwk leiin i pain sebâwngtê thâutak kha a that a nih,’ a ta.

28Chun, a lunginsen a, a lût nuom ta nawh a; chun, a pa a hung suok a, a thlêm a.

29Nisienlakhawm, ama chun a pa kuomah, ‘Ngai rawh, kum hieng chen hi i rawng ka bâwlpêk cheh a, i thu hlak hi ka awi naw ngai si nawh a, ka ruolhai le hlimna ka siemna dingin kêltê khawm i mi pêk ngai si nawh.

30Nisienlakhawm, hi i naupa nawchizawrhai kâwla i sum fa zo vawngtu hi a hung phingleh ama ta dingin sebâwngtê thâutak kha i lo thatpêk vei a,’ a ta, a dawn a.

31Chun, ama chun a kuomah, ‘Ka naupa, ka kuoma um zing i nih annâwm; ka nei po po hi i ta a nih.

32Hlimtak le lâwmtaka um ding a ni hrim annâwm; hi i sang hi a thih a, a hung hring nâwk tah a; ân hmang a, ei hmu nâwk tah a ni sih a,’ a tih a,” a ta.

Currently Selected:

LUKA 15: HMARCLBSI

Highlight

Copy