1 KORINTH 6
6
Awinawhai hmaa inhêk
1Nangni laia tûkhawmin mi dang chungah thubuoi nei unla mi inthienghai hmaa tlun loin mi felnawhai hmaah in tlun ngam ding am a nih?
2Anleh, mi inthienghai chun khawvêl hi an ngaituo ding a nih ti in hriet naw am a nih? Chun, khawvêl hman hi in ngaituoa um ding a ni chun, thil chîntakhai khawm chu ngaituo tlâklo in ni ding am a nih?
3Tulai dam sûng khawsak thu chu hrillo, vântirkohai chen khawm ei ngaituo ding a nih ti in hriet naw am a nih?
4Chuongchun, tulai dam sûng khawsak thuhai ngaituo ding in neiin kohran laia mi hmusitumhai chu in inngaituotir hlak am a nih?
5In inzakna dingin ka hril a nih. A unau kâra thu sukthlu thei, mi var pakhat bêk nangni lai in hmu thei naw nîng a ti maw!
6Unauin a unau rorêlnaa ân tlun hlak hi? Awilohai hmaah a ni nâwk nghâl sih a.
7Anih, hi hi in fel zo zânnawna pakhat chu a ni pang el, thubuoi in nei intuo hlak hi. Iengdinga in- diknawtaka thawna chu in tuor lem el naw am a na? Iengdinga suk- dâwngna chu in tuor el naw?
8Anih, nangni ngei khawmin in unauhai chungah in sukdik nawh a, in sukdâwng hlak.
9Anleh, mi felnawhai chun Pathien ram hluo naw ni hai ti in hriet naw am a nih? Hlêmin um naw ro; indithmanghai amanih, milim betuhai amanih, uirehai amanih, mihurhai amanih, mawngkawhurhai amanih,
10inruhmanghai amanih, mi du- âmhai amanih, zu inruihmanghai amanih, inhalhmanghai amanih, hlêpruhaiin amanih Pathien ram hluo naw ni hai.
11Chun, nangni ṭhenkhat chuong ang mi in ni hlak kha; nisienla- khawm, Lalpa Isu Krista hminga le ei Pathien Thlaraua sâwpfai in ni tah a, sukthieng in ni tah a, thiemchang in ni tah.
Taksaa Pathien chawimawi
12 #
1 Kor 10.23
Thil iengkim thaw ka ta dingin a thieng a; nisienlakhawm, thil iengkim thaw a ṭha kher nawh; thil iengkim thaw ka ta dingin a thieng a; nisienlakhawm, ieng thu hnuoia um khawm kân phal nawh.
13Fâk dinghai chu phîng ta ding a na, phîng chu fâk dinghai ta ding a nih; nisienlakhawm, Pathienin sukbo ve vêng a tih. Chun, taksa hi inditna ding a ni nawh a, Lalpa ta ding a ni lem: Lalpa khawm chu taksa ta ding a nih.
14Pathienin Lalpa chu a keitho a, eini khawm a thilthawtheinain mi keitho vêng a tih.
15In taksahai chu Krista pênghai a nih ti in hriet naw am a nih? Krista pênghai chu lâkpêkin nawchizawr pênghaiah ka siem ding am a nih? Teu lo e!
16 #
Gen 2.24
Anleh, nawchizawr zawmpui chu ama leh pumkhat an nih ti in hriet naw am a nih? “An pahniin tisa pumkhat hung ni tâng an tih” ti ziek a ni sih a.
17Lalpa inzawmpui ruok chu ama leh Thlarau pumkhat an nih.
18Indit hi tlânsan ro. Mihriem isuksuol tinrêng hi taksa puotiengah a nih; mi dithmang ruok chun ama taksa chungah a suksuol a nih.
19 #
1 Kor 3.16; 2 Kor 6.16 Anleh, in taksa chu in sûnga um Pathien kuoma inthawka in hmu Thlarau Inthieng in a ni ti in hriet naw am a nih? Mâni ta khawm in ni nawh a,
20mana inchâwk in ni tah in sawnnaw; chuleiin, in taksaa chun Pathien chawimawi ro.
Currently Selected:
1 KORINTH 6: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
