MARKA 9

1Anih nih, “Biataktein kan chimh hna hika i a dirmi hna lakah a cheu cu thiltikhawhnâk he Pathian pennâk a phânmi an hmuh hlan lo thihnâk a tep lo dingmi an um. 2Cubangin niruk hnuah Jesuh nih Peter le, Jeim le, Johan a hruai hna i a dang tein tlângsângpi cungah a kaipi hna. An hmaiah a muihmai â thleng. 3A hnipuan kha a tleu i hawhra bantukin a râng, lei i thil sutu hna nih an suk khawh lo tiangin a râng. 4Cun Elijah kha Moses he an rung lang i Jesuh he bia an i ruah. 5Peter nih Jesuh sinah, “Rabbi, hika i um hi kan caah a ṭha, thlâm pathum in kan sak lai, Na caah pakhat, Moses caah pakhat, Elijah caah pakhat,” tiah a ti, 6a ṭihtuk caah chimawk hmanh a hngal lo. 7Cun minmei a rak zâm i lo lakin a tuam hna, cun minmei in aw a hung chuak i, “Hihi ka dawtmi Fapa a si, Amah bia ngai u,” tiah a ti. 8Hmakhatteah an hun i mer i an zoh tikah, Jesuh le anmah dah ti lo cu ahohmanh an hmu ti lo. 9Tlâng cungin an rung ṭum i Mi Fapa hi thihnâk in thawhter a si hlan pauh cu nan hmuhmi thil hi ahohmanh chim hna hlah u tiah nawl a pêk hna. 10Cu bia cu an lungthin ah an chiah i thihnâk in thawhṭhân timi sullam cu zeidah a si hnga tiah an i hal tawn. 11A sinah, “Zeiruangahdah nawlbia cawnpiaktu hna nih, Elijah a ra hmasa lai, an ti tawn,” tiah an hal. 12A leh hna i, “Elijah cu a rat hmasat awk a si, zeizong vialte a remh dih lai. Mi Fapa kongah thil tampi tuarin mi zawmhtaih in a um lai, tiah zeiruangahdah an rak ṭial hnga? 13Asinain kan chimh hna, Elijah cu a ra ko cang, an rak ṭial cang bangin, an duh duhin a cungah an tuah,” tiah a ti. 14Lamkaltu sin a phâk tikah, pawngkam mibupi tampi hna le nawlbia cawnpiaktu hna an i al len kha a hmuh hna. 15Hmakhatte i an hmuh tikah, mizapi cu an khuaruah a har ngaingai, an tlikhnawh i a kut an va tlaih. 16Nawlbia cawnpiaktu kha a hal hna i, “Zeidah nan i al lenmi cu?” tiah a ti. 17Cun zapi lakah mi pakhat nih, “Cawnpiaktu, ka fapa holh kho loin khuachia tuahmi ka ratpi. 18A tlaihnâk hmun pauh ah a tlukter i a buanbara kha a chuak tawn, a hacang a rial i a der chin lengmang. Na lamkaltu hna hi ṭhawl ka fial hna i an ṭhawl kho lo,” tiah a ti. 19Anih nih, “Maw, ṭhangthar zumhnâk a ngei lomi hna, zeicandah nan sinah ka um lai? Zeicandah kan in khawh hna lai? Ka sinah ratpi tuah u,” tiah a ti. 20Cuticun Jesuh sinah an ratpi, Jesuh a hmuh le cângkâ thlarau nih cun ngakchia cu a tongh ṭhân, vawlei ah tlu in a buanbara kha a chuak i â chaih lên. 21Anih nih apa sinah zeicandah hitihin a rak um cang? tiah a hal. Anih nih, ‘A ngakchiat lioin a si cang,’ tiah a ti. 22Amah thah awkah mei le ti hna ah voi tampi a tlukter cang. Na tuah khawh ahcun, kan zângfah law, kan bawm hrâm ko, tiah a nawl. 23Jesuh nih, “Na zumh khawh ahcun, zumtu caah zei thil pauh a si kho ko,” tiah a ti. 24Cu cângkâ apa nih, “Bawipa, ka zumh ko, ka zumh lonâk ah ka bawm ko,” tiah mitthli he a ṭap. 25Mizapi an rak tlik len kha Jesuh nih a hmuh i thlarau thur cu a rak sik, thlarau holh kho lo le hnachet pa, nawl kan pêk, a chungin chuak law, lut ti hlah, tiah a ti. 26Cuticun thlarau cu a ai i fakpi in a hrem hnuah a chuahtâk. Ngakchia cu mithi bangin a um, cu caah mi tampi nih a thi cang, an ti. 27Asinain Jesuh nih a kut in a tlaih i a hun hnuh i a tho. 28Cun Jesuh cu inn i a luh hnuah a zultu hna nih mi dang theih loin, “Zeicadah kan ṭhawl khawh lo, ”tiah an ti. 29Anih nih, “Hibantuk hi thlacam le rawlulh lawnglawng nih a ṭhawl khawh,” tiah a ti. 30Cu hmun cu an chuahtâk i Galili ram kha a tan. Ahohmanh nih an hngalh a duh lo. 31Zeitintiah a lamkaltu kha, “Mi Fapa hi minung hna kutah tlaihter a si lai, an thah lai, an thah hnu, nithum hnuah a tho ṭhân lai,” tiah a cawnpiak hna. 32Asinain a chimmi cu an hngal kho lo, Amah le an hal ngam fawn lo. 33Cuticun Kapernaum a rak phân. Inn chung i a um lioah, “Lam ah khan zeidah nan i el len?” tiah a hal hna. 34Asinain dai tein an um, zeicatiah lam i an i elmi cu, ahodah a nganbik lai? timi kongah a si. 35A ṭhu i hleihnih kha a kawh hna i an sinah, “Hmasabik si a duh ahcun, hmadungbik le nan rian ṭuntu a si lai,” tiah a ti. 36Cuticun ngakchiate a ratpi i an laiah a dirter. A pom hnuah, an sinah, 37“Keimah minin ngakchiate a cohlangmi pauh cu aka cohlangtu a si. Aka cohlangmi pauh cu keimah aka cohlan si loin aka thlahtu cohlangtu a si. 38Cubangin Johan nih, “A kan zultu zong a si lomi nih na min in khuachia a ṭhawlmi kan hmuh, a kan zultu a si lo caah kan thlauh,” tiah a ti. 39Jesuh nih, “Thlauh hna hlah u, ka min i khuaruahhar a tuah i a ka thangchiattu an um bal lo. 40Zeitintiah aho pauh a kan doh lotu cu, kanmah lei ṭang an si. 41Zeitintiah ka minin ti hraikhat an petu hna cu, biataktein kan chimh hna, an hmuh hngami cu an sung hrimhrim lai lo. 42“Asinain a ka zumtu lakah a hmebik tluktertu pauh cu, an hngawngah facang rialnâk lung thlaih i rili ah thlak sisehlaw an caah a ṭha deuh lai,” tiah a ti. 43Na kut nih an tlukter ahcun tan ko. Kut pahnih he hell, a mit bal lomi mei i kalnâk cha cun, kutpakhat he nunnâk i luh a ṭha deuh. 44Cuka ah an tholung a thi bal lo i an mei zong a mit bal lo. 45Nake nih an sualter ahcun tan ko. Ke pahnih he hell, a mit bal lomi mei i kalnâk cha cun, ke pakhat he nunnâk i luh kha na caah a ṭha deuh. 46Cuka ah an tholung a thi bal lo i an mei a mit bal lo. 47Na mit nih an sualter ahcun coih law hlawnh. Mit pahnih he hell, a mit bal lomi mei i hlawnhnâk cha cun, mit pakhat he nunnâk i kal na caah a ṭha deuh. 48Cuka ah an tholung a thi bal lo i an mei a mit bal lo. 49“Zeitintiah mikip mei i hneksak an si lai i thilpek vialte zong cite i alter an si lai. 50Cite hi a ṭha, asinain cite nih a alnâk a loh ahcun zeinihdah a alter ṭhân lai? Cucaah nanmah ah cite ngei cio ulaw, daihnâk he lengṭi u.

Currently Selected:

MARKA 9: HAKABSI

Highlight

Copy