MARKA 10

1Cuka cun a tho i Jordan varal i Judia ram kha a phân. Mizapi kha a sinah an ra ṭhân i a tuah tawn bangin a cawnpiak ṭhân hna. 2Farasih kha an ra i Amah hneksaknâk ah, “Mi nih a nupi a mâ kho maw?” tiah an ti. 3Anih nih, “Moses nih zeitindah nawl an pêk hna?” tiah a leh hna. 4Annih nih, “Moses nih mâknâk ca ṭial ahcun mâk a sian ko” tiah an ti. 5Jesuh nih, “Nan lung a khontuk caah hi nawl hi an pêk hna. 6Asinain vawlei serka ah, Pathian nih pa le nu ah a ser hna. 7Hiruangah hin pa nih anu le apa kaltâk in a nupi he an i pehtlai lai, 8an pahnih in titsa pumkhat an si cang lai, pahnih si ti loin pakhat an si cang lai. 9Cucaah Pathian nih a pehmi cu minung nih ṭhen hlahseh,” tiah a ti. 10Inn ah lamkaltu hna nih cu kong cu an hal ṭhân. 11Anih nih, “Nupi a mâ i midang a ngeimi pauh a nupi ṭangdang a kaitâk a si. 12Nu zong nih ava a kirtâk i va dang a ngeih ahcun ṭangdang kai a si. 13A rak tongh awkah ngakchia kha an ratpi hna, asinain lamkaltu nih anrak sik hna. 14Cucu Jesuh nih a hmuh tikah a lung a si lo ngaingai i lamkaltu hna sinah, “Ngakchia kha ka sinah ratter ulaw, dawn hna hlah u, Pathian pennâk cu hibantuk hna caah a si. 15Biataktein kan chimh hna, Pathian pennâk cu ngakchia te nih a lawmh bantukin a lawm lomi pauh cu a chungah a lut lai lo,” tiah a ti. 16A rak pom hna i an cungah akut chuangin thluachuah a pêk hna. 17Lam i a kal lioah, mi pakhat a rak tli i khukbil in a sinah, “Cawnpiaktu ṭha, zungzal nunnâk ngeih awkah zeidah ka tuah lai?” tiah a hal. 18Jesuh nih, “Zeiruangah dah ṭha naka ti? Mi pakhat dah ti lo cu ṭha an um lo, cucu Pathian a si. 19Nawlpêk kha na hngalh ko hna, ‘Ṭangdang kai hlah, lai nawng hlah, fir hlah, lih in sual kawl hlah, hleng hlah, nanu le napa upat hna’ timi hna hi,” tiah a ti. 20Anih nih, “Cawnpiaktu, cu thil vialte cu ka no lioin ka tuah dih cang,” tiah a ti. 21Jesuh nih amah cu zoh in a dawt i a sinah, “Pakhat te na bau, kal law, na ngeih vialte zuar in, mi sifak va pe hna law vanah ro na ngei lai, cun ra law, vailam putin ka zul,” tiah a ti. 22Cu bia nih a hmai a chiatter i ngaihchia ngaiin a kal, zeicatiah chawva tampi ngeitu a si. 23Jesuh nih a zoh hna i lamkaltu sinah, “Mirum ca i Pathian pennâk luh cu zeitlukindah a har!” tiah a ti. 24A chimmi nih Lamkaltu kha an khuaruah a harter hna, Jesuh nih a chimh ṭhân hna i rumnâk â bochanmi hna caah Pathian pennâk luh cu zeitlukindah a har. 25Pathian pennâk i mirum luhnâk cha cun kalauk ṭhim hna i luh a fawi deuh lai,” tiah a ti. 26An khuaruah a har chinchin i cutiasiah ahodah khamh a si kho kun lai? tiah an ti. 27Jesuh nih a zoh hna i, “Cucu minung caah tuahkhawh a si lo, asinain Pathian caah cun a si lo. Pathian he cun thil vialte hi a si kho ko,” tiah a ti. 28Peter nih, “Zohhmanh, zeizong vialte kaltâk in kan in zulh tiah chim a hun thawk. 29Jesuh nih, “Biataktein kan chimh, keimah le Thawngṭha ruangah inn siseh, unau siseh, far le siseh, mi siseh, pa siseh, nupi siseh, fale siseh, ram siseh a kaltakmi pauh cu, 30atu nun chung lila ah in, unau, farnu, nu, fa, ram hna a let zakhat tiang, sersatnâk he a hmu lo dingmi pakhat hmanh an um lo; hmailei chan i zungzal nunnâk he. 31Asinain hmasa bik, hmadungbik an si lai i hmadungbik, hmasabik an si lai,” tiah a ti. 32Cubangin Jerusalem hung kal awkah, lam i an um lioah, Jesuh cu an hmaiah a kal, an khuaruah a har ngai. Hnulei i zulh zong kha an thin a phâng. Cun hleihnih kha a thlei hna i a cung i a tlung hnga ding chimh kha a thawk hna. 33Zohhmanh u Jerusalem ah kan kal lai, Mi Fapa hi tlângbawi hna le nawlbiacawnpiaktu hna kutah chanh a si lai, thi dingin bia an ceih lai i Gentel sinah an pêk lai, 34annih nih nihchuak saihnâk ah hmangin, an velh lai, cil an châk lai i an thah lai. Cun nithum ni ah a tho ṭhân lai,” tiah a chimh hna. 35Zebedi fapa Jeim le Johan kha a sinah an ra, “Kan halmi pauh kan tuahpiak law, kan duh,” tiah an ti. 36Anih nih, “Zeidah tuahpiak nan duh?” tiah a ti. 37Annih nih, “Na sunparnâkah, na orhlei ah pakhat, na kehlei ah pakhat, kan ṭhutter law kan duh,” tiah an ti. 38Jesuh nih, “Nan halmi hi nan hngal lo. Ka dinmi hrai nan ding kho lai maw? Ka in ding Baptisma nan ing kho lai maw?” tiah a ti. 39Annih nih a sinah, “Kan in khawh ko lai,” tiah an ti. Jesuh nih, “Ka dinmi hrai nan din lai i ka in ding Baptisma nan in tak ko lai. 40Asinain ka orhlei le ka kehlei i ṭhutnâk nawl cu keimah pêk awk a si lo. An timhpiakmi hna caah a si,” tiah a ti hna. 41Cucu Lamkaltu pahra hna nih an theih tikah, Jeim le Johan cungah an lung a si lo. 42Asinain Jesuh nih a kawh hna i an sinah, “Gentel uktu hna cu an ukmi hna cungah an i bawiter ngai, an mi lianngan hna nih nawlngeihnâk a hleihluat in an hman kha nan theih. 43Asinain nannih cu cubantuk cu nan si lai lo. Nan lakah mingan si a duhmi cu nan sinum ah a can hmasat awk a si,” tiah a ti. 44Nan lakah hmasabik si a duhmi pauh cu nan salah a um awk a si. 45Zeitintiah Mi Fapa hmanh hi, rianhmi si loin riantu ding le mi tampi tlanhnâk ding ca i a nunnâk pek awkah pei a rat cu,” tiah a ti. 46Cun Jeriko khua an rak phân. A lamkaltu le mibu hna nih Jeriko an chuahtak lioah mitcaw Bartimu, Timia fapa kha lamkam ah kutdawh in a ṭhu. 47Nazaret Jesuh a si ti kha a theih tikah, Jesuh, David Fapa, ka zângfah tuah, tiah au a thawk. 48Mi tampi nih daite um dingah ralrin an pêk, asinain David Fapa, ka zângfah ko, tiah a au chin. 49Jesuh cu a dir i amah cu ko dingin nawl a pêk hna. Mitcaw pa cu an kawh i a sinah, “Na tha nuam ko, tho, an kawh cu,” tiah an ti. 50A puan kha hlawnh in, a tho i Jesuh sinah a ra. 51Jesuh nih, “Zeidah tuahpiak na duh?” tiah a ti. Mitcaw pa nih, “Cawnpiaktu, hmuh khawh ka duh,” tiah a ti. 52Jesuh nih, “Va kal cang, na zumhnâk nih an damter,” tiah a ti. Hmakhat teah khua a hmu i lamah Jesuh kha a zulh colh.

Currently Selected:

MARKA 10: HAKABSI

Highlight

Copy