MATTHAI 9

1Jesuh cu tilawng â cit i varal a tlonlênnâk khua kha a phân. 2Cun zohmanh, a zengmi pakhat kha a ihnâk he an rak zawnh. An zumhnâk kha Jesuh nih a hmuh i mizeng sinah, “Ka fa, thanuam tein um, na sualnâk ngaihthiam a si cang,” tiah a ti. 3Cutikah nawlbiacawnpiaktu cheukhat nih, “Hipa hi (Pathian) cawhdehtu a si,” tiah an i caih. 4Jesuh nih an ruahnâk kha a hngalh i, “Zeicadah nan lungin sualnâk nan ruah? 5Na sualnâk ngaihthiam a si cang, ti le, ‘Tho law, ke in kal ’timi ah hin a zeidah chim a fawi deuh? 6Asinain Mi Fapa nih, vulei ah sualngaihthiamnâk a ngei ti kha nan hngalh nâkhnga” tiah a ti i mizeng sinah, “Tho, na ihphah i lâk law na inn ah tlung,” tiah a ti. 7A tho i inn ah a tlung cawlh. 8Mizapi nih an hmuh tikah, an khuaruah a har i minung sinah cubantuk thiltikhawhnâk a petu Pathian kha an thangṭhat. 9Cuka hmun in Jesuh cu a kal i mi pakhat a min Matthai ngunkhuai khawlhnâk hmun i a ṭhut ko kha a hmuh i a sinah, “Ka zul” tiah a ti. Cun a tho i a zulh cawlh. 10Jesuh cu inn chungah cabuai i rawl a dum lioah, zohhmanh, ngunkhuai khawltu tampi le misual kha an ra i a sinah a zultu hna he an ṭhu. 11Farasih nih an hmuh tikah, a zultu hna sinah, “Zeiruangahdah nan cawnpiaktu hi ngunkhuai khawltu le misual hna he rawl an ei ṭi,” tiah an ti. 12Jesuh nih a theih tikah, “Ngandammi nih sibawi an herh lo, a zawmi nih an herh deuh. 13Raithawinâk nâkin zângfahnâk ka duh deuh timi sullam hi va cawng u. Zeitintiah miding caah ka ra lo i misual hna ngaihchihtertu ah ka ra.” tiah a ti hna. 14Cuhnuah Johan zultu kha a sinah an ra i, “Kannih le Farasih hna nih rawl kan ulh tawn, asinain na zultu hna nih an ul bal lo?” tiah an ti. 15Jesuh nih, “Mo ngeitu le a hawi le an umṭi lio ahcun ngaihchia in an um hnga maw? Mo ngeitu cu an sin in lâk a si cân a phân te lai, cu cân ah cun rawl an ulh te ko lai,” tiah a ti. 16Ahohmanhnih puanthar in puanhlun an belh bal lo. An belh ahcun, an belh hlan nâkin kau chin chinin a tlehter lai. 17Misur hang thar zong saphawthawl hlun chungah an rawn bal lo. An rawn ahcun saphawthawl hlun kha a kuai lai i misur hang kha a rawnnâk he an rawk dih lai. Cucaah Misur hang thar cu saphawthawl tharah an rawn i him tein an um tawn,” tiah a ti. 18Cu bia cu an sin i a chim lioah, zohmanh, biaceihtu pakhat a sinah a ra i a biak. “Ka fanu atu te kha a thi, sihmanhsehlaw ra in a cungah nakut na chuan ahcun a nung ṭhân ko lai,” tiah a ti. 19Jesuh cu a tho i cupa cu a zulh, a zultu zong nih an zulh ve. 20Ruahlopiin, kum hleihnih tiang a thi a chuakmi nu pakhat a ra i a puanki kha a tongh. 21Zeitintiah a puanki te tongh hmanh ah ka dam ko lai, tiah a lung in a ti. 22Jesuh cu â mer i cu nu cu a hmuh tikah, “Ka Fanu, hnangam tein um, na zumhnâk nih an damter cang” tiah a ti. Cu cân thawkin minu cu a dam. 23Biaceihtu inn ah Jesuh a lut i thanglawi tumtu hna le zapi hnachet luri kha a hmuh hna, 24“Chuak dih u, zeitintiah ngakchia nu cu a thih ṭung lo, â hngilhmi a si,” tiah a ti. Annih nih an rak nih sawh. 25Mizapi kha an chuah hnu ah a va lut, a kut a hei tlaih i ngakchia nu te cu a hung tho. 26Cu thil cu pawngkam ram vialte ah a thang dih. 27Jesuh nih cu hmun a kaltâk lio ah, mit caw pahnih nih an zulh i, “David fapa, kan zângfah tuah,” tiah an au. 28Inn chung a luh hnu ah, mitcaw pahnih a sinah an ra. Jesuh nih, “Hihi a tuah khawh tiah nan ka zum maw?’ tiah a ti hna. Annih nih, “Kan zumh, Bawipa” an ti. 29An mit a tongh hna i, “Nan zumh bangin nan cungah tlung ko seh,” tiah a ti hna. 30An mit nih khua a hmuh colh. “Hihi ahohmanh nih thei hna hlah seh,” tiah Jesuh nih fak piin ralrin a pêk hna. 31Asinain annih cu an chuak i cu ram vialte ah a kong kha an thanh dih. 32An chuah lio ah, zohhmanh khuachia a tlaih i a holh kho lomi kha an ratpi. 33Khuachia kha ṭhawl a si tikah holh kho kha a holh. Mizapi cu an khuaruah a har i, “Israel mi hna lakah hibantuk thil hi hmuhawk a um bal lo,” tiah an ti. 34Asinain Farasih hna nih, “Khuachia bawi a si ruangah dah kaw khuachia a ṭhawl ko hna cu,” tiah an ti. 35Cuticun Jesuh nih an sinagog ah cawn piakin, pennâk thawngṭha kha chimin, zawtnâk le fahnâk phunkip kha dam terin khuapi he khuate he a tlawn duahmah hna. 36Mibupi kha a hmuh hna tikah, khâltu a ngei lomi tuurun bangin vakvai in an i ṭhek len caah a zângfah ngai ngai hna. 37Cun a zultu hna sinah, “Facang ṭuan awk a tam i a ṭuntu an tlawm. 38Cucaah facang ṭuntu an um nâkhnga lo ngeitu Bawipa sinah thla cam u,” tiah a ti hna.

Currently Selected:

MATTHAI 9: HAKABSI

Highlight

Copy