MATTHAI 8
8
1Tlâng cungin a rung ṭum tikah, mibu tampi nih amah kha an zulh. 2Cun zohhmanh, a sinah thinghmui mi a ra i a biak, “Bawipa, na duh ahcun naka thianter khawh,” tiah a ti. 3Jesuh nih akut in a hei banh i a tongh hnu ah, “Ka duh ko, rak thiang cang” tiah a ti. Hmakhatteah a thinghmui cu a thiang colh. 4Jesuh nih, “Ahohmanh chim hna hlah; asinain va kal law, tlângbawi sinah vâ zohter, fiang tein na dam cang ti an hngalh khawh nâkhnga, Moses nih a chimmi thawinâk kha va tuah,” tiah a chimh. 5Jesuh cu Kapernaum khua i a luh lioah ralbawipa nih a rak panh i, 6“Bawipa, ka sin-um a zeng i temtuar ngaiin a it ko,” tiah zângfah a rak nawl. 7Jesuh nih, “Ka ra lai i ka damter lai,” tiah a ti. 8Ralbawipa nih, “Bawipa, ka inn ah na rat ding cu kâ tlâk lo. Bia chim law, ka sinum a dam ko lai. 9Zeitintiah kei zong nawlngeihnâk tang i a ummi ka si, kakut tang zongah ralkap an um. ‘Kal’ ka timi an kal i, ‘Ra’ ka timi an ra; ka sin um sinah, hihi tuah, ka ti ahcun an tuah ko,” tiah a ti. 10Jesuh nih cu bia a theih tikah a khuaruah a har i a zultu mibu sinah, “Biataktein kan chimh hna, hi tluk a nganmi zumhnâk hi Israel mi hna lak hmanh ah ka hmu bal lo! 11Hihi kan chimh hna, chak le thlangin mi tampi an ra lai i vanbawi pennâk chungah Abraham, Isaak le Jakob sinah an ṭhu lai. 12Sihmanhsehlaw pennâk fale tu kha lênglei mui lakah hlawnh an si lai. Cuka ah an ṭap lai i an hacang an rial lai” tiah a ti. 13Cuhnuah Jesuh nih ralbawipa sinah, “Va kal cang, na zumhning tein na cungah phân ko seh,” tiah a ti. Cu cân lila ah a sinumpa cu a rak dam colh. 14Jesuh cu Peter inn chungah a luh tikah, a nupi nu cu a zaw i a ih ko kha a hmuh. 15A kut kha a tongh piak i a zawtnâk in a dam colh. A tho i rawl a chuan piak hna. 16Zanlei ah khuachia tlaihmi tampi an ratpi hna. Thlarau ṭhalo kha nawl pein a ṭhawl hna i a zawmi vialte zong a damter hna. 17Profet Isaiah nih, “Amah hrimhrim nih kan derthawmnâk a lâk i kan zawtnâk kha a phorh,” a rak timi a tlin nâkhnga caah a si. 18Jesuh nih a vêlchûm i mibu kha a hmuh tikah varal i pet dingin nawl a pêk hna. 19Cuhnuah nawlbia cawnpiaktu pakhat nih, “Cawnpiaktu, na kalnâk pauh ah kan zulh lai,” tiah a ti. 20Jesuh nih, “Cinghngia nih kua an ngei, vate nih bu an ngei, Mi Fapa nih luchiahnâk hmanh a ngei lo,” tiah a ti. 21Cuhnu ah a zultu lakah mi pakhat nih, “Bawipa, kapa ka vui ta lai” tiah a ti. 22Asinain Jesuh nih, “Ka zul ko, mithi nih an mithi cu vui ko hna seh,” tiah a ti. 23Cubangin tilawngah â cit i a zultu hna nih an zulh. 24Chikkhatteah rili cungah thli a hrang, tilet a tho i an tilawng cu a hun nam len. Anih tu cu â hngilh. 25Cuticun a zultu kha a sinah an ra i, “Bawipa, kan khamh tuah, kan thi dih lai hih,” tiah an ti. 26Anih nih, “Aw zumhnâk a tlawmmi hna, zeiruangahdah nan ṭih,” tiah a ti hna. A tho i thli le tilet kha a sîk i an dai dih. 27An khuaruah a har i, “Zeibantuk minung dah a si hnga, thli le tilet hmanh nih a nawl an ngaih ko ê,” tiah an ti. 28Ral khat lei Gadarin mi hna ram kha a phâk tikah, khuachia tlaihmi pahnih, thlan chungin an rak chuak i an rak ton; an hrân tuk caah cu lam cu ahohmanh an kal ngam lo. 29Hmakhatteah an au colh i, “Jesuh, Pathian Fapa, cân tlin hlanah dân a kan tattu dingah maw na rat?” tiah an ti. 30Cuka hmun in lam hla nawnah vok rual an um. 31Khuachia hna nih, “Na kan ṭhawl ding a si ahcun vokrual chungah khin kan luhter ko,” tiah an nawl. 32Anih nih, “Va kal u,” tiah a ti hna. An chuak i vokrual chungah an lut. Cucângkâ vokrual cu lungpang in an zuang, ti chungah an tla i an thi dih. 33Cuhnuah vok zuatu kha an zâm i khua an phâk tikah, thil umtuning vialte, khuachia tlaihmi hna cungah a tlungmi thil kha an chim hna. 34Cun zohhmanh, khuami vialte kha Jesuh hmuh duh ah an ra. Amah an hmuh tikah an ram chuahtâk dingin an nawl.
Currently Selected:
MATTHAI 8: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
