MATTHAI 26

1Cubangin cu bia vialte a chimh hna hnu ah, Jesuh nih a lamkaltu hna sinah, 2“Nihnih hnu ah Lanhtâk Thô a um lai tiah nan theih, Mi Fapa hi khenhchih dingah an tlaih lai” tiah a ti. 3Cuticun tlângbawi Ngan bik Kaiafas timi innah tlângbawi upa hna le nawlbiacawnpiaktu hna le zatlang upa kha an i pum; 4Jesuh cu hlenthawinâk hmangin tlaih i thahnâk ding khua an khâng. 5Asinain thô lio ah cun sihlah seh, zeicatiah zatlâng sinah buainâk a chuak sual lai, tiah an ti. 6Cun Jesuh cu Betheni khua i thinghmui Simon inn i a um lio ah, 7minu pakhat lungrang thawlin a man a fak ngaimi zihmui i put in a sinah a ra, rawl an ei lio ah a lu ah a toih. 8Asinain lamkaltu nih an hmuh tikah an thin a hung i, “Zeiruangahdah hibantukin a sawksâm hnga. 9Zeitintiah hi zihmui hi man tampi ah zuar i misifak hna pek khawh a si, tiah an ti. 10Jesuh nih cucu a theih tikah, “Minu hi zeicadah hna nan hnawh? Ka cungah thilṭha ngai a tuahmi a si. 11Zeitintiah mi sifak cu nan sinah an um peng ko lai, Kei tu cu nan sinah sau ka um ti lai lo. 12Zeitintiah hi zihmui aka tawihmi hi phum awkah a ka timhlamhnâk a si. 13Biataktein kan chimh hna, vawlei khuazakip i Thawngṭha an chimnâk pauh ah hi minu tuahmi hi amah philhlonâk caah an chim ve lai,” tiah a ti hna. 14Cuhnuah hleihnih hna lak i pakhat Judah Iskariot an timi cu tlângbawi upa hna sinah a kal i 15“Amah cu in tlaihter hna ning law, zeidah nan ka pêk lai,” tiah a va ti hna. Cuticun phaisa sawmthum pêk an timh. 16Cucân thawk in tlaihternâk cân rem lawng a ngiat cang. 17Thilnu cawhlo changreu einâk Thô ni hmaisa bikah Lamkaltu kha Jesuh sinah an ra i “Lanhtâk Thô rawl einâk dingah khuazeiahdah timh piak na duh,” tiah an ti. 18Anih nih, “Khuapi ah mi pakhat sinah kal ulaw, Cawnpiaktu nih, ka cân a nai cang; ka Lamkaltu hna he, Lanhtâk Thô na inn ah kan tuah lai, a ti, tiah nan va ti lai,” tiah a ti hna. 19Jesuh nih tuah awkah a chimh hna bantuk tein lamkaltu hna nih an tuah i Lanhtâk Thô rawl cu an timh lamh. 20Zanlei a si tikah, hleihnih hna he rawl cu an dûm; 21Rawl an ei lioah, Biataktein kan chimh hna, nanlak i mi pakhat nih a ka rawi lai,” tiah a ti. 22Cuticun an ngaih a chia i a sinah, pumpâk cio in, “Bawipa, keimah maw ka si,” tiah an ti cio. 23Anih nih, “Ka kheng ai hrawmmi pa nih a ka rawi lai,” tiah a leh hna. 24Mi Fapa hi a kong an rak ṭial bantuk te khan a kal lai. Asinain Mi Fapa a rawitu cungah chiat tlung ko seh! cu minung cu chuak loin rak um sehlaw a caah a ṭha deuh lai,” tiah a ti. 25Cuticun a rawitu ding Judas nih a leh i, “Rabbi, keimah maw ka si? tiah a ti. Anih nih a sinah, “Na chim cang cu ta,” tiah a ti. 26Rawl an ei lioah Jesuh nih changreu a lâk i thluachuah a pêk, a cheu i lamkaltu hna sinah a pêk, “La u law, ei tuah u; hihi ka pum a si,” tiah a ti. 27Hrai zong kha a lâk i lawmhnâk bia chimin an sinah a pêk i “Nan dih lakin ding tuah u. 28Zeitintiah hihi ka thisen i biakam thar, mi tampi sual ngaihthiamnâk ca i a chuak hngami cu a si. 29Asinain kan chimh hna, “Ka Pa pennâk ah nanmah he a thar in ka din cân a phanh hlan lo, atu riin misur hang hi ka ding ti lai lo,” tiah a ti. 30Cun hla an sak dih in an chuak i Olive tlângah an kal. 31Cuticun Jesuh nih, “Tuzan ah hin nan dih lakin keimah ruangah nan tlu dih lai, hitihin ṭial a rak si cang. ‘Tukhal cu ka velh lai i Tuu run kha an i ṭhek dih lai’ tiah a ti hna. 32Asinain thawhter ka si hnu ah Galili ramah nan hmaiah ka kal lai,” tiah a ti. 33Peter nih, “An dih lakin nangmah ruangah tlu hmanh hna sehlaw, kei cu kan tluktâk bal lai lo,” tiah a leh. 34Jesuh nih, “Biataktein kan chimh, tuzanah ar a khuan hlanah voithum naka hlawt lai,” tiah a ti. 35Peter nih, “Na thih nâkah thiding ka si hmanhah kan hlawt hrimhrim lai lo,” tiah a ti. Lamkaltu vialte zong nih cubantukin an ti cio. 36Cun Jesuh cu annih hna he hmun pakhat Gethsemani an timi kha an phân, A Lamkaltu hna sinah, “Khika i thla ka cam chung hi ka ah hin rak ṭhu u,” tiah a ti. 37Peter le Zebedi fapa pahnih hna kha â kalpi hna i a ngaih a chia i a awlok a chong ngaingai. 38Cuticun an sinah, “Ka ngaih a chia tuk hringhran i thihpi tlâk a si. Hika ah hin um ulaw, ka ven pi u” tiah a ti hna. 39Hmailei ah tlawmpal a kal i a bawk, “Maw Ka Pa, a si khawh ahcun, hi hrai nih ka lanhtâk ko seh. Asinain keimah thu si loin, nangmah thu si seh, tiah thla a cam. 40Cuhnuah a Lamkaltu sinah a ra, annih cu an rak i hngilh i Peter sinah, “Ai ze,’ suimilam pakhat hmanh naka veng kho lo maw? 41Tukforhnâk i nan luh nâkhnga lo, ralring tein thlacam tuah u. Thlarau nih cun a tlinh ko, titsa bel nih a zo lo, tiah a ti. 42A voihnihnâk ah a va kal ṭhân i “Maw ka Pa, hi hrai hi din loin aka lanhtâk khawh lo ding a si ahcun, nangmah thu si ko seh,” tiah a ti. 43A rak kir ṭhân tikah annih cu an rak i hngaih ṭhân. An mit a ku tuk hring hran. 44A kaltâk ṭhân hna i a chim ciami chim ṭhânin a vawi thumnâk thla a cam ṭhân. 45Lamkaltu sin a rak kirṭhân tikah an sinah, “Atu tiangin nan it i nan i din ko rih mu? Ngaihmanh u a cân a nai cang. Mi Fapa hi misual hna kutah phâkter a si cang lai. 46Tho ulaw kal u sih. Zohhmanh u, a ka rawitu cu a nai tuk cang” tiah a ti hna. 47Cuti i a chim lioah, zohhmanh, Judas, hleihnih hna lak i mi pakhat kha tlângbawi upa hna le zatlâng upa hna sinah a rami mibu hna he, vainam le tanbo he an rak phân. 48A rawitu nih, “Ka hnamhmi pauh kha Amah a si lai i nan tlaih lai,” tiah hmelchunhnâk a rak pek cang hna. 49Jesuh cu ava panh cawlh i, “Daihnâk, Rabbi!” tiin a hnamh. 50Jesuh nih a sinah, “Ka kawi, zeiruangahdah na rat?” tiah a ti. Cuticun an ra i Jesuh kha an tlaih i an kalpi. 51Hmakhatteah, Jesuh sin i a ummi pakhat nih a kutin vainam â phoi i tlângbawi Nganbik sinum pa kha a hna pet lakin a tuk. 52Asinain Jesuh nih, “Na vainam kha a kawngah sawh ṭhân, zeitintiah vainam a hmangmi vialte cu vainam in a thi te lai. 53Asiloah atu zongah hin vanmibu tampi bu hleihhnih nâk tam run thlah cawlh dingin ka Pa sinah a hal kho lo tiah maw, na ruah? 54Hei hal ning law, zeitindah Cathiang nih hibantuk thil a tlungte lai a timi cu a tlin khawh kun lai? tiah a ti. 55Cu lio ah Jesuh nih mizapi sinah, vainam le tanbo i put in damiah tlaiding bangin nan rak pok maw? Nichiarte ṭempal ah ka cawnpiak hna i nanka tlai fawn lo. 56Asinain Profet hna chimmi kha a tlin khawh nâkhnga hi thil vialte a rak umnâk hi a si,” tiah a ti. Cu lio hrimhrim ah lamkaltu vialte nih Amah lawng umter in an zâm tâk dih. 57A tlaitu hna nih Jesuh cu nawlbia cawnpiaktu hna le zatlang upa hna an i pumhnâk hmun, Tlângbawi Nganbik Kaiafas inn ah an kalpi. 58Peter zong nih lamhlat nawn in a zulh ve i tlângbawi nganbik tualrawn a phân ve. A va lut ve i a donghtiang thil umtuning hngalh awkah sinum hna sinah a um. 59Tlângbawi ngan hna le, upa hna le biaceihtu vialte hna nih an thah khawh nâkhnga lih in sualphawtnâk an kawl, 60asinain an hmu lo. Lihchimmi tehte tampi an hung chuak nain an hmu kho hlei lo. A hnu ah lih tehte pahnih an rak chuak i 61“Hipa nih hin Pathian ṭempal hi `hetin nithum chungah ka sak khawh lai,” a ti, tiah an ti. 62Tlângbawi nganbik cu a rak dir i “Kâ khat hmanh in na let hna lo maw” Hi hna nih sual a nin puhmi hi zeidah a si? tiah a ti. 63Asinain Jesuh cu dai tein a um. Tlângbawi ngan bik nih, “Pathian nung chalh in nawl kan pek, Krih, Pathian Fapa cu na si maw, kan chim tuah? tiah a ti. 64Jesuh nih, “Na chimning kha a si ko. Asinain kan chimh, tu hnu ah Mi Fapa hi Thiltikho orhlei kam i a ṭhut le, van in khuadawm lak i a rat kha na hmuh lai,” tiah a ti. 65Tlângbawi nganbik nih a hnipuan kha a thleh i “(Pathian) a cawhdeh cang! Tehte dang kan herh ti hnga maw? Zohhmanh u, (Pathian) cawhdehnâk bia nan theih cang kha! 66Zeitindah nan ruah? tiah a ti. Annih nih, “Thih awkah â tlâk,” tiah an leh. 67A hmaiah cil an châk i an tuk, cheukhat nih bengh pahin, 68“Nang, Krih nih kan chim ngat,’ Ahonihdah an bengh? tiah an ti. 69Cu cân ah Peter cu kulhmi tualrawn chungah a ṭhu. Sinum ngaknu pakhat hi a pawngah a ra i “Nangzong hi Jesuh sin um Galili mi na si,” tiah a ti. 70Asinain an dihlak hmaiah, “Na chimmi cu ka hngal hrimhrim lo, tiah a hlawt. 71Cun in kulhnâk hau i a chuah lioah, ngaknu dang nih a rak hmuh i a pawngkam i a ummi hna sinah, hipa zong hi Nazareth Jesuh pawng i a um tawnmi a si,” tiah a ti. 72Asinain chiatserh in, “Cu mipa cu ka hngal lo ê,” tiah a hlawt ṭhân. 73Cân tlawmpal hnu ah a pawng i a dirmi hna nih, Peter sinah, “Nangzong an lak i â telmi na si ve ko; na aw cawiin hngalh khawh a si,” tiah an ti. 74Cuticun chiat i serh in, “Cu minung cu ka hngal hrimhrim lo,” tiah a ti i ar a khuang cawlh. 75Peter nih, “Ar khuan hlanah, voithum naka hlawt lai,” tiah Jesuh nih a rak chimmi kha a hun hngalh tikah, lêngah a chuak i a ṭap thluah mah.

Currently Selected:

MATTHAI 26: HAKABSI

Highlight

Copy