MATTHAI 27

1Zingkâ te ah, tlângbawi upa hna le zatlâng upa hna kha Jesuh thahnâk ding khua khângin an i tong. 2Amah cu an ṭem hnuah an kalpi i Mangki bawi Pailat sinah an pêk. 3Amah rawitu Judas nih Jesuh thiamlo an coter ti a hngalh tikah â ngaihchih i phaisa sawmthum kha tlângbawi le upa hna sinah a ratpi, 4“Sualnâk a ngei lomi thisen ka rak rawi kha ka sual,” tiah a ti. Annih nih, “Cucu kan zeidah poi, nangmah nawl pei a si ko cu,” tiah an rak ti. 5Ngun tangka cu ṭempal chungah a va hlawnh, a kal i ai awk. 6Tlângbawi hna nih ngun tangka cu an lâk i, “Hihi tangka chiah nâkah chiah a ṭha lai lo, zeicatiah thisen man a si,” tiah an ti. 7An i caih`i hnu ah, khual phumnâk dingah ûmsertu hna hmun kha an cawk. 8Cucaah dah kaw, cu hmun cu atu tiangin, ‘Thisen hmun’ tiah an kawhnâk a si cu. 9Cuticun Profet Jeremiah nih a rak chim chungmi kha a hung tling. 10Hi ti hin a rak chim. ‘Ngun tangka sawmthum an lâk i a manah an ruah, Israel fale mi zei maw nih a man caah an ruahmi kha, an lâk i ûmsertu lo cawk nâkah an hman. Cucu Bawipa nawlpêk ning a si.” 11Cuticun Jesuh cu Mangki bawi hmaiah a dir i Mangki bawi nih, “Judah Siangpahrang na si maw? tiah a hal. Jesuh nih, “Na chimning te cun a si ko,” tiah a ti. 12Tlângbawi hna le upa hna nih lih in a sual an kawl lio ah kâ khat hmanh in a let hna lo. 13Cuhnuah Pailat nih, “Na sual an kawlnâk vialte hi na thei lo maw? tiah a ti. 14Asinain kâ khat hmanh a let lo, Mangki pa cu a khuaruah a har ngai ngai. 15Mangki bawi nih Thô ni ah thongtla pakhat mizapi nih an duhmi kha a chuahpiak tawn hna. 16Culio ah a min a thang ngaimi thongtla, Barabbas timi an ngei. 17Cucaah an rak i pumh tikah Pailat nih an sinah, “Ahodah in chuahpiak hna ning law nan duh? Barabbas maw, Jesuh, Krih an timi dah? tiah a ti. 18Zeitintiah hnahchuah ruangah an tlaihmi a si kha a hngalh. 19Biaceihnâk ṭhutdanh i a ṭhut lioah a nupi nih, “Kha miding pa kha zeiti hmanh in rak ti hlah, nihin ah Amah ruangah ka mangin thil tampi ka tuar,” tiah bia a cah. 20Asinain tlângbawi hna le upa hna nih Barabbas chuahter i Jesuh hloh dingin mipi an rak lêm khawh cang. 21Mangki bawi nih a hei chawnh ṭhân hna i, “Annih pahnih lakah hin aho deuh dah chuahpiak nan duh?” tiah a ti. Annih nih, “Barabbas” tiah an ti. 22Pailat nih an sinah, “Jesuh, Krih an timi hi zeitindah ka tuah kun lai?” tiah a ti. An dih lakin, “Khenhchih ko” tiah an ti. 23Mangki pa nih, “Zeiruangah, zei sualnâkdah a tuah?” tiah a ti. Annih nih, “Khenhchih ko” tiah an au. 24Pailat nih, zeitihmanhin dan khawh a si ti lo ti kha a hmuh i a buai chin chin lai ti kha a hmuh tikah, ti â lak i mizapi hmaiah a kut â ṭawl. “Hi miding thisen ah hin ka thiang. Nanmah thu si seh,” tiah a ti. 25Mi vialte nih, “A thisen mawh cu kanmah le kan fa le cungah tla ko seh,” tiah an leh. 26Cuticun Barabbas cu a chuahpiak hna i Jesuh cu a velh hnuah, khenhchih awkah a pêk hna. 27Cuhnuah mangki bawi ralkap hna nih Jesuh cu mangki bawi innpi chungah an kampani dih lakin an dûm. 28A puan an phoih piak i angki sen an aihter. 29Hling luchin an tuah i alu ah an chinh. A orhlei kutah thluang kung an putter. A hmaiah an khuk an i bil i Judah siangpahrang, sau piin nung seh, tiah nichuak saih nâkah an hman. 30Amah cu cil an châk i hluang fungin an tuk, 31An cawhdeh hnu ah, a angki an phoih i Amah angki kha an ngaihter ṭhân i khenhchih dingin an kalpi. 32An chuah lio ah, Sairin khua mi Simon kha an hmuh, cupa cu a vailam put piaktu ah an tlaih. 33Golgotha an timi hmun kha an phân, cucu Luruh hmun tinâk a si, 34Misur hang, thilkhâ he cawhmi din awkah an pêk, asinain a hun tep i a ding duh lo. 35Cuhnuah an khenhchih i a hnipuan kha camcawh fung zukin an i phaw. Profet nih, “Ka hnipuan an i phaw i ka angki caah camcawhfung an zuh,” tiah a rak timi a tlin nâkhnga caah a si. 36Cuka ah ṭhut buin Amah cu an congh. 37Cun Alu cungah sual an phawtnâk ca, “HIHI JESUH, JUDAH MI HNA SIANGPAHRANG A SI” timi an tar. 38Amah sinah damiah pahnih a orh leiah pakhat a keh leiah pakhat an khenhchih. 39Cuka pawng i â chawk letmi hna nih an lu an thin hnawh i 40“Nang, ṭempal ṭhet i nithum chungah a sa ṭhân khotu, i damter ngat! Pathian Fapa na si lo mei, vailamtahnâk cung khan rung ṭum ngat,” tiah an serhsat. 41Cubangin tlângbawi hna le nawlbiacawnpiaktu hna le upa hna zong nih diriam ngai in, 42midang a damter ko nain, Amah le Amah â damter kho ṭung lo, Israel Siangpahrang a si taktak ahcun, vailam in rung ṭum sehlaw, kan zumh ko hnga. 43Pathian a zumh a si lo maw, a duh ahcun atu hrimhrim ah hin run khamhseh. Pathian Fapa ka si, â ti fam cu ta,” tiah an ti. 44Damiah an khenhchih mi hna zong nih cubantukin an nihsawh ve. 45Chun suimilam hleihnih in zanlei pathum tiang khua a mui dih. 46Zanlei pathum hrawngah Jesuh cu aw thang piin, “Eli, Eli, Lama sabakthani” tiah a au. Cucu, “Ka Pathian, Ka Pathian, zeicadah na ka kaltâk?” tinâk a si. 47Cuka i a dirmi cheukhat nih cucu an theih tikah, “Elijah a auh a si cu,” tiah an ti. 48Hmakhatteah an lak i mi pakhat a va tli i misur thor puanchia ah a ciahmi kha fungparah a ṭem bawh i a dinter. 49Midang nih, “Um ko seh, Amah khamh awkah Elijah a ra maw, ra lo, kan zoh hnik lai,” tiah an ti. 50Jesuh cu thang ngaiin a au ṭhân i a thlarau a thlah. 51Cuticun zohhmanh, ṭempal puangzar kha a cung leiin a tanglei tiang a tlekdih, li â hnin i lungpi kha an kuai, 52thlân kha an i ong i mithiang tampi â hngilhmi hna an pum kha thawhter an si. 53Cuhna cu, a thawhṭan hnuah thlân in an chuak i khua thiang ah an lut i mi tampi sinah an i lang. 54Cuticun ralbawipa le a sin i Ralkap a um vemi hna nih thil umtuning an hmuh tikah an ṭih ngaingai. Hipa hi Pathian Fapa a si hrimhrim ko, tiah an ti. 55Cuka ah nu tampi, Galili in Amah rian ṭuan piakin a rak zultu hna nih lamhlat nawn in an cuanh, 56cu hna lakah, Mary Magdalin, Jeim le Joses nu, Mary, le Zebedi fapa le annu le an si. 57Zanlei a si tikah, Arimathia khua mi, mirum a min Josef Jesuh hnuzul a simi kha a ra. 58Cu pa cu Pailat sinah a kal i Jesuh ruak kha a hal. Pailat nih a ruak kha laknâk nawl a pêk. 59Josef nih aruak cu a lâk i khiangrâng a thiangmi in a tuam i 60amah thlân thar, lung a khermi ah a vui. Thlân inkâ ah lung nganpi in a khar i a kaltâk. 61Cuka ah Mary Magdalin le Mary dang kha an um ve, thlân hmai lei ah an ṭhu. 62A thaizing ah, cucu zarhte ni a dih zing a si, tlângbawi hna le Farasih hna cu Pailat sinah an i pum i 63“Ka pu, kha mihlengtu nih khan a nun lioah, nithum hnuah ka tho ṭhân lai, tiah a chimmi kan theih. 64Cucaah thlân cu nithum tiang veng dingin nawl pe tuah, culoahcun a zultu hna zanah ra in Amah kha an fir lai i mizapi sinah, ‘Thihnâkin a tho ṭhân cang’ an ti lai i hlennâk hmadung cu hlennâk hmasanâk khan a zual deuh lai,” tiah an ti. 65Pailat nih, “Vengtu ralkap nan ngei a si lo maw? vakal ulaw, a himkhawhnâk ding nan hngalh ning ṭha bikin va venter ngat u,” tiah a ti hna. 66Cuticun an kal i thlân cu him tein an ser. Lung kha hmel an chunh i kilvengtu ralkap kha an venter hna.

Currently Selected:

MATTHAI 27: HAKABSI

Highlight

Copy