MATTHAI 21

1Jerusalem khua phanh lai Olive tlâng i a ummi Bethfeih khua an phâk tikah Jesuh nih lamkaltu pahnih a thlah hna i 2an sinah, “Nan hmai khua ah khin va kal u law, lâ an hrenmi a pawng i afa he nan hmuh lai. Phoih ulaw ka sinah ratpi u. 3Mi nih nan sin i bia an chim ahcun, “Bawipa nih a herh hna,” nan ti lai i a ratter zau ko hna lai. 4“Zohhmanh, na Bawipa cu toidornâk he lâ cungah i cit in, la no te cungah i cit in na sinah a ra lai, tiah zion fanu cu chim tuah,” 5tiah Profet hmangin rak chimmi a tlin khawh nâkhnga cu thil cu a ummi a si. 6Cuticun lamkaltu cu an kal i Jesuh nih nawl a pêk hna ning te khan an tuah. 7Lâ le afa cu an ratpi, a cungah an puan an danh i â cit. 8Mitampi nih lamah an puan an phah, a cheu nih hnahchawl lâ in lamah an rak phah. 9A hnu le hmai i a zultu mibu hna nih, “David fapa sinah Hosana! Bawipa min in a rami cu thangṭhat in um ko seh. Cungnung bik ah khin Hosona” tiah an au. 10Jerusalem an phâk tikah khuachung mi vialte kha a hninh dih hna i “Hipa hi mizeidah a si hnga” tiah an i caih len. 11Mizapi nih, ‘Hihi Jesuh, Galili ram i Nazareth khua mi Profet a si, tiah an ti. 12Jesuh cu Pathian ṭempal ah a lut, ṭempal i thilzuartu le cawtu vialte kha a ṭhawl hna i phaisa thlengtu hna cabuai le ṭhuro zuartu hna ṭhutdanh kha a thluk dih hna. 13An sinah, “Ka inn cu thlacamnâk inn an ti lai, tiah ṭial a si, nannih nih damiah hna umnâk kua ah nan canter,” tiah a ti. 14Cuticun ṭempal ah mitcaw le kebei mi a sinah an ra i a damter hna. 15Asinain tlângbawi upa hna le nawlbiacawnpiaktu hna nih a tuahmi khuaruahharnâk le ṭempal pawng i, “David Fapa sinah Hosona!” tiah ngakchia a au mi kha an hmuh tikah lung si lo ngai in, 16A sinah, “Hi hna chimmi hi na thei maw? an ti i Jesuh nih, “Ka theih ko, ‘Ngakchia hna le hnukding liomi hna hmurkâ i a chuakmi nih thangṭhatnâk a tlinter timi hi, nan rel bal lo maw? tiah a ti hna. 17Cun a kaltak hna i khualipi kha chuah takin, Bethani ah a kal i cukaah a riak. 18Zingka te ah khualipi lei i a rak kir lio ah a rawl a ṭâm. 19Cun lamkam ah theipi kung a hmuh i a va panh tikah, a hnah dah tilo zeihmanh a hmu lo, “Zeitikhmanh ah rak tlai ti hlah,” a ti i theipi cu a uai cawlh. 20Lamkaltu hna nih cucu an hmuh tikah an khuaruah a har i, “Zeitindah theipi hi a uai cawlh ko ê,” tiah an ti. 21Jesuh nih, “Biataktein kan chimh hna, lunghrinhnâk ngei lo tein nan zumh ahcun, theipi kung i tuahmi lawng hmanh si loin, hi tlâng sinah, i ṭhial law rili ah i paih nan ti lai i a si taktak ko lai. 22Zeizong vialte hi zumhnâk he thlacam in nan hal ahcun, nan hmuh ko lai,” tiah a leh hna. 23Ṭempal chung i a luh hnu i a cawnpiak lio ah, tlângbawi le upa hna nih an rak panh i, “Aho nawl in dah hi thil hi na tuah? Aho nih dah hi nawl ngeihnâk hi an in pêk? tiah an ti. 24Jesuh nih, “Thil pakhat kan hal ve hna lai, cucu nan ka leh ahcun, aho nawl indah hi thil hi ka tuah tiah kan chimh ve hna lai. 25Baptisma petu Johan kha van lei in maw, minung lei in dah? tiah a ti. An ruat`i hna i van lei in kan ti ahcun, ziah nan zumh kun lo, a kan ti lai. 26Minung lei in kan ti ahcun, mizapi ṭih an nung fawn. Zeicatiah mi vialte nih Johan cu Profet ah ruahmi a si. 27Cuticun Jesuh sinah, “Kan hngal lo,” tiah an leh. Anih zong nih, “Aho nawlngeihnâk in dah ka tuah, tiah kan chim ve hna lai lo,” tiah a ti hna. 28Zeitindah nan ruah? Mi pakhat nih fapa pahnih a ngeih hna i pakhat sinah, vakal law, misur dûmah rian va ṭuan, tiah a ti. 29Anih nih, ka duh lo, tiah a leh, asinain a hnu ah a lung â thleng i a kal. 30Cun pahnihnâk sin zongah a va kal i cubangin a chimh ṭhân. Anih nih, “Aw, ka pa ka kal lai,” tiah a ti. Asinain a kal hlei lo. 31Cu hna pahnih lakah ahonihdah an pa duhnâk a tuah deuh hnga? tiah a ti. Annih nih, “A hmaisa deuh nih ta,” tiah an ti. Jesuh nih an sinah, “Biataktein kan chimh hna, ngun khuai khawltu hna le hlawhhlang hna nih vanbawi pennâk chungah an in luhkanh dih hna,” tiah a ti. 32Zeitintiah Johan cu dinnâk lam hmuhsaktuah a ra i nan zum duh lo, ngunkhuai khawltu le hlawhhlang tu nih an zumh, cucu nan hmuh ko nain zum dingin nan i mer duh lo. 33Tahchunhnâk dang pakhat ngai rih hmanh u. Ram ngeitu pakhat a um, cu nih cun misur dûm a tuah. A kulh dih i misur nennâk khor a cawh i parthlâm zong a sak. Dûm zohkhenhtu hna sinah a pêk i amah cu ram hlapi ah khual a tlawng. 34A thei ṭuancân a zat tikah a tlai hmasa mi a co nâkhnga dûm zoh khenhtu hna sinah sinum kha a thlah hna. 35Dûm congtu hna nih sinum cu an rak tlaih hna, pakhat an velh, pakhat an thah i pakhat lungin an cheh. 36Sinum dang a hmasa nâk tam deuh in a thlah ṭhân hna, annih zong cu hmasa bantukin an rak tuah ṭhân. 37A hnu bik ah, ka fapa cu an rak hmaizah deuh lai a ti i a thlah ṭhân. 38Dûm congtu hna nih a fapa an rak hmuh le cângkâ, ‘Hi pa hi ro cotu ding cu a si. Ra u that usih law a co hngami ro kanmah nih kan co lai,’ tiah an ti. 39An tlaih i misur dûm chungin lengah an chuah i an thah. 40Cuticun misur dûm ngeitu a rat tikah dûm congtu hna cu zeitindah a tuah lai? tiah a ti. 41Annih nih, “Cu misual hna cu fak piin a hrem hna hnu ah a hrawh dih hna lai i misur dûm cu zohkhenhtu dang, a cân a zat tikah a hmuh hngami a pe khotu sinah a chiah lai,” tiah an ti. 42Jesuh nih, “Cathiang chungah, Inn satu hna nih an duh lomi lung kha, cucu san a tlai bikmi a kil lung cu a si. Cucu Bawipa tuahmi a si i kan mit hmuh ah khuaruahhar a si,’ timi hi nan rel bal lo maw? 43Cucaah kan chimh hna, Pathian pennâk cu nan sin in lâk a si lai i theitlai a chuah hngami miphun sinah pêk a si lai,” tiah a ti hna. 44Hi lungcung i a tlumi cu a kuai lai i a nenhmi cu a parh dih lai,” tiah a ti. 45Tlângbawi upa hna le Farasih hna nih tahchunhnâk a chimmi cu an theih tikah, anmah a chimhnawhchan hna ti kha an hngalh. 46Amah cu tlaih an tim ko nain mizapi nih profet ah an pom caah mizapi kha an ngamh hna lo.

Currently Selected:

MATTHAI 21: HAKABSI

Highlight

Copy