MATTHAI 20

1“Zeitintiah vanbawi pennâk cu, inn ngeitu nih a misur dûm i rian ṭuntu kawlah zingka teah a thomi bantuk a si. 2Anih nih rian ṭuntu hna he nikhat i ngamu pe dingah bia an khiah hnu ah, misur dûm ah a thlah hna. 3Zing lei suimilam pakua hrawng i a chuah lio ah, chawdawr hmun i a dir sawsawh mi kha a hmuh hna i 4an sinah, ‘Nannih zong misur dûmah vakal u law nan hmuh awk a simi cu kan pêk ve hna lai, tiah a ti hna i an kal. 5Chun lai le zan lei suimilam pathum hrawngah, cubangin a tuah ṭhân. 6Cun zanlei pa nga hrawngah ava chuak ṭhân i a dir sawsawh mi midang kha a hmuh ṭhân hna. Zeicadah ni tlâk te nan dir ko? tiah a ti hna. 7Annih nih, ‘Ṭuannâk kan thei lo,’ tiah an ti. Anih nih, “Nan nih zong misur dûmah va ṭuan ve u, nan hmuh awk a simi cu nan hmu ko lai,” tiah a ti hna. 8Zanlei ah dûm ngeitu nih dûm congtu hna sinah, “Rianṭuantu kha au hna law a hnu bik in a hmasa bik tiang an hlawh pe hna,” tiah a ti. 9Zan lei pa nga hrawng i a ṭuanmi hna an ra i ngamu cio an hmu. 10A hmaisa bik hna cu tam deuh hmuh ruahchan in an ra, asinain ngamu cio an hmu. 11Cun hlawh an lâk lio ah inn ngeitu sinah an phunzai, 12“Hi hmadung bik hna nih suimilam pakhat chung lawng an ṭuan i kan nih chun nitlâk nilin khua al lakah a ṭuanmi he â khat in nakan pêk,” tiah an ti. 13Anih nih an lak i mi pakhat sinah, ka kawi, na cungah diklonâk ka ngeih ṭung lo, ngamu hlawh dingin hnatlâknâk kan tuah a si lo mei? 14Na ta kha i lak law, kal ko, na sin i kapêk zat hi hma dung bik sin zongah pêk ka duh a si ko, 15kata a simi cu ka duhning poh in ka tuah khawh ko, ka ṭhatnâk hi nannih nih nan hnahchuah awk a si maw? tiah a ti hna. 16Cuticun hmadung bik hmasa bik a si lai i hmasa bik hmadung bik a si lai. Zeitintiah sawmmi cu tampi an si i thimmi bel tlawmte an si, tiah a ti. 17Cun Jerusalem khua i Jesuh a kal lio ah, Mi Fapa hi tlângbawi upa hna le nawlbia cawnpiaktu hna kutah tlaihter a si lai, annih nih thiding in a cungah bia an chah lai, 18“Zohhmanh u, Jerusalem ah kan kal lai, Mi fapa hi tlângbawi sâng hna le nawlbia cawnpiaktu hna sinah tlaihter a si lai i thi dingin thiamlo coter a si lai, 19nichuak saihnâk le vuakding le vailamtahnâk i khenhchih dingin Gentel mi hna sinah an pêk lai. Cun ni thum ni ah a thoṭhân lai, tiah a ti hna. 20Cu cân ah Jebedi fapa pahnih annu cu a fapa le ratpi in a sinah a ra i khukbil i biak pah in thil a hal. 21Anih nih, “Zeidah na duh,” tiah a ti. Anih nih, “Hi ka fapa pahnih hna hi na pennâkah na orhlei le na kehlei i an ṭhut khawh nâkhnga, ka hna tlâkpi hrâm ko,” tiah a ti. 22Jesuh nih, “Nan halmi hi nan hngalh lo caah a si. Ka dinmi hrai nan ding kho lai maw? cun baptisma ka in ding nan ing kho ve lai maw? tiah a leh hna. Annih nih, “Kan ti khawh ko lai,” tiah an ti. 23Cuticun an sinah, “Ka hrai cu nan din ko lai, ka in hngami baptisma zong nan in ve ko lai, asinain ka orh le keh i ṭhutnâk nawl cu Keimah pek awk a si lo, ka Pa nih a timhhlamh piakmi hna caah a si,” tiah a ti. 24Lamkaltu pahra hna nih cucu an theih tikah unau pahnih hna cungah an i lawm lo ngai ngai. 25Asinain Jesuh nih a sinah a auh hna i, “Gentel biaceihtu hna cu an ukmi hna cungah an i bawiter ngai ngai i an mi rum hna nih nawlngeihnâk cu a hleihluat in an hman hnawh tawn hna. 26Asinain nan lakah cubantuk cu a si awk a si lo; nan lakah mi ngan bik si a duhmi cu nan sinum a si hmasa lai. 27Cun hmaisa bik si a duhmi pauh cu nan sal a si hmasa lai. 28Mi fapa hmanh hi rianṭuanpiakmi si awk ah a rat ṭung lo, rianṭuan ding le mitampi tlanhnâk caah a nunnâk pêk awkah pei a rat cu, tiah a ti. 29Jeriko khua in an chuah lio ah mi tampi nih Amah cu an zulh. 30Cun ngaihmanh mit caw pahnih lamkam i a ṭhumi hna nih Jesuh a lan lio ti an hngalh le cang ka, “Bawipa, David fapa kan zângfah ko,” tiah an au. 31Mizapi nih an sik hna i daite i um dingin an chimh hna; asinain annih nih, “Maw Bawipa, David Fapa, kan zângfah ko,” tiah an au chinchin. 32Jesuh cu a dir i anmah kha a kawh hna, “Zeidah tuahpiak awkah nanka duh?” tiah a ti. 33Annih nih, “Khua hmuh kan duh,” tiah an ti. 34Jesuh nih a zângfah hna i an mit kha a tongh. Hmakhatteah khua an hmu cawlh i Amah kha an zulh.

Currently Selected:

MATTHAI 20: HAKABSI

Highlight

Copy