LUKA 9

1Cuhnuah a lamkaltu hleihnih kha a kawh hna i khuachia vialte cung i nawlngeihnâk le ṭhawnnâk le mizaw damter khawhnâk a pek hna i 2Pathian pennâk thawngṭha chim ding le mizaw damter dingin a thlah hna. 3An sinah, “Nan khualtlawnnâk ah zeihmanh i ken hlah u, ṭhiangṭhunh siseh, zal siseh, chuncaw siseh, phaisa siseh zeihmanh i ken hlah u, angkizong pahnih ngei hlah u. 4Nan tlunnâk innah umpeng u law, cu hmun in nan chuak ṭhân lai. 5Cun an cohlang duh lotu hna cu, cu khua nan chuahtâk lai ah, an diklo ning hngalhternâk caah nan ke i leidip kha nan thin lai,” tiah a ti. 6Cuticun an kal i khua kip kha an ṭol, ka kip ah thawngṭha an chim i mi kha an damter hna. 7Herod siangpahrang nih an tuahmi thil vialte kha a rak theih i a lungthin a buai, zeicatiah cheukhat nih Johan kha thihnâk in a tho ṭhân, tiah an ti. 8Cheukhat nih Elijah â lang a si lai tiah an ti, cheukhat nih hlan lio profet hna lakah pakhat khat a tho ṭhân a si lai, tiah an ti. 9Herod nih, Johan kha alu ka tan cang si kaw, hi tluk thawngpang ka theih ṭhanmi hi ahodah a si hnga? tiah a ti. Cuticun Amah cu hmuh a timh. 10Lamkaltu kha an rak kir ṭhân i a sinah an tuahmi thil kha an chimh. Annih cu hnathiannâk hmun Bethsaida khua peng chungah a kalpi hna. 11Sihmanhsehlaw mizapi nih an theih i an zulh. Anih nih a rak cohlan hna i Pathian Pennâk thawngṭha a chimh hna i damter a herhmi zong a damter hna. 12Zanlei nitlâk laiah hleihnih kha a sinah an ra, kan pawngkam khua le lo hna ah kal in, tlun inn le eiawk i kawl awkah ṭinter hna, zeicatiah hmun king i a ummi kan si,” tiah an ti. 13Anih nih, “Nanmah nih eiawk pe hna u,” tiah a ti. Annih nih, “Hi vialte minung ei awk cu kan va cawk dah tilo ah, changreu panga le nga pahnih dah tilo cu zeihmanh kan ngei lo,” tiah an ti. 14Zeitintiah patling lawngte hmanh 5000 hrawng an si. Cun a lamkaltu hna sinah, “Mi 50 lengmang in ṭhutter hna u,” tiah a ti. 15A chim bangin an tuah i an ṭhutter hna. 16Cuhnuah changreu panga le nga pahnih kha a lâk i vanlei zoh in thluachuah a pêk, a cheu i mizapi sinah phawt dingin lamkaltu sinah a pêk. 17An dihlak in khim tein an ei i an ei hlei kha sei hleihnih khat in an ruh. 18Cun hitihin a si, Amah lawng te thla a cam lio ah, lamkaltu nih an rak fonh i anih nih, “Mi nih aho an ka ti dah?” tiah a hal hna. 19Annih nih, “Baptisma petu Johan a si, an in ti, a cheu nih Elijah a si, an in ti, a cheu nih hlan lio profet pakhat khat a tho`hânmi a si, tiah an leh. 20Anih nih an sinah, “Nannih ta mi zei nan ka ti dah?” tiah a ti. Peter nih, “Pathian Krih na si,” tiah a leh. 21Cubia cu ahohmanh chim lo dingin nawl a pêk hna. 22Mi Fapa nih thil tampi a tuar lai upa hna le tlangbawi hna le nawlbiacawnpiaktu hna nih an hlawt lai, an thah lai i nithum ni ah thawhter a si lai,” tiah a ti. 23Cun an dihlak sinah, “Mi zei pauh zulh aka duhmi cu amah i hlawtin ni chiarte a vailam i put in ka zul seh. 24Zeitintiah a nunnâk humhâk a duhmi nih a hloh lai i keimah ruang i a nunnâk a hlohmi pauh nih a nunnâk a khamh lai. 25Zeitintiah mi nih vawlei hi a dihlak in ngei sehlaw, amah le amah â hrawh i a loh ahcun zeidah a hmuh kun lai? 26Zeitintiah keimah le ka bia a zahpimi pauh cu, Mi Fapa nih a sunparnâk le a Pa sunparnâk le a van mithiang hna sunparnâk he a rat tikah a zahpi ve lai. 27Biataktein kan chimh hna, hika i a dirmi lakah a cheu hi, Pathian pennâk an hmuh hlan lo, a thi lo dingmi an um,” tiah a ti. 28Cubia a chim hnu niriat hrawngah khin Jesuh nih Peter le Johan le Jeim a hruai hna i thlacam dingin tlângah an kai. 29Thla a cam lio ah a muihmai â thleng i a hnipuan kha a râng i a tleu. 30Cun zohhmanh, mi pahnih nih bia an ruah, cu hna cu Moses le Elijah an si, 31sunglawi ngaiin an i langh i Jerusalem i a thihnâk nih a tlinter hngami kong kha an chim. 32Peter le a hawi le tu cu an i hngilh, an hun i hlauh tikah a sunparnâk le a pawng i mi pahnih kha an hmuh hna. 33Cun hitihin a si, cu hna nih Jesuh an kaltâk lioah Peter nih Jesuh sinah, “Cawnpiaktu, hika um hi kan caah a ṭha; thlâm pathum in ka sak lai, Na ca pakhat, Moses ca pakhat, Elijah ca pakhat, tiah a ti. A chimmi kha zei a si ti zong a thei set sai lo. 34Cubiacu a chim lio ah mimei a rak zâm i annih cu a phenh hna. Minmei i an luh lio ah an ṭih ngaingai. 35Minmei chungin aw a rak chuak i, “Hihi ka dawtmi ka Fapa a si. Amah bia ngai u,” tiah a ti. 36Aw thawng a dih cun Jesuh lawng an hmuh. Asinain an thil hmuhmi kongah, dai tein an umpi i cu cân ah mizei sin hmanhah an chim lo. 37A thaizingah tlângcungin an ṭum i mi tampi nih Amah kha an rak don. 38Chikkhatte ah mizapi chungin mi pakhat a rak au i, “Cawnpiaktu, ka fapa rak zoh dingin kan nawl, ka fapa ngeihchun a si. 39Ngaihmanh, thlarau nih a tlaih tawn i hmakhat te ah a ai tawn, a cilphuan kha tla lakin a therthluahmah i duk cercur in a um hnu ceu ah a kaltâk tawn. 40Na lamkaltu hna sinah ṭhawl dingin ka nawl hna i an ṭhawl kho fawn lo,” tiah a ti. 41Jesuh nih, “Maw, ṭhangthar zumhnâk ngeilo le, misual hna, zeicandah nan sinah ka um lai i kan in khawh hna lai? Na fapa cu hika ah ratpi,” tiah a ti. 42A ratpi lio zongah khuachia nih a hlawnh ṭhân, a ther thluahmah, Jesuh nih thlarau thur kha a sîk, ngakchia kha a damter i apa sinah a kalter. 43Mi vialte nih Pathian lenhngannâk kha mak an ti ngai ngai. Cubangin mikip nih a tuahmi hna mak an ti lio ah Jesuh nih a lamkalttu hna sinah, 44“Hi bia hi nan hna ah pil seh; zeitintiah Mi Fapa hi minung hna kutah tlaihter a si te lai,” tiah a ti. 45Asinain a chimmi sullam cu an theithiam lo, an theihthiam nâkhnga lo â thup i annih nih le a chimmi sullam kha hal an ngamh fawn lo. 46Anlakah ahodah a ngan bik lai timi kongah lamkaltu kha an i el len. 47Jesuh nih an lungin an ruahmi kha a hngalh tikah, ngakchia te a kawh i an hmaiah a dirter i 48an sinah, “Ka min ruang i hi ngakchiate cohlang tu pauh cu keimah cohlangtu an si, keimah cohlangtu pauh cu aka thlahtu cohlangtu an si. Nanlak ah a hme bik hi a ngan bik a si,” tiah a ti. 49Johan nih a leh i, “Cawnpiaktu, mizei maw na min i khuachia a ṭhawltu kan hmuh, Nangmah zul in kan sinah â telmi a si lo caah kan thlauh,” tiah a ti. 50Jesuh nih, “Thlauh ti hlah u, a kan ralchanh lotu cu kanmah lei ṭang an si,” tiah a ti. 51Hitihin a si, cunglei i Amah hruai cân a phanh lai ah, Jerusalem lei kal kha biatak tein â tim, 52cun an hmaiah zualko a thlah hna. Cubangin an kal lio ah, Amah caah rak timtuah dingin Samaria khua pakhat ah an lut. 53Asinain Jerusalem lei lawng a cawnh caah cukhua mi hna nih an cohlang duh lo. 54A lamkaltu Jeim le Johan nih cucu an theih tikah, “Bawipa, Elijah nih a tuah bantuk khan, hi hna kanghtu dingah van in mei tlâkter usih law rem na ti maw?” tiah an ti. 55Asinain a mer hnawh hna i, “Zeibantuk thlarau dah nan co ti zong nan i hngal lo. 56Zeitintiah Mi Fapa hi minung nunnâk rawh tertu ah si loin khamhtu dingah a rami ka si,” tiah a sîk hna. Cuticun khawdang ah an kal. 57Lam i an kal lio ah mi zei maw nih a sinah, “Bawipa nakalnâk kip ah kan zulh lai,” tiah a ti. 58Jesuh nih, “Cinghngia nih kua an ngei i vanva nih bu an ngei, Mi fapa cu luchiahnâk a ngei lo,” tiah a ti. 59Cun midang sinah, “Ka zul” tiah a ti. Asinain anih nih “Bawipa, kapa ka vuiter ta,” tiah a ti. 60Jesuh nih, “Mithi nih an mi thi cu vui hna seh; nangtu nih cun Pathian pennâk kong va thanh deuh,” tiah a ti. 61Cun midang zong nih, “Bawipa, kan zulh lai, asinain kan in i a ummi hna he thlahnâk kan tuah ta lai,” tiah a ti. 62Jesuh nih, “Leithuannâk i kut a chia cang ko nain, hnu lei â mermi hna cu Pathian Pennâk minung si awkah an i tlâk lo,” tiah a ti.

Currently Selected:

LUKA 9: HAKABSI

Highlight

Copy