LUKA 8

1Cuhnu ah Jesuh cu phungchim le Pathian Pennâk Thawngṭha i ken in khuapi he khua te he a tlawng hna i a sinah hleihnih kha an um. 2Cun nu cheu khat thlarau sual le zawtnâk chungin a damtermi hna an um ve, cu hna lakah, Mary Magdallin, a chung i khuachia pasarih a ṭhawl piakmi le, 3Herod phaisa kengtu Chuza nupi Joana le Susan le midang dang an si. Cu hna nih anmah ngeihmi chungin a rian an ṭuanpiak tawn. 4Khuakip in mi kha an ra i amah cu an rak panh, anih nih tahchunhnâk hmangin bia a chim. 5Thlaici vorhtu thlaici vorhah a kal i a cheu lam kamah a tla, mi nih anlamh i vanva nih an char dih. 6A cheu lungpher cungah an tla i a keuh le cângkâ dapti a um lo caah a uai ṭhân. 7A cheu hling ngeimi hramh lakah a tla, hramh nih a dih i a lo ṭhân. 8Asinain cheukhat cu leiṭha ah a tla, a ṭhang i a let zakhat in thei a tlai,” tiah a ti. Cu bia a chim lio ah a au i, “Theihnâk dingah hna a ngeimi pauh nih thei ko seh,” tiah a ti. 9A lamkaltu hna nih, “Hi tahchunhnâk bia hi a sullam zeidah a si” tiah an hal. 10Anih nih, “Nan nih caah cun Pathian pennâk biathli hi hngalhsian a si. Asinain midang sinah cun tahchunhnâk lawng in chim a si, an zoh ko nain an hmuh nâkhnga lo le an theih ko nain an hngalh khawh nâkhnga lo, tiah a ti. 11“Tahchunhnâk kha hihi a si. Thlaici cu Pathian bia a si. 12Lamkam i a tlami cu bia a thei cangmi an si, khamhnâk an co nâk dingah an zumh nâkhnga lo, khuachia cu a ra i an lungthin i a ummi bia kha a lakpiakmi bantuk an si. 13Lungpher cung i a tlami cu, bia an theih le cângkâ, lunglawm ngai i a pom cawlhmi hna hi an si, asinain hram a thlak lo caah cân tawite lawng an zumh i tukforhnâk a um tikah an tlu ṭhân tawn. 14Hlingngei mi hramh lak i a tlami cu, bia an theihhnuah an kal i nunchung khuasak tintuknâk le, rum duhnâk le, nawmhhnaih duhnâk nih a dih chih i theitlai an chuah kho lo. 15Asinain lei ṭha i a tlami tu cu, lungthin fel le ṭha in bia cu an theih, an i cinken peng i tuar khawhnâk he thei tlai an chuah tawn. 16Ahohmanh nih meiin vangin ûm in an khuh ballo, ihkhun tang zongah an chia ballo, inn chung i a lutmi pauh nih a ceu an hmuh khawh nâkhnga, a chiahnâk ah an chiah tawn. 17Zeitintiah phuan lo ding i phehmi zeihmanh a um lo, theih lo ding i thuhmi le ceu ah a phân lo ding i thuhmi zeihmanh a um lo. 18Cucaah zeitindah nan theih ti hi ruat u. A ngeimi pauh cu an chap lai i a ngei lomi cu, a ngeihmi bang i ruahmi hmanh an lâkpiak lai. 19Cun anu le a nau le nih amah kha an rak panh, asinain zapi ruangah a pawng an phân kho lo. 20Mi zeimaw nih, “Nanu le na nau le nangmah hmuh duh ah lengah an dir ko,” tiah an va chimh. 21Anih nih, “Kanu le ka nau le cu Pathian bia a thei i â nunpimi hna hi an si,” tiah a leh hna. 22Nikhat cu a lamkaltu hna he tilawng ah an i cit i an sinah, “Varal ah khin kai usih,” tiah a ti hna i an kal. 23Tilawng i an kal lio ah anih cu â hngilh. Tidil ah thlichia a hrang i an tilawng cu tiin a khat hnik i ṭihnung ngai dirhmun ah an um. 24Cun a sinah an va kal i an hun hlauh, “Cawnpiaktu, Cawnpiaktu, kan lotlau cuahmah ê!” tiah an ti. A tho i thli le tilet kha a sîk. Cuticun an ngol i dai tein a um. 25Anih nih, “Nan zumhnâk cu khuazeiahdah a um? tiah a ti hna. Annih nih an ṭih ngaingai, “Hi pa hi mizeidah a si hnga? Thli le ti hmanh nawl a pêk i an zulh ko ê,” tiah an i ceih. 26Cuhnuah Galili ram ralden i Gadarin mi hna ramah an kai. 27Ramchung i a luh lio ah, khua chung mi pakhat, cân saupi khuachia nih a tuahmi pa nih arak ton, cupa cu taklawngin a um i innah um loin thlânah a um tawn. 28Jesuh a hmuh le cângkâ a ai i a hmaiah a bawk, thang pi in, “Jesuh, Pathian Cungnung bik Fapa, kei le nang pehtlaihnâk zeidah kan ngeih? Dân kan tat sawh hlah,” tiah kan in nawl,” tiah a ti. 29Zeitintiah cupa chung i thlarau thur cu chuak dingin nawl a rak pêk cang. Khuachia nih atuah lengmang ruangah mi nih an congh i cikcin in an ṭem i hreng zong an khenh tawn. Asinain a chah hna i khuachia nih ramcar ah a kalpi tawn. 30Jesuh nih, “Na min hodah a si?” tiah a hal. Anih nih, “Tampi” tiah a ti. Zeicatiah a chungah khuachia a lutmi cu tampi an si. 31Annih nih, taw ngeilo khor i a thlak hna nâkhnga lo an nawl. 32Cuka hrawng tlâng pangah vawkrual tampi rawl an kawl, cuticun vawkrual chung i luhter dingin anih cu an nawl i a hna a tla. 33Cuticun khuachia cu cupa chung cun an chuak i vawk chungah an lut. Vawk rual cu cheng palang ah a tli ciam mam i tidil ah lutin an thi dih. 34Vawk zuatu hna nih thil umtuning an hmuh i an zâm, khua chung le ram kipah an va thanh. 35Cuhnuah thil umtuning zoh awkah an rak chuak i Jesuh sinah an ra. Khuachia tuahmi pa kha, hnipuan i hruk in, lungfim tein Jesuh kehram i a um kha an hmuh tikah an ṭih. 36Mit hrimhrim i a hmutu hna nih khuachia tuahmi a damnâk kong kha an thanh. 37Cuticun Gadarin kiangkap mibu hna nih `ihtakte i an ṭih ruangah anmah kaltâk dingin Amah cu biataktein an nawl. Cuticun tilawngah â cit i a kir ṭhân. 38Khuachia chuahtâk mipa nih khan a sin i umpeng ding in a nawl. Asinain Jesuh nih innah tlung ding in a thlah. 39“Na innah va tlung law, Pathian nih naca i thil an tuah piakmi a lenhngan ning hi va chim hna, tiah a kalter. Cuticun a kal i Jesuh nih a ca i a tuah piakmi thil a lianhngan ning kha khuapi chung vialte ah a thanh. 40Jesuh a rak kirṭhân tikah mizapi nih an rak cohlan i an rak hngah. 41Cun zohhmanh mi pakhat a min Jairus, sinagog uktu cu a ra i Jesuh kehram ah bawk in a innah kal dingin a nawl. 42Zeitintiah fanu ngeihchun kum hleihnih hrawngmi hi a ngei i thi hnikin in a um. Cuticun Jesuh cu a kal i lamah mizapi nih an hnawr leng mang. 43Nu pakhat, kumhleihnih tiang thichuak in a zawmi, a chaw ngeihchun vialte sibawi sinah a hman dih i ahohmanh nih an damter khawh lomi a um. 44Cu nu nih a hnu leiin a puan ki a rak tongh i chikkhat te ah a thi chuak kha a dam cawlh. 45Jesuh nih, “Ahodah a ka tawng?” tiah a ti. Ahohmanh nih keimah an ti fawn lo. Peter le a hawi le nih, “Cawnpiaktu, mizapi nih an in hnawr len lio ah, ahodah a ka tawng, tiah na ti ko ê,” tiah an ti. 46Jesuh nih, “Ahonih dik a ka tongh ko, thiltikhawhnâk ka chungin a chuah kha ka hngalh,” tiah a ti. 47Cu nu nih i thuh peng awk a ṭha lo ti kha a hngalh tikah, ther thluahmah bu in a ra, A hmaiah a bawk i mi vialte hmai ah a tongh chan le chikkhat te i a dam cawlhnâk kong kha a phuan. 48Anih nih, “Ka fanu, lunglomhnâk ṭha he um cang, na zumhnâk nih an damter cang, Dai tein kal” tiah a ti. 49A chimlio ah, Sinagog uktu inn in mi pakhat a ra i “Na fanu a thi cang, Cawnpiaktu hi buaiter ti hlah” tiah a ti. 50Jesuh nih cu bia cu a theih tikah, “Ṭihhlah, zûm ko, a dam ṭhân lai,” tiah a leh. 51Inn a phâk tikah, Peter, Johan le Jeim le ngakchia nu le a pa dah ti lo cu ahohmanh luhter a senh hna lo. 52An dihlak in ngaihchia in an rak ṭap lên, asinain anih nih, “Tap hlah u, a thih ṭung lo, â hngilhmi a si,” tiah a ti. 53A thi cang tiahfiang tein a theimi nih an nih sawh. 54Asinain lêngah a chuahter dih hna i a kut a tlaih, “Nu te, tho tuah,” tiah a kawh. 55Cuticun a thlarau a rak kirṭhân i a tho cawlh. Ei awk pe dingin nawl a pêk hna. 56Cun anu le apa cu an khuaruah a har tuk hringhran, asinain a tuahmi kha ahohmanh chim hna hlah u, tiah a ti hna.

Currently Selected:

LUKA 8: HAKABSI

Highlight

Copy