1 Korintofoɔ 2
2
Kristo a wɔbɔɔ no asennua mu no
1 #
1 Ko 1.17
Na me nso, anuanom, mebaa mo nkyɛn no, mamfa asɛm anaa nyansa a ɛtra soɔ mammɛka Nyankopɔn adansesɛm no. 2#Gal 6.14 Na mebɔɔ me tirim sɛ merenhwehwɛ biribiara wɔ mo hɔ, gye Yesu Kristo a wɔbɔɔ no asɛnnua mu no. 3#Aso 18.9; 2 Ko 10.1 Na me deɛ, mmerɛyɛ ne ehu ne ahopopoɔ bebree mu na me ne mo tenaeɛ. 4#1 Ko 2.1 Na me kasa ne m’asɛnka amfa nnipa nyansa adɛfɛdɛfɛ kwan so, na mmom ɛnam honhom ne tumi yikyerɛ mu, 5#Efe 1.17; 1.19; 1 Te 1.5 na mo gyidie annyina nnipa nyansa so, na mmom agyina Nyankopɔn tumi so.
Nyankopɔn nokorɛ nyansa no
6Nanso yɛka nyansa ho asɛm kyerɛ wɔn a wɔdi mu; na ɛyɛ nyansa a ɛnyɛ wiase yi deɛ, na ɛnyɛ wiase atumfoɔ a wɔbɛyi wɔn hɔ no deɛ, 7#Rom 16.25 na mmom yɛka Nyankopɔn nyansa ahuntasɛm mu, nyansa a wɔde sieeɛ a Onyankopɔn de too hɔ maa yɛn animuonyam ansa na wɔrehyɛ wiase aseɛ. 8#Luka 23.34; Yak 2.1 Deɛ wiase yi atumfoɔ mu biara anhunu, na sɛ wɔhunuiɛ a, anka wɔammɔ animuonyam Wura no asɛnnua mu, 9#Yes 64.3 na mmom sɛdeɛ wɔatwerɛ sɛ:
Deɛ ani nhunuiɛ, na aso nteeɛ
na ɛmmaa onipa akoma mu da ne
nnoɔma a Onyankopɔn asiesie ama wɔn a wɔdɔ no no.
10 #
Mat 13.11
Na yɛn na Onyankopɔn nam Honhom so ayi akyerɛ yɛn; ɛfiri sɛ Honhom no pɛɛpɛɛ adeɛ nyinaa mu, Nyankopɔn nnoɔma a emu dɔ no nso mu. 11Na nnipa mu hwan na ɔnim deɛ ɛwɔ onipa mu, gye onipa no ara honhom a ɛwɔ ne mu? Saa ara nso na obi nnim Nyankopɔn adwene, gye Nyankopɔn honhom. 12Na yɛn deɛ, ɛnyɛ wiase honhom na yɛnyaeɛ, na mmom honhom a ɔfiri Nyankopɔn mu, na yɛahunu deɛ Onyankopɔn de adom yɛn kwa no. 13#1 Ko 2.1; 2.4 Nso deɛ yɛka no, ɛnyɛ nsɛm a wɔde nnipa nyansa kyerɛkyerɛ, na mmom deɛ Honhom no kyerɛkyerɛ na yɛde honhom adeɛ to honhom adeɛ ho. 14#1 Ko 1.23; Yoh 8.47 Na onipa a ɔnni honhom no nnye Nyankopɔn Honhom adeɛ, na ɛyɛ no nkwaseasɛm, na ɔntumi nhunu mu, ɛfiri sɛ wɔbu mu atɛn honhom mu. 15#1 Yoh 2.20 Na onipa a ɔwɔ honhom mu no deɛ, ɔbu adeɛ nyinaa atɛn, na ɔno deɛ obiara mmu no atɛn.
16 #
Rom 11.34; Yes 40.13 Na hwan na wahunu Awurade adwene
a ɔbɛkyerɛkyerɛ no?
Na yɛn deɛ, yɛwɔ Kristo adwene.
Currently Selected:
1 Korintofoɔ 2: ASW
Highlight
Share
Copy
Want to have your highlights saved across all your devices? Sign up or sign in
The Bible Society of Ghana, 2012
