Matewus 7
7
Evek gaini voɗok
Luk. 6.37-38, 41-42
1Ku ɗûklûti sariya kai, kapai sariya te ɗukla midiki kai. 2Buri ɓa sariya na ki ɗa ziŋɗi wiiɗi ɗai na ɗa, aga e ziki sariya wiiki tiki nɵa lai, daram na ki ɗa ŋi gaiɗi ɗa, aga a ŋa siki tiki gaiɗi na lai. 3Tuku ku tala evek n'a na arni tawalku ɗa, amma voɗok na arku tuku ɗa, ku sɗaŋ kai ɗa maɵa maɵa ɗa? 4Ku sɗa aŋ muɗa sini tawalku ɓa: hinaŋa mu tikasi evek na arku ɗa edi, paŋ kai voɗok n'a na arku tuku ɗa a tika edi gaiku kai ɗa maɵa maɵa ɗa? 5Tuku zi rhai, tika voɗok na arku edi avut ɗaw haw, nɵa aga ku sɗa futini tikini evek na arni tawalku ɗa edi.
Aidaw gaini Hoho
6Ki si wala na sɗik wiini hirgakai kai, ki pûkû aidawki azumai wuzani hoho kai, ɵa kai ɗa aga a kirpaŋ azumai, aga a bundasi siki a ɓisiki edi lai.
Siiwi, piyi, ɵiɓi
Luk. 11.9-13
7Siiwi aga a siki, piyi aga ki nivi, ɵiɓi mini dalam aga e miliŋki edi lai; 8Buri asiya ɗi paŋ, n'a siiwa a nava, n'a paya a nava, n'a ɵiɓa mini dalam aga e miliŋni edi lai. 9Ktai arbaki na ahini a siiwaŋ burini ɓuk, a tika ahi-fuŋ a siŋni ɗa, a na ɗi? 10Zaw n'a siiwaŋ burini hilif, a sini wala meefeŋ a na ɗi? 11Na ɓa tiki na ki ɗa maafanai, ki siɗi aŋ si wazagai na pɗamai wiiɗi aliki, azi gama Epiki na war fuŋ-n'Alaw aga a siɗi wazagai na pɗamai wiiɗi nagai n'e siiwiŋ ɗa.
Sda na ki ziŋ siɗi na zamai
Luk. 6.31
12Wala paŋ na ki diri ɓa ɗai e ziŋ siki ɗa, tiki lai zi hanɗa siɗi, hanɗa a gadai na wiini Musus gaiɗi ɗai na mini Alaw.
Futi na sulu
Luk. 13.24
13Ki niyi ɗa warni mini hlai na gaini hiɵi, buri ɓa futi na te ka sini bi n'edi ɗa te na buruki, mini hlai bruk lai, n'e niyi warni ɗaw ɗa e ɗa viya lai. 14Amma mini hlai n'a ka sini suŋfa ɗa a na agwi, futi te na gaini hiɵi lai, nagai n'e niviŋ ɗa e ɗa agwi lai.
Ɗif a sɗa luwuŋ paŋ pini alini
Luk. 6.43-44
15Ki giɗimi siki wuzaɗi ɗai na mini Alaw z'alasakai, n'e hilisi siki ɗa maini adumai ɵa, amma warɗi n'amlai ɗa e ɗi belemke si virmi. 16Aga ki siɗiɗi sini aliɗi. Ɗif a rawasi alini luwuŋ zi vin sini luwuŋ zi hedek par ɗi? Zaw alini luwuŋ Fige sini duvuɗvuɗ par ɗi? 17Luwuŋ na pɗem paŋ a wa ali na pɗamai, luwuŋ na meefeŋ ɗe a wa ali na maafanai lai. 18Luwuŋ na pɗem a kiɗa a wa ali na maafanai kai, luwuŋ na meefeŋ a kiɗa a wa ali na pɗamai kaalai. 19Luwuŋ paŋ n'a wa ali na pɗamai kai, aga a ɗukla azumai, a ɵiŋka arni afu, 20nɵa aga ki siɗiɗi ɗa sini aliɗi.
Seŋ zi miɗi gaini zi na pini
Luk. 6.46; 13.25-27
21Aga e niyi warɗi paini fuŋ-n'Alaw ɗa e ɗi nagai n'e miɗiŋa ɓa: Epiɗ-ɗai, Epiɗ-ɗai ɗa paŋ kai, sai a ni n'a za dirini Apa na war fuŋ-n'Alaw. 22Viya aga e miɗiŋa warni mefeŋ ni ɓa: Epiɗ-ɗai, Epiɗ-ɗai, tiyi mi miɗi seŋ na wuze ɗa war yikuku kai ɗi? Mi birgi ksalai edi war yikuku kai ɗi? Mi zi wazagai zi hiila viya war yikuku lai kai ɗi? 23Nɵa aga mu wiyiɗi seŋ ɓa: mu siɗiki ka duk kai, yimi siki edi sa par, tiki na ki zi sɗa na meefeŋ.
Seŋ zi siŋka maini miɗini dalam na sulu
Luk. 6.46
24Buri nɵa, asiya ɗi paŋ n'a ɵina seŋ hanɗa war ma par, n'a za pini lai ɗa, ni aga a za aŋ ɗif zi yel, n'a rga dalamni amai midini huwuŋ. 25Faŋ a ɵa abai, yem zi ki a cosi, smer a vuvuwa a ɵiɓa sini dalam hanɗa, amma dalam ɗa a kɵa kai, buri ezini a tora miɗini huwuŋ. 26Amma asiya ɗi paŋ n'a ɵina seŋ hanɗa ma par, amma a za pini kai ɗa, aga a za aŋ ɗif zi dûûli n'a rga dalamni miɗini kaikai. 27Faŋ a ɵa abai, yem zi ki a cosi, smer a vuvuwa, a ɵiɓa sini dalam hanɗa, dalam ɗa a kɵa, kɵini a za abai lai.
Spakni Yesu
Mark. 1.22; Luk. 4.32
28Won hlai na Yesu a vada gaini seŋ zi miɗi hanɗa ya, firiɗi ɗai a bunda hiyak burini hitirini. 29Buri a hitriɗi ɗa maini ɗif n'aŋ gaini spak pini nɵa, maiɗi ɗaiɗi n'e ɗû wazagai ɗa nɵa kai.
Currently Selected:
Matewus 7: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
