Lukas 9
9
Yesu a ɵiniɗi na doogo pi sulu edi
Mat. 10.1-14; Mark. 6.7-13
1A yikiɗi na doogo pi sulu, a siɗi spak miɗini ksalai paŋ, aŋ zûûli veglek lai. 2E ɵiniɗi edi buri e ɓikiti pai na wiini Alaw, aŋ zûûliɗi nagai zi veglek. 3A miɗiɗi: ki tiki wala ktai tiki buriɗi morkoiki kaalai, amaraŋa kaalai, guɓo kaalai, wala zi simi kaalai, arzaŋ kaalai; ɗif a mula sapa sini sulu kaalai. 4Dalam na ki niyi li aha warni paŋ ɗa, ki simni woni ɵa, na ɓa ki hili a hili ɗa, ki fiki ɗa woni par. 5Woɗi paŋ na ɗai e diri e yimiki siɗi kai ɗa, won hlai na ki niyi edi warni fuŋ n'abai hanɗa par, ki ɵiɓi alogodo n'eziki ɗa edi aŋ zaida siɗi. 6E hili, e tiki piɗi e vigi warni fuŋ n'agogoi agogoi paŋ, e ɓiki labar na pɗem, e zûûliɗi ɗai zi veglek war hlai paŋ lai.
Herod a huna buri Yesu
Mat. 14.1-12; Mark. 6.14-16
7Herod a abai na midini galni afti na wiiɗi pai n'ag'aŋ puɗu, a ɵina labarni wazagai n'a na ɗa paŋ, a tika pini a huna buri zamai e miɗi: Yohana a ɵiyasi amai arbaɗi zi mri par ɵiya. 8Zamai ɗa ɓa a siŋkasi sini na ɗa a Eliyas, na zamai pra ɓa, a ɵiyasi amai na ɗa, a ktai arbaɗi ɗai na mini Alaw na ɗipar. 9Herod a zilba sini ba: Yohana ɗa, mu ɗukla midini edi mu ta, ni na mu ɵina labar miɗini maini hanɗa ɵa ɗa, ni asiya ɗa? A paya futi aŋ talaŋ.
Yesu a viɗi ɗai dubu ɵim
Mat. 14.13-21; Mark. 6.30-44; Yoh. 6.1-15
10Apostelai, won hlai n'e wiyisi edi par ɗa, e miɗini wiini Yesu gaini wazagai n'e ziŋsi ɗa paŋ. A miliɗi pini, a yima sini edi war baŋa gaiɗi ɵimaɗi fuŋ n'abai ktai na yikini ɓa: Betsaida. 11Firiɗi ɗai e siɗi hanɗa, e hili pini, a yimiɗi gaini firiyi a miɗiɗi midiɗi pai n'Alaw, a zûûliɗi nagai n'e ɗa piyi zûûli lai.
12Won hlai n'e tiliti futi te hala li ɗa, na doogo pi sulu e hilisi sini Yesu e miɗini: Ku tikiɗi piɗi ɗai ta kapai e hili e piyi hlai zi feŋ, e piyi wala zi simi war fuŋ na agogoi n'aŋ ɵimaɗi hlai, buri mu ɗumu na ɗa edi warni basga. 13Amma a miɗiɗi: Tiki dama siɗi simi. E miɗini: Peŋ n'aŋ tiyi ɗa a suwa ɵim kai, hilif ɗe a suwa sulu kaalai, sna na ɓa tiyi dama mi hili li aŋ wirisi wala zi simi buriɗi ɗai hanɗa paŋ. 14Ɗai ɗa e zi dubu ɵim, a miɗiɗi wiiɗi ɗaini zi hitri buri e miliɗi azumai midiɗi marɗi doogo doogo ɵim-ɵim. 15E ziŋ maini hanɗa nɵa, e miliɗi azumai paŋ. 16A mula peŋ na ɵim gaini hilif na sulu lai, a bunda arni amai war hlai n'amai, a sa tese sini Alaw burini wazagai hanɗa. Asakal par a ɓurwaŋ, a tika pini a siŋɗi wiiɗi ɗaini zi hitri kapai e ɓûrwiŋ wiiɗi ɗai. 17Ɗai paŋ e simi, e vi. Pini n'a hina, e tipiŋ amai ɗa a va dologo doogo pi sulu.
Peter a muɗa ɓa: Yesu a Kristu
Mat. 16.13-20; Mark. 8.27-30; Yoh. 6.67-71
18Mefeŋ ktai, won hlai n'a na siiwa edi warni baŋa, ɗaini zi hitri e ɗa gaini lai, a zilbiɗi a muɗa: Ɗai e miɗi ɗa ɓa, Ta mu asiya ɗa? 19E wiyi seŋ e miɗi: Na zamai ɗa ɓa ku Yohana zi baptisme, na zamai ɗa ɓa, ku Eliyas, na zamai pra ɓa, ku ktai arbaɗi ɗai na mini Alaw na ɗipar n'a ɵiyasi amai arbaɗi zi mri par. 20A miɗiɗi: Tiki koo, ta mu siya lai ɗa? Peter a waya seŋ a muɗa: Ku Kristu na wiini Alaw. 21A ɓiriɗi, a gidiɗi miɗi buri e miɗi hanɗa wiini ɗif kai. 22A muɗa pra: Ahini ɗif ɗa aga a sɗa gir viya, n'abakai n'arbaɗi gaiɗi paakai na abakai zi ɓaka gaiɗi ɗai zi ɗû wazagai aga e biliŋ edi arbaɗi par, e fiɗiŋ edi lai, war mefeŋ n'ag'aŋ hu ɗa aga a ɵiya amai.
Hili na pini Yesu
Mat. 16.24-28; Mark. 8.34; 9.1
23A miɗiɗi wiiɗi ɗai paŋ ɓa: Na ɓa ɗif a firiya a halasi pa ɗa, a bla gaw sini sini dama, a tika dagrani wulani mefeŋ paŋ kapai a hala pa. 24Buri asiya ɗi paŋ n'a dara a kurɗa suŋfani aga a baŋ, amma asiya ɗi paŋ n'aga a ba suŋfani aga a kurɗaŋ. 25Na ɓa ɗif a niviti yai gaini abaiɗi paŋ, amma a ba sini edi, zaw a tuura sini edi ɗa, pɗem na wiini aŋ waa ɗa? 26Buri nɵa asiya ɗi paŋ n'aga mu za siyer buriya, burini seŋŋa lai ɗa, Ta Ahini ɗif aga a za siyer burini lai won hlai n'aga mu wayasi warɗi abai ɗa, warɗi abai na wiini Apa, gaiɗi na wiiɗi ɗai zi ɵeŋ na war fuŋ-n'Alaw na sɗik lai. 27Mu na midiki a jre, zamai arbaɗi nagai n'e ɗiyi won na ɗa, aga e siɗi mri kai haa e tiliti pai n'Alaw.
Sini Yesu a bunda amai midiɗi huwuŋ
Mat. 17.1-9; Mark. 9.2-10
28Mefeŋ mitwis asakal n'a muɗa hanɗa ya, Yesu a yima Peter gaini Yohana gaini Yakob lai gaini, a niya amai midiɗi huwuŋ aŋ siiwa. 29Won hlai n'a na siiwa, wuzani arni a bunda, sapa na sini a bunda muɗukwi tal. 30Ɗai sulu e ɗi fu gaini ca aŋ hiɗi kalaŋ, hanɗa a Musus gaini Eliyas. 31Nagai e siŋki siɗi edi warɗi abai na sini Alaw par, e miɗi miɗini yimini n'edi n'aga a va amai war Yeruzalem. 32Peter gaiɗi marni weseŋ a suwa gdaŋɗi gara, won hlai n'e ɵiyi amai ɗa, e tiliti abai na wiini gaiɗi ɗai na sulu n'e ɗa gaini. 33Won hlai na ɗai e diri e yimi siɗi edi sini Yesu par ɗa, Peter a miɗiɗi: Api zi hitri, simnumu na won na ɗa pɗem, mu zuzunumu gumu hu, na ktai buriku, ktai burini Musus, na ktai burini Eliyas lai. Wala n'a niyasi mini par na ɗa a sɗaŋ kai. 34Won hlai n'a na muɗa hanɗa, ɗugul a halasi a dûgûɗi, hunai a yimiɗi gara, won hlai n'e niyi warni ɗugul. 35Arni ɗugul par, wule a wasi a muɗa: Hanɗa a ahiya na mu varaŋ edi ɗa, ki ɵini pini. 36Won hlai na wule a wa li ɗa, Yesu a hina kiini zaw, ɗai zi hitri e wi piɗi liyik; wala na e tiliŋ ɗa, e miɗi gaini wiini ɗif kai war mefeŋ ni ɗa.
Yesu a zuula ahiyagwi na gaini ksalai miɗini
Mat. 17.14-21; Mark. 9.14-29
37Dawaini, won hlai n'a niyasi azumai amai midiɗi huwuŋ par li, ɗai viya e hilisi sini. 38Arbani firi par ɗif ktai a ɗuula a muɗa: Api zi hitri, za barka, talaŋa ahiya haw, buri ahiya ɗa a ni ketekeɗik. 39Seze ktai a na sini, a yimaŋ li ɗa, tizaw a ɗuula, a gidiyaŋ gdaŋ, mini a ha meɵeɵepe, a hinaŋ gaini gir, gaini kayai gaini wuruk. 40Mu siiwiɗi ɗaiku zi hitri buri e birgiŋ edi, amma e kiɗi kai. 41Yesu a muɗa: Pinziba na gaini yimi kai, na maafanai, aga mu sumna gaiki ɵa haa kaswata ɗa ta? Aga mu libiki ɵa haa kaswata ɗa? Kasi ahiku won na. 42Won hlai n'a na halasi sini sek ɗa, ksalai a blaŋ azumai, a gidiyaŋ gdaŋ. Amma Yesu a ɓara ksalai, a zuula arwagwi ɗa, a siŋni wiini epini ɗa lai. 43Nagai paŋ e bindi hiyak buriɗi abai na wiini Alaw.
Yesu a muɗa edi pra burini mrini na wuzani
Mat. 17.22-23; Mark. 9.30-32
Won hlai na ɗai paŋ e bindi hiyak burini wazagai paŋ n'a na zaŋ ɗa, a muɗa siɗi ɗaini zi hitri: 44Tiki ɗa ki ɵini seŋ hanɗa pɗem, Ahini ɗif aga a sa edi tiɗi ɗai. 45Amma e ɵini ezini seŋ hanɗa edi kai, a na fu gaini ŋûyi cok wuzani arɗi, kapai e ɵini ezini kai; E hûni buri e zilbiŋ burini seŋ hanɗa.
Abai n'arbaɗi asiya ɗa?
Mat. 18.1-5; Mark. 9.33-37
46Ɗai zi hitri e tiki piɗi e zilbi arbaɗi marɗi: Aga a za aŋ abai arbamu ɗa asiya ɗa? 47Won hlai na Yesu a sɗa hiiniɗi, a yima arwagwi ktai a tikaŋ ɵimaɗi ta, 48a miɗiɗi: Asiya ɗi paŋ n'a yima arwagwi hanɗa sini war yikiŋa ɗa, a yimaŋa Mu ta. Asiya ɗi paŋ n'a yimaŋa Ta ɗa a yima ɗa A ni n'a ɵinaŋasi, buri ni n'a na agwi arbaki paŋ ɗa, a na abai n'arbaki.
Ni n'a na aŋ gawki kai ɗa, a na gaiki
Mark. 9.38-40
49Yohana a waya seŋ a muɗa: Api zi hitri, mi nivisi ɗif ktai a na birga ksalai edi war yikuku, mi piyi futi aŋ ɗiliŋ buri ni aŋ puku gaiyi kai. 50Yesu a miɗini: Ki ɗiliŋ kai, ɗif n'a na aŋ gawki kai ɗa, a na gaiki.
Fuŋ ktai na wiiɗi ɗai na Samariya a dara a yima Yesu sini kai
51Won hlai na mefeŋ ni n'aga a yima amai woni a ŋasi gobi ɗa, a rga warni buri a hala a Yeruzalem. 52A ɵina ɗai wuzani, nagai e fiki e hili e niyi warni fuŋ ktai na wiiɗi ɗai na Samariya buri e zizini hlai woni. 53E yimiŋ siɗi kai, buri a hala na ɗa a Yeruzalem sek. 54Won hlai na ɗaini zi hitri: Yakob gaini Yohana e tili hanɗa, e miɗi: Epiɗ-ɗai, ku dara ɓa mi yikisi afu war hlai n'amai par a halasi a yiɗi edi ɗi? 55A bunda arni siɗi, a ɓiriɗi; 56E hili warni fuŋ zamai.
Ɗai n'e diri aŋ tipi pini Yesu
Mat. 8.19-22
57Won hlai n'e ɗa warɗi futi yaw, ɗif ktai a miɗini: Mu dara mu tapa puku woɗi paŋ na ku dara ku hala. 58Yesu a miɗini: Huɗi ɗa, waŋni a na, wala zi ɗufli n'arbani hlai n'amai gutni a na lai. Amma Ahini ɗif ɗa, hlai n'a sumna woni buri sini amla maa aŋ kai. 59A miɗini wiini na zamai: Tapasi pa. Amma ɗif a miɗini: Epiɗ-ɗai, hinaŋa mu hala mu pasi apa tiɓ haw. 60Yesu a miɗini: Hiniɗi zi mri e pi ɗaiɗi zi mri, tuku ɗa, hala aŋ ɓikiti pai n'Alaw ɗa edi. 61Ɗif zamai a miɗini: Epiɗ-ɗai, mu firiya mu tapa puku, amma ku hinaŋa mu miɗiɗisi wiiɗi ɗai n'ahaya ta haw. 62Yesu a miɗini: Asiya ɗi paŋ n'a faka li aŋ hirma gaini saret, na ɓa a tala arni duɓani sek ɗa, a nafa warɗi pai na wiini Alaw kai.
Currently Selected:
Lukas 9: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
